羅馬之旅 - 前傳

之前有套戲叫《龐貝末日：天火焚城》，戲就無睇，但响 National History Museum 睇過啲木乃伊，响偶然間見到有個羅馬旅行團會有 Day trip 去一去龐貝嘅地方，似乎都同呢個地方結咗緣，於是就報咗名。

因為聽朝要七點到機場 Check-in, 所以 Book 咗 Gatwick 機場附近嘅酒店，噚晚執好嘢，今日就帶埋個旅行喼返工，放工嗰陣，啤梨上司重話放假玩得開心啲。搭地鐵去 Victoria, 一個幾熟悉嘅地方，因為攪本護照都過咗嚟兩次。


跟住再搭火車去 Crawley, 架火車都幾多人吓，似乎唔應該搭 Southern 線，應該搭其他線再响 Gatwick 機場再轉車會舒服啲。

Crawley 係另一個熟悉嘅地方，因為嚟見工，又係嚟過兩次。其實都好彩無見成呢份工，因為嚟到只係八點，啲舖頭都已經收晒，街上面空空如也，人氣唔太夠，最多人嘅係間麥記。

去到酒店，開頭俾咗間吸煙房我，要換另一間，話會細少少喎，但對於一個討厭煙嘅人嚟𧪿，細間總比吸二手煙好。換咗房之後，一開門，其實唔係細太多，完全合格，但就開始有少少餓，睇嚟於工買嗰件 Subway 唔太夠飽，問一問接待處，原來附近有間 ASDA, 可以去買少少嘢食，去到發現係廿四小時營業添! 因為啲零食都係偏硬，隻牙又未整好，於是就去買咗呢幾日唯一嘅零食: 香蕉。一磅有一梳，合理價錢。

返到房，嘩! 今日唔知做乜咁鬼熱，唯有去沖個涼先。沖完涼，依然覺得好熱，䁔爐又無開，唯有開窗，即刻涼爽晒! 係時候煲新聞，响火車度掃 fb 都見到大件事，睇埋 Video 都真係離晒大譜，谷氣...

Anyway, 祈待呢幾日嘅旅程。