地從何來

建築師學會無耐之前向土拓署建議，將葵涌貨櫃碼頭設施遷至青衣或大嶼山西部。呢個建議，响中學嘅時候一位已故嘅物理老師亦題講過俾我哋聽。今日坐巴士嗰陣，沿三號幹線行，行咗十幾分鐘都仲係一大片貨櫃碼頭，咁究竟起到幾多屋呢?

葵涌貨櫃碼頭有279公頃嘅地，細過啟德少少，但啟德一早決定咗嚟起郵輪碼頭、體育城等，所以先得嗰三萬個單位咁大把。如果將貨櫃碼頭變成一個新市鎮，例如用一半地即係140公頃左右起屋，地積比率去到6，即係做到太古城咁，咁就有90,093,924呎建築面積起屋，以平均500呎一個單位，即係有180,187個單位，地區規劃、諮詢、起屋如果全部五年攪掂，施政報告起額完成啦! 以現時平均家庭人數2.9人計，就可以住522,544人。根據《香港規劃標準與準則》，用返葵青區嘅人口分佈推算，社區設施(學校、醫院之類)同康樂設施 (公園、運動塲、泳池之類)需要大約112公頃建築面積，當然唔係所有設施都可以以多層建築，即係用地嚟講，112公頃係 upper bound. 其餘幾十公傾，我諗要用嚟起晒路。

地區經濟方面，可以再參考太古城，樓上係住宅，樓下甚至地庫係商場，應該唔大問題，呢個模式，重可以吸收部份社區設施用地，例如警署、郵局、圖書館、社區服務中心等，加上大廈之間嘅平台可以做空中花園，又可以空出部份用地做其他事。連接去其他區嘅配套，可以靠地面嘅巴士，又或者叫地鐵起條東涌支線又得，反正東涌線已經有唔少轉車站。

五年後解決到五十幾萬人嘅居住需要，似乎可行，但做唔做，係另一件事。做嘅話，順勢起埋10號貨櫃碼頭又得，一舉兩得。

新春旺角行

去友人屋企拜年，離開後時間尚早，落信和行一行。皆因上次買唔到 Hunter x Hunter 嘅砌圖，之後又搵唔返間鋪，打算再碰吓運氣。

去信和前，先去兆萬打個轉，睇吓有乜潮物玩意，好多格仔鋪，間間都好似賣緊 Instax Mini, 重要有好多 Cutie 相紙揀，乜當今數碼年代，年輕人興玩 Analog 嘢? 完全摸不著頭腦，呢個係咪後現代社會中，物質世界同虛擬生活中嘅對比?

行完兆萬，見到有一個獵人週邊咁大把，幾百蚊價錢唔高，但公仔似乎唔吸引。閃! 入到信和，都係一堆格仔鋪，似乎唔多純動漫週邊鋪咁，賣手機週邊比較多，日劇鋪都好似唔覺眼添。潮物，係咪要重新定義呢?

行吓行吓，驚喜不多，有幾間有好多聖鬥士，都幾齊添，但出得太濫，好多都睇過就算。唯一想買嘅 Rare Item 係鋼鐵戰士組合一套，但大地同潮兩隻12xx, 翔一隻16xx?! 只好同佢哋道別。另一套 Rare Item 係暗黑聖依系列，唔睇價錢，只得冰河、紫龍同一輝，唔見咗另外兩位，又暗地裏說聲再見。

行到最頂最後幾間鋪，原本打定輸數，啊! 原來砌圖就係响最後呢間格仔鋪度! 但係已經唔係我想買嗰副。我想買嗰副係2011年前出嘅台製夜光砌圖，屬於全職獵人動畫重制前週邊，買少見少。問店員有無其他選擇，答案係無...

唯有再去其他鋪頭閒逛，有新發現! 有唔少獵人週邊，有枱布、手巾、記事簿、Mousepad 等等，2009年台製品，唔... 雖然幾十蚊有交易，但買咗嘅話應該唔會太捨得拆，大嘥咗啲，所以買咗個 Folder, 啤牌同埋海報，100蚊有找，唔使拆都有得睇。

落返樓下，其實有一檔平賣緊兩個日製獵人 Folder, 但係 2012 出品，唔值得買，因為所有 2011/12 年嘅獵人週邊，大部份都可以响 Yahoo Auction 搵到，可以慢慢 Bid.

註: 獵人週邊响 2011 年前係出奇地少，最出名係古拿比加條鎖鍊，但我唔太迷古拿比加，所以無買。我迷嘅係佢:

買咗好耐嘅超稀有品

每日一字 16

蛇年，英文 Year of Snake

Snake

Old English snaca, from Proto-Germanic *snakon (cf. Old Norse snakr "snake," Swedish snok, German Schnake "ring snake"), from PIE root *snag-, *sneg- "to crawl, creeping thing" (cf. Old Irish snaighim "to creep," Lithuanian snake "snail," Old High German snahhan "to creep"). In Modern English, gradually replacing serpent in popular use. Meaning "treacherous person" first recorded 1590 (cf. Old Church Slavonic gadu "reptile," gadinu "foul, hateful").

英文字通常有深淺之分，就好似 join 係淺字, participate 係深字，深字比人嘅感覺係高級。而呢啲高級字多數源於法國，而蛇嘅深字係 Serpent

c.1300, "limbless reptile," also "tempter in Gen. iii:1-5," from Old French sarpent, from Latin serpentem (nom. serpens) "snake," from prp. of serpere "to creep," from PIE *serp- (cf. Sanskrit sarpati "creeps," sarpah "serpent;" Greek herpein "to creep," herpeton "serpent;" Albanian garper "serpent").

不過 Serpent 呢隻字太高級，高級到上咗神枱，所以現代應用上剩係用响象徵性嘅義意，即係神話故事或者係圖案咁。至於點解叫 Year of Snake 唔叫 Year of Serpent, 呢啲約定俗成嘅嘢，無得解!

祝大家蛇年 事事順利 身體健康!

矛盾

前排睇 J2 台，日本原來有一輯叫《矛盾大對決》，精彩! 呢個世界無乜响網上面搵唔到嘅嘢，等唔切，搵到有台灣版本。

個節目專門搵啲做事做得極致而又係兩件矛盾事去比賽

• 豐胸達人去睇吓邊個女仔有帶 Nu Bra
• 種咗幾十年密瓜嘅農夫去分辨真假密瓜
• 鑽地機去鑽鋼板
• 拆樓嘅鐵球去拆擋土牆
• 攪拌機去攪碎柴魚
• 專業 Sniper 去射遙控直升機

矛盾，亦會响身邊發生，就例如之前提過嘅「超聲波低頻驅蟲機」同一個叫 Chromatic 嘅黑白廣告。近排友人搵到「CD 消磁機」，原理係印上 CD 嘅 Label 有少少成份係可以被磁化，影響音質。但係 CD 係光學數碼化，訊息可以有偏差但到最後都係 1 同 0, 讀取訊息嘅頭 (類似磁頭) 只收光學訊息，磁場對音質係無影響。覺得聲靚咗嘅，只係 Placebo Effect, 我覺得放隻 CD 去洗眼鏡嘅超聲波機嘅效果會好過部消磁機。

少數

同性維權鬧得熱烘烘，將睇光放遠啲，眾生生而皆平等，好多嘢無得選擇。例如性別、智慧、殘疾同埋種族。當年女權運動一樣鬧得熱烘烘，今天女仕們頂半邊天。

封建思想只會阻止社會前進，其實好多偉人都係少數：
伽利略 - 天文學家，因為支持《日心論》而被宗教迫害

愛因斯坦 - 《雙對論》作者，三歲先識講嘢

Alan Turing - 當今電腦源於 Turing Machine 同 Halting Problem, 無佢嘅話，咩 Windows, iPhone, Android 係唔會存在。另外有 Turing Test 去定義咩係 AI. 因為同性戀而被英國警方拘捕

Ada - 數學家而且係被認為第一位寫電腦程式嘅人，有 Programming Language　以 Ada 作為致敬，係一位女仕

John Nash - 因 Game Theory 得到諾貝爾獎，故事被拍成《有你終身美麗》，係一位精神分裂症患者

霍金 - 《時間簡史》作者，肌肉萎縮性側索硬化症患者

唔係話少數個個都係天才、大科學家，而係少數可以帶俾大家新嘅思維。 試諗吓如果因為歧視而無俾佢哋一個公平嘅機會，科技可能會落後幾百年。

C Allstar 嘅《少數》，有一段係咁:

要是有天 對調你倆位置演
你又會否 和異數說地說天

黃偉文填詞，係呀，詞係為同性維權而寫嘅。

重生

部手機由高處跌咗落地，本來諗任無乜嘢，因為都跌過幾次，好 Robust, 無事。但再睇個 Screen, 全無反應，心裡一沈，爛咗?! 過唔到新年乎?

駁落電腦，又有反應，似乎只係個 Touch Screen 裂咗。拎去整又費時失事，上網睇吓，YouTube 有教點換，但無講邊樹有得賣，搵吓搵吓，原來香港有得郵購。二話不說，訂好，再去鴨記買星批。

於是新年就去咗電腦城買 SIM Card Adapter, 將細 SIM Card 裝返上部舊 Android 機度。可能用唔慣，感覺唔太方便，唯一可取嘅係個實體 Keyboard.

今日 Touch Screen 到手，好似少咗條線，個 Feel 好唔可靠，Anyway, 換好，無反應?! 插埋 USB 都無反應，奇怪，唔通真係條線出事? 唔理住，攪其他嘢。突然個 Screen 著咗，原來唔夠電啫!

至於少咗嗰條線，另一段片話係 Proximity Sensor, 遲 D 要响舊 Screen 拆出嚟再裝返。

煙火短評

香港台北各有千秋，只係香港無咗國金之後，完全向橫發展，時間亦都長好多，台北就向高發展，但爆幾吓就無晒。

P.S.: 有人唔鐘意煙火呢個詞，煙火同煙花都係 Fireworks. 我個人理解係，一枝箭標出嚟，再爆一顆大嘅花咪煙花囉! 一條條咁噴出嚟就算嗰D咪煙火囉!

夕陽無限好@海怡半島

今年又係除夕影日落，南區似乎依然係首選，數碼港同淺水灣都去過幾次，赤柱個景又不太喜歡。去 Google Map 睇吓，原來有一個遠在天邊近在眼前嘅地方: 海怡半島。一個唔陌生嘅地方，中學時代有同學响度住，學車嗰陣亦都成日去，但自從考完車之後都無再踏足過。

海怡半島其中一個勝過其他南區嘅地方，係唔使轉車，一程90B大概九個字就到。記得頭一兩次有次响數碼港影夜咗，唔識搭車返屋企，最後要搭車去銅鑼灣再轉車...

有唔少好位，揀咗個多啲嘢睇嘅位，Set 好 AutoMate, Set 好部相機，效果唔錯。

 

影 time lapse 嘅同時，亦都影吓全景，影吓東又影吓西咁。

日落西山，又係時候返歸，又係90B一程車，輕輕鬆鬆幾個鐘攪掂!

本末倒置2

警察唔俾元旦遊行擺街站，話街站阻塞通道，令遊行隊伍無發暢順完成云云。

咁多年嚟，我都只係聽過警察唔開行車線，又或者警察攔住遊行隊伍唔俾過馬路，又或者要參與集會嘅人兜到無雷公咁遠入會場，攪到入又入唔到，出又出到好似便秘咁，行到天黑都未行完。

用咁多心機去攪小動作，不如用個腦去諗吓點去協助主辦單位用最少嘅時間完成件事。市民快快脆脆行完你咪又係早啲收工!

又係我?

相當哽耳，亦都估唔到係出自一位師弟口，皆因當時嘅中學校長係唔鐘意呢句，响佢面前講，應該會一巴星埋嚟。呢位校長鼓勵學生講「等我嚟!」

時移世易，校長老早退休，雖然對呢位校長好感不大，但我好似又真係無乜點講過「又係我?」就當我俾佢洗咗腦吧! 出現咗講呢一句嘅師弟，第一個感覺係失禮。嚟一個訓示係必然嘅，否則他日必有惡果。

高下立見

一位法國啟蒙時代的思想家、哲學家、文學家說過:

I disapprove of what you say, but I will defend to the death your right to say it.

一位香港的大律師在 2004 年引用過:

他雖然不能接受示威者的意見，但願意犧牲自己的性命去保護抗議者的言論自由，「我將用一生來捍衛這種權利。」

一位蜚聲國際的荷里活演員、大導演在 2012 年說過:

應該限制港人遊行權利，規定什麼可以遊行，什麼不能遊行。

這說明了為何要讀書。

最低工資

中電
2011年: 4.9%
2012年: 5.9%
合共: 11.1%

港燈
2011年: 6.3%
2012年: 3.9%
合共: 10.0%

大老山隧道
11.1%

九巴
2011年: 3.6%
2012年: 8.5%?
合共: 12.4%?

最低工資: 7.1%

免費電視的二三事

無線同亞視話反對發出新嘅免貴牌照，話規管不公云云。人家自己鋪線入屋，你就將獨享頻譜。你要政府對新加入者一視同仁，咁不如過幾年你放棄使用頻譜，交返俾政府，再公開競投囉，最公平公正。

你又唔會出唔起啫!

Field Test

同事話由公司跑返屋企，劃咗條跑市區馬路嘅路線，我就建議不如上半山。一來無咁多紅綠燈，二來寶雲道一向都多人跑。不過，最麻煩就係要搵條無咁斜嘅路上山。講得出，就當然要試吓，反正今日要做Gym, 一於半程截返。

一開始，上水坑口街，都幾還好，之後荷里活邊微斜，少少辛苦。但上依利近街開始就出事，全程一段斜路一段平路，直至羅便臣道，但已經完全無氣，入寶雲徑開始落斜，所謂上山容易落山難，斜度太驚人喇! 最終紅灣仔峽邊落返皇后大道東後，全平路，半跑半行去Gym.

下次試吓唔上咁高，跑堅尼地道。

View Mid-Level Trail in a larger map

那誰... 在付鈔?

今日睇報紙，講中電將「剩餘燃煤機組發電並售予內地」，原來「中電目前供應本港的電力主要來自核電及天然氣發電，煤電主要供應內地。」

咁即係，污染物就留响香港，跟手賣電俾內地賺錢? 用天燃氣就係想減少香港嘅污染物同二氧化碳嘅排放，咁家陣咁做有咩意思呢? 將香港嘅資源，賣俾大陸，咁同水貨客有乜分別?

誠意

Submit 咗張 Web Form 俾 Netvigator 話要 Cut Service. 經過幾日無聊嘅 Confirm 話要 Cut 嘅 Email，今日終於肯打電話嚟。

真係唔打都好地地，唔夠兩句就問我有無諗過留住條專享線，都痴孖筋，你成日話人哋係條水喉係共享又如何啫? 實際上人家快又快過你，平又平過你，你自己又唔鋪光纖，明係趕客㗎啦! 離開嘅原來咪就係又慢又貴囉，係都要人勞氣，你留客都俾少少誠意我吖...

跟住，佢話會寄返張 Form 俾我去 Cut, 竟然問我 Confirm 個地址，家陣咩年代呀? 整張 PDF Form 唔係好難啫，你個 Service 係 Enable 當今嘅生活模式，攪咁多嘢我都係 Cut 㗎啦，何必浪費紙張?

再見 Netvigator

用咗 Netvigator 好多年，服務水平 OK. 但係，當佢宣傳自己全港九乘光纖，又遲遲入唔到自己間屋，係時候 Say Goodbye.

話說原來俾開近200蚊月費俾6Mb, 今年幾個月前佢打過嚟，話要加到二百幾一個月，我話要諗諗。其實都唔駛點諗，要搵過間，3G 上網睇過但有5G 限制，HKBB, 3 都話無 Coverage. 上個禮拜五去旺角睇 Lumia 920, 途經西洋菜街，一掃之下，乜原來有線都有光纖，一問之下，又有 Coverage.

安裝費300個大洋，99 一個月 50Mb, 兩年約，似乎係唔錯嘅選擇。登記好，核對埋個人資料，佢話當晚嚟裝，睇完手機，返屋企等裝。坐車途中，再睇吓其他用家 Comments, 似乎無乜意外。但𠴱晚，無人嚟，不過都係預其之中，個 Sales 話九點半到，俾我係師傅都唔彩你啦!

第二日打俾 Sales, 約星期一裝，CS 打嚟再 Confirm 好時間。九點半上到嚟，搵天線位裝，好以用嘅，就似乎得間房個天線位可以用。母親大人問可唔可以換埋另一個天線位，最後全屋嘅天線位就差唔多換晒。最後攪咗一個鐘，Set 起個 Router, 效果唔錯!

聽日要做大導演: Cut!

後記:  九倉遲 D 又會鋪光纖入大廈，我係咪要同 Netvigator 講永別貼切少少?

畫版

好鐘意畫嘢，但通常亂畫多。有時要講解一 D 瑣碎嘅時候，又唔想特登搵將紙去解。所以一版白版係 Office 入面唔少得嘅工具。但呢排落客度做嘢，無咗白版畫，周身唔自在。

之前上網搵過 D Dry Erase 嘅文具，搵搵吓，原來雖然都係透明膠，但 PC 膠版係可以當白版用，而亞加力膠版唔得。今日食晏嗰陣見到間造廣告燈箱嘅舖頭，一塊 A4 紙大細嘅 PC 膠版只係廿蚊雞，買嚟試吓無妨。再過兩個街口買枝白版用嘅筆，效果 OK, 係擦嗰陣要大力少少。

Multimedian

好耐未玩過 Video Editing, 平時都係用 Avidemux 去做簡單嘅 Authoring. 重裝 Windows 後，順手裝咗套 Master Collection, 發現自己嚴重脫節。好彩呢個年代有 YouTube, 睇咗幾段片，大概上手。不過，真係好嘥時間，三分鐘嘅片攪咗三個鐘...

Reinstall

有日，唔知中咗乜嘢毒，Start Menu 嘅嘢無晒，過咗一輪用 Command Line 嘅日子，今個禮拜決定重新裝過部機。

第一樣要解決嘅問題，係部 DVD 機係虧嘅，所以要買過部，眼見 Blu-ray 一隻碟有 25 GB, 所以買咗部 BD Writer.

第二件事就係覺得 2GB RAM 唔太夠用，話晒都用咗 3 年，呢排覺得唔太夠駛，所以既然買開，唔爭在買多 2GB RAM.

第一晚，手術開始，因為幾個月前買咗隻 2TB 嘅 HDD, 所以有隻 500 GB 嘅多咗出嚟，一於將隻 250 GB 嘅 Data 一次過搬，順便當係 Backup.

第二晚，裝機，裝機途中用部 Notebook 搵齊 Driver, 等... 噢， Windows 7 SP1 內置 Display Card, Sound Card Driver 唔奇，連 TV Tuner 嘅 Driver 都有，實在對我太好!

第三晚，响黃金買咗 2GB RAM, 本來諗住買二手嘅，但原來重有一手 DDR2 賣，貴就貴咗啲，滿心歡喜返到屋企，乜部機唔著? 抆完又插，最後起得返，有驚無險。裝 FF, MSN, ICQ, 回復 Online 狀態。

第四晚，裝 Office, Adobe CS, 原本諗住唔裝 PPStream, 但似乎又無乜好嘅 Alternatives 唔駛裝嘢，何況 Weekend 無火影、One Piece 點得呢? 要裝嘅，點都要裝，100% Recovery.

一切安頓好，原來，部機可以爽咁多!