每日一字 24

英文有三個唔同嘅字去講國家

Country - 以地域分界
A nation with its own government, occupying a particular territory

Middle English: from Old French cuntree, from medieval Latin contrata (terra) '(land) lying opposite', from Latin contra 'against, opposite'.


Nation - 以人文分界, United Kingdom 入面有英格蘭、威爾斯、蘇格蘭、同北愛爾蘭三個唔同文化種族嘅 Nation 組成嘅國家
A large body of people united by common descent, history, culture, or language, inhabiting a particular state or territory

Middle English: via Old French from Latin natio(n-), from nat- 'born', from the verb nasci.


State - 以權力分界, United States 就係以唔同地方政府組成嘅國家
A nation or territory considered as an organized political community under one government

c.1300, from special use of state (n.1); this sense grew out of the meaning "condition of a country" with regard to government, prosperity, etc. (late 13c.), from Latin phrases such as status rei publicæ "condition (or existence) of the republic."

週末煲劇

好耐未睇過日劇，於是就決定呢個週未唔出街，留响屋企睇。呢一季嘅日劇好多都係 Season 2, 有 Hero, 有金田一、有 GTO, 有信長的主廚等等，於是就先睇 Hero, 其實無睇過第一季，只係聽聞係高收視之作，而平均今季都有廿點，應該唔會差得去邊。

可惜一路食嘢一路睇劇嘅時候，突然感覺到口中有硬物，但係我食緊嘅係軟淋淋嘅曲奇餅，心知不妙，响口中吐出嚟一睇，係牙齒同埋少少補牙嘅碎片，再照一照鏡，果然出咗事。好彩嘅只係表面碎裂，有感覺但係唔痛。


上網搵，附近有幾間牙醫，因為係星期六，得其中一間話開到一點，於是就換衫落街搵，搵到嘅時候，唔... 似乎個 website 有少少流，都無開嘅，唯有折返，繼續睇我嘅日劇了。返到屋企之餘亦都收到兩封信，其中一封係 Council Tax, 因為一個人住嘅關係，係可以有 25% Discount, 不過要人手申請。

Anyway, 就咁過咗個週末，因為太早起身嘅關係，亦都幾早就瞓咗...

民心所向

英國鬧得熱烘烘嘅蘇格籣獨立公投，我諗作為常識嚟講，該應要知到幾件事。
1. 英國國旗組成


2. 分辨 United Kingdom, Great Britain 同 England


3. 點解蘇格籣係英國嘅一部份


其實以公投型式成功獨立嘅例子响西方國家嚟講都幾少，如果一個國家嘅政府管得好地地，好多人都只會想維持現狀。以德服人者王，以武服人者霸，槍桿子裏出政權嘅政府，最後都係會人心思變。

小休半天

今日終於等到有人上嚟裝寬頻，上晝臨放 Lunch 之前要開會，開咗耐少少，所以開完會就要跑去趕搭地鐵。

返到屋企，好快咁煮咗個麵，食完之後無耐就有人打嚟話過緊嚟。因為噚晚洗咗衫，要收起佢先。上嚟嘅唔係一個，而係一兩個人，一人拎一大袋嘢，但要用到嘅嘢，都係幾件工具。一路 Check Email, 一路睇住佢哋做嘢，寬頻好快就裝好，响佢好好心機咁將條線用釘揼入牆之際，我記得唔係太得，唯有阻止佢，但已經揼咗五口釘，無辦法了。

等一陣，有得用了，速度唔錯，但好似 VPN 唔到。上網查吓，原來個 Router 來置 Firewall, 所以 Block 鬼咗，要入去 Enable 返個 PPTP Passthrough. 一切都順利。

本來今個下晝係 Work at home, 但一來攪寬頻，二來唔記得帶火牛，所以都做唔到太多事，只係開兩個會，Notebook 就已經無乜電，所以都係要收工。

Set 好所有嘢，食過晚飯，就去咗做 Gym. 再返屋企嘅時候，見到晈潔嘅明月。噚晚多雲，月亮週圍有一層霧氣，有少少掃興，今晚好好多，追月追咗兩個街口，要轉彎返屋企了。

今晚除咗追月，有咗寬頻，重要追返之前 Miss 咗嘅動畫。

河馬奇遇記

星期六悶悶哋，睇吓 Timeout 有乜嘢好玩。有兩個選擇，一係去 Greenwich 睇煙花，一係去 South Bank 睇河馬。Greenwich 似乎對我嚟講實在太遠，睇完煙花亦都太夜，於是揀咗去睇河馬。

隻河馬嘅創造者其實就係造吹氣黃膠鴨嘅藝術家 Florentijn Hofman (相信無乜人知佢個名，識讀嘅更加少了)，不過今次唔係吹氣，係用木造，响泰晤氏河浮游，如果退潮嗰陣，重可以行上去。

好簡單咁用午餐肉整咗個午餐，就出發。


因為屋企所在嘅地方都係叫 Greater London, 似香港嘅元朗，日常生活要嘅嘢都齊，但係去市中心就要啲時間。今次要搭巴士轉火車，呢架巴士係第一次搭，同之前搭嘅巴士路線有少少唔同，大部份都係內街，路面比較窄，所以當有對頭車嗰陣，就要停一停等一等。本來想影 Time Lapse, 但係效果欠佳，都係睇返啲相算。


去到火車站，唔係話第一次搭英國嘅火車，但係市內嘅火車都真係第一次搭，似乎呢個城市重有好多嘢去發掘。


火車途中無乜嘢做，有機會就影吓 Slit-scan, 都有幾張合格


到達目的地，响 St. George Wharf 附近，本來想剩係同河馬影相，但佢似乎幾受歡迎，連消防船駛過都停咗一陣，過咗五分鐘後先再駛開。


今日帶咗兩件法寶，Eye-fi 同埋全景鏡，之前用手機影相，無得 Zoom, 所以目標距離遠少少，就變咗細細粒，今日可以用部 DC Zoom 埋去影了。全景鏡只係諗住睇吓有無啱嘅地方影吓全景咁，無乜特別原因。

目的地遊人唔多，嚟嘅都係亞洲人咁滯，同咗幾個人影相。當中有個女仔見我用全景鏡嘅時候對天影，問我係咪影天空，於是就解釋咗發生緊乜嘢事，再順便同佢哋影張相示範吓個效果。


其中一個女仔問我响邊度嚟，答咗係香港嚟之後，佢就同我講咗幾句廣東話，原來佢係廣西嚟，過嚟讀書，佢同學係日本嚟。Send 咗張相俾佢之後，大家就道別了。

支全景鏡係有一定嘅魔力，可能因為太大支，同埋影相嘅姿勢太誇張，通常拎親出嚟都會有人問，如果用嚟識人嘅話，係一件幾唔錯嘅工具。

Anyway, Social 完畢，完成埋幅相佢，走得!


除咗用相機影，都要用手機影吓，開咗 Digital Zoom, 其實效果唔係真係咁差


碼頭嘅另一邊，就係過河嘅橋


臨走嘅時候，見到個 Boot 機畫面


返屋企嗰程決定唔搭巴士，轉搭火車加地鐵。部手機乜電，唔太可以影 Slit-scan, 於是就打部相機嘅主意，因為有時搭車會見到塗鴉，想影低佢，今次有相機，係個大好機會。於是就較好部機，效果都叫做滿意。


不過落車嗰陣就出事，因為 Richmond 係 Zone 4, 我張季票係 Zone 2-3, 所以要收錢，失策添...

去咗超級市場買咗少少嘢，返到屋企，發生咗少少意外，本來想開兩隻蛋炒飯，到最後係開咗四隻，於是肉碎蛋炒就變得好有料，可以分兩餐食了。


今日嘅天氣都係多雲，霞境略嫌不佳，當算合格

大師

响 Facebook 掃掃吓嘅時候，掃到去一候講50年代相片嘅 Link.

當中嘅第五幅，係一個都幾現代嘅風格，一啲都唔似係50年代影嘅。當中以幾何圖案嘅組合，同光影分出唔同灰階，帶出簡單而工整嘅構圖，之後加入相對不規則嘅人形帶出嘅衝突，好有故事性。


經友人指點，原來影相嘅人並非泛泛之輩 (當然，以當年嘅生活水平，擁有相機就已經並不平凡)，於是就走去咗少少資料搜集。呢一幅相已經係獲獎無數，話作成名作亦不過份，亦係被作為致敬嘅對象。

影相嘅人係何潘先生，响 Wikipedia 出現都已經唔出奇，最出奇嘅係有Facebook Page, 當然可能係公關公司攪。跟住　About 條 Link, 就可以見到佢唔少作品，當中有另外兩幅都好有意思吓


呢啲都已經係藝術品，應該話係美術作品，所以個 Facebook Page 話佢係 Artist, 都直係一啲都無錯。

空轉

今日可能悶得滯，又犯眼瞓，於是搵啲好耐未掂過嘅嘢做吓，起 Eclipse 同 Tomcat, 睇吓依家 Java 發展到咩程度都好。最普通咁，起個 JSON 嘅 Service, 攪咗個幾鐘，都係差少少，最後都係要放棄。

除咗攪 Java, 都做咗少少私人嘢，就係追返張櫈返嚟。上個禮拜二訂嘅事，本來話過兩日送到，但攪到我搬咗都未送到，於是星期一就去追個賣家，跟住噚日竟然個 Courier 話已經送到。事實係乜都無收過，今日再追一追，跟住下晝就收到舊屋主通知話已經到咗，個 Tracking Record 唔通係未來出現嘅? Anyway, 今晚要開個遲會，攪到遲咗之餘，又要過舊屋主度搬張櫈返嚟，都成12公斤，都幾重吓。加上未食嘢，都真係抬得幾辛苦吓。本來話今晚要做 Gym, 但睇嚟都係唔使做住，一來太夜，二來都幾攰吓。

返到屋企，好簡單咁煮咗個麵，再開動洗衣機，就砌張櫈。其實對櫈嘅要求唔高，最主要係有可以調較高度嘅手柄，價錢又合理咁。


都幾滿意，其實成間屋都白色，都係有多啲顏色好啲。下次就要買張電腦枱，咁就 Perfect!

適應

噚日第一日由新屋返工，鬧鐘時間無變，可能係未熟習新屋嘅環境，似乎出門都係好似唔太夠時間咁。

下晝食完晏唔知點解超級頭痛，完全做唔到嘢，好辛苦咁捱到六點，即閃。去到屋企附近，買咗啲餸，決定蒸肉餅，加多少少菜咁。


味道唔錯，只係飯煮得淋咗少少，亦都煮多咗準備今日炒飯。食飽抖一陣，去咗附近嘅 Gym, 入會做 Gym 咁，副效果係頭痛無晒，夜晚有覺好瞓了。

今日同一時間起身，但出門時間就早咗，可以順便去郵局寄信，但係當寄完之後，發覺屋企街口有個郵筒... Anyway, 都重夠時間行去地鐵站。落咗車，決定慢慢行返公司，原來放慢腳步，都幾寫意。

今日最主要係寫 Document 同開會，開完個 Design 會，啤梨上司嫌 Offshore team 嘅 Document 唔夠 Detail, 於是就叫我出手。以前教人寫 Code, 依家要開始教埋寫 Document 了。

放工之時，諗住搭巴士，但係 CityMapper 話會嚟嘅巴士好似唔存在咁，睇佢話住11分鐘到，去到6分鐘之後，又變返11分鐘。放棄，都係搭返地鐵算數。

返到屋企，炒飯，啲飯好似多咗啲，加咗少少菜，但就淡咗啲，最後都食得晒兩大碗，好滿足。


無晒生果，走去超級市場買，順便買咗西芹做零食，包西芹就一路睇 YouTube, 一路清咗，好飽的說。今晚似乎食得太多，聽日要努力做 Gym 了。

一個人

呢排個髮型好似開始失控，噚日一朝早就去咗剪頭，順便去睇吓有無乜嘢好啱買，再去 Fitness First 完成最後一次 Workout.


跟住又係搬嘢嘅時間，其實都搬得七七八八，係剩返啲濕碎嘢。所以都只係搬咗一轉，再响新屋度執吓嘢咁。

可能知道要轉換環境，有少少忐忑，瞓得唔係咁好，都勉強叫做瞓咗六個鐘。今日諗住要走三轉，所以一朝早就走咗一轉，因為都差不多食飯，所以順便煮埋飯。諗住只係簡簡單單咁蒸碟水蛋，但又覺得真係太簡單，於是就加咗啲菜入去，放入飯煲，開掣，咁返嚟就有得食。

第二轉，發現可以一次過執晒，所以決定向房東道別，交還鎖匙，閃人。返到新居，已經係一個鐘頭後嘅事，飯亦都已經煮好，隨時開得餐。

碟蒸水蛋因為頭先無準備到調味料，以為會好淡，但原來加咗啲菜，係好好味，可惜份量就少咗啲，下次可以加多隻蛋。啲飯就煮多咗，本來以為自己食半杯米就夠，於是就煮夠一杯，想夜晚嗰餐炒碟蛋妙飯咁。但係似乎半杯米唔太夠飽，於是就食晒成煲飯佢，下次煮夠佢一杯半先得。不過都好耐無食過飯，似乎作為華人，有飯氣到肚，感覺好滿足。


原本再諗住出去買少少嘢，點知發現原來唔太使買，就打消咗出去嘅念頭。於是就洗衫執嘢再晾衫。晾完衫，諗完夜晚食乜，就去超級市場買，點知呢度星期日係收四點，比起之前住嗰度早多一個鐘收，買唔到想買嘅嘢，就去啲舖仔𥄫吓。

似乎呢度住咗唔少波蘭人，都有唔少賣波蘭嘢嘅地方。其中一間睇睇吓，個凍櫃入面有餃子?! 問吓店員可以點煮，佢就拎咗包紅菜頭湯俾我，就煮好啲餃子，再將紅菜頭湯加熱後，倒入去啲餃子度就得。

於是返到屋企，就煮咗半包餃子，不過因為得一個煲，時間用多咗少少，不過尚算方便，但當然唔及餃子一丁快手。半包餃子有廿粒左右，好大嘅一碗，但對於鐘意食餃子嘅人嚟講，唔太難處理，係飽咗少少。味道方面就略嫌餃子䶢咗啲，紅菜頭湯係幾好味吓，不過紅菜頭湯好大包，有排都煮唔晒。


食完晚飯，就當然係欣賞吓黃昏嘅美景


正值月落之時，賞吓一道彎月亦係唔錯嘅選擇

善事

呢排公司有好多慈善活動，之前有個 Jeans for Genes, 跟住 Ice Bucket Challenge 又終於殺到嚟，啲 VP 同 Director 聽日會响停車場淋冰，跟住又有人話玩半馬捐錢俾 Orchid.

其中一個估一個玻璃樽入面有幾多粒 M&M 嘅遊戲，我估一係430粒, 一係480粒，最後估咗430粒。點知今日個揭曉嘅結果係470, 都話我無抽獎命，二揀一都揀咗個遠咁多嘅。

Anyway, 今日又開咗好多會，好似無乜點做過實事，略嫌生產力不足，究竟幾時先可以唔駛開咁多會?

感覺不爽中...

第六週

新嘅工作，無可避免地要 Build up 個 Credit, 但 Credit Build 得快亦 Burn 得快。踏入第六週，朝早俾人讚完，放工就因為上星期唔小心而出錯。只可以怪自己聽力出事，唯有再慢慢努力去 Build Credit.

食晏嗰陣去陣銀行改地址，因為業主係一位老人家，鐘意收支票，於是就順便 Order 埋本支票簿。食完晏，張糧單就派到埋嚟，都幾神奇吓，因為今個月返咗成個月工，糧係出多咗，但係稅就俾少咗，完全唔知發生乜事。睇嚟要再觀察多一個月，先摸得清件事係點。

搬屋

今日開始搬嘢，本來只係諗住搬一兩轉先，但係因為噚晚瞓得唔係咁好，無乜精神去做 Gym, 決定全日都搬屋。


第一次搬嘅係全景鏡，順便影埋間屋全景




因為諗住一個禮拜逐啲逐的咁搬，所以搬咗啲唔係日常會用嘅嘢先。除咗書之外，其中有一套係靚仔魔術師响唔同階段送嘅禮物。呢一套嘢係收到幅啤牌嗰一刻已經諗好點擺，今日終於呈現到出嚟。


跟住去附近搵吓有無啱嘅嘢買，但係就搵似乎無乜嘢啱使，最後決定去返 Kilburn 睇吓。Kilburn 始終都係買嘢嘅好地方，係除咗間 Gym 太臭之外，其實係好好住。買好嘢，又執一埋嘢過新居。

啲中型影相嘅道具都差唔多响晒度，等一切安頓好就可以開新 Project.


攪咗成日，火車差不多到，返去食個晚餐。

P.S. 呢排早咗天黑，之前到咗11點都未黑晒，依家去到9點已經差唔多黑晒，感覺上叫做正常返少少。

新居

過咗四個月，終於租到屋，今日去 Agent 度簽 Contract, 途中要轉搭巴士，等巴士嘅時候，見到 Nokia 嘅廣告，因為 Windows Phone 嘅情義結，最後影低咗落嚟


响巴士度，經過一間賭博公司，見到個幾攪笑嘅 Poster, 睇嚟曼聯今季依然不被睇好


其實今次都算好彩，因為去到 Agent 嘅 Office, 發現係一個迷你倉，一去到嘅時候，見唔到似地產公司嘅地方，唔通又俾人呃? 打個電話，原來地址係啱嘅，個迷你倉其實係兼營 Serviced Office. 好快女代理人就出嚟接我，唔個 Office 係幾細吓，細過我依家住緊間房，不過對一人公司嚟講剛剛好無浪費。

好快 Review 份約，有少少問題但好快就解決咗，之後就簽約，再去新屋度見業主。途中問佢間 Office 唔响街度，點搵客呢? 原來都開咗業好多年，主要做物業管理，最長嗰間屋佢攪咗廿五年。

好快就到咗新屋，業主依家交晒俾個仔 Andy 打理啲物業，因為只需要交電同市政稅，就同我講大概要點做。一切攪掂之後，就接過鎖匙送走 Andy.

對住個廳，真係幾舒服吓，廚房開放式有洗衣機有焗爐，但微波爐欠奉。


間房就擺咗張雙人床，不過似乎就無位擺書枱，睇嚟買都廢事了。洗手間亦都剛剛好。


窗外嘅風景，當然係一流


跟住就出咗去買日用品同煮食用品咁，買吓買吓都唔少嘢。咁啱 Virgin Media 擺 Booth, Sign-up 埋個 Broadband, 不過要三個禮拜後先有人上嚟裝，於是就俾咗少少 Credit, 等扣晒先再俾月費的說。

近黃昏，返咗依家住嘅嗰度煮咗少少嘢食，再搬多少少嘢去新屋，正好係日落時份


Check 過 CityMapper, 地鐵未有耐到，响新屋坐多陣，真係好享受，一個屬於自己嘅空間。


有一個星期嘅時間慢慢搬，可惜 Broadband 唔可以好快咁攪掂，Otherwise 可以响呢個 Long Weekend 搬好晒佢。