偵探伽利略

好耐無睇過日劇，呢一齣，正!

第一次 - 公開演講

聽日，就係第一次對街外人講 Talk. 壓力好大，希望無意外!

氣管炎

一次傷風，又開始不停地咳，今次搵咗個專科睇，話係氣管炎，有收縮嘅情況。診金都要差唔多成千蚊，好貴，但希望可以治得到，起碼星期一唔好出事先。

shaneng.net 第一擊 - 相薄

6GB 幾嘅相，終於 upload 晒，但 video 係一個頭痛嘅題目...
http://gallery.shaneng.net/

KCOBA Gathering @ 20080108

Go to gallery

休憩空間

响新聞度聽到政府官員响立法會講休「恬」空間，惡夢... 正字人去咗邊?

比香港更先進

如果香港肯跟部份大陸政策，就真係天佑香港。

小學聚會

好耐無見過一班小學同學，好明顯，我係局外人，因為佢哋聚嘅次數都幾密。有好多人都變晒樣，肥變瘦、瘦變肥，但性格不變，豪爽嘅繼續豪，文靜嘅繼續靜。

有朋自遠方來，不亦樂乎? 感覺好舒服!

歐型傷風

臨離開希臘嗰陣中招，返到嚟香港病發...

2007 回顧

排名不分先後:
- 開始著唔同嘅衫去成為一個 manager
- 公司搬 Office
- 公司制度改變，加薪之餘亦加辛，亦要開始睇錢
- 公司開始成為 Microsoft partner, 是福不是禍，是禍檔不過?
- 為馬拉松做好準備
- 做 gym 而整傷眼
- 總投資回報約 32% (股票: 35%, 基金: 32%, MPF: 22%), MPF 真係幾差吓... 希望轉咗宏利後可以好 D
- 第一次睇棟篤笑
- 第一次旅行
- 第一次去哈囉喂
- 第一次做負離子
- 買咗好多 gadgets
- 考咗車牌
- 飲咗好多餐
- 買咗 shaneng.net

雅典行 - 後記

洗費 - 只係用咗 37.6 Euro. local tour 唔洗俾 tips, 只係買咗 D 小食，出街食咗幾次飯，搭咗一程的士。成個 trip 都只係 15K 多少少

煙 - 週街都有人食，餐廳都有，一個煙霧瀰漫嘅麥當勞係好得人驚

假期 - 酒店位於嘅商店街，到埗日可能放假，無乜人，但隔咗一晚後，熱鬧非常

食物 - 完全偏咸，亦都未識欣賞 D 芝士同檻欖，但檻欖嘅薯條唔錯

文字 - 基本上唔陌生，都係 alpha, beta 之類，但有部份唔識讀，就真係唔知乜嚟。但識讀嗰 D, 就會知英文好多字都同希臘文相通或相類似，有意思想去學

交通 - 路面好塞亦好 sucks. 下次要試吓搭地鐵

Graffiti - 週街都係，好難想像响香港會有

天氣 - 落兩嗰陣真係好凍，影相要帶手套

酒店 - 帶漏咗個 USB 同帶錯 Adapter, 好彩酒店有，不枉俾咗錢揀間好少少嘅酒店，但 book 房嗰陣，一定要 non-smoker 嘅 graffiti room. 真係好靚!

行李 - 無論帶幾少嘢，以後都唔會剩係帶背囊旅遊，揹住咁多嘢遊機場唔係一件好事

行程 - 太過緊密，多留一日會更好，但一早安排好晒，全程唔洗太用腦，幾 ok

計劃 - 一定會再去!

雅典行 - Home Sweet Home

响的士上面瞓咗一陣，就到機場。Check-in 排陽嗰陣，發現類似劉德華嘅人出現响螢幕，真係人有相似，希臘都見到劉華上鏡!

Check-in 之後打咗一陣機，食緊個番茄時，見到噚日同枱食飯嘅兩個女仔，打咗個招呼，日本女仔可能留多幾日，臨別影咗張相就走咗，意大利女仔同我傾咗陣計就去咗入閘。一切準備好，我都要入閘，但一等再等，無人嗌入閘，唔通要 delay?! 的確，咁就無端端 delay 咗 45 分鐘先起機。

到咗 Zurich, 未知邊度入閘，求其入一個等。半個鐘後，嘩! 乜要去到咁遠... 要搭無人駕駛例車去另一邊。又等一輪夠鐘上機，上到機，無嚟嗰陣咁爆，我隔籬個婆婆仲走去第二個位坐，掂! 食完個餐，竟然可以一氣呵成瞓到五個鐘，實在是太好了! 之後再斷斷續續瞓多三個鐘，又夠鐘起身食嘢。

食嘢之前發咗一個怪夢，就係 somehow 架機要停响其他機場，點知架機降落後壞咗，話唔知邊個邊個無熄電子儀器。我心諗，好似無人廣播過話架機要降落，有人開 mp3 聽歌之後瞓著唔奇，我竟然走去同空姐理論，無得怪任何人之類。到最後，我係收到罰款單，被其他人勸籲後雙方都冷靜，空姐話只係一時之氣，會取消罰款，我都提咗 D 建議，之後就醒咗。

食完嘢，婆婆返返嚟坐，我本來想睇埋套戲，但睇完之前，就已經要準備降落，被迫腰斬。婆婆開咗窗，我就睇吓雲境，真係好靚，可以唔可以影相。

落咗機，見到落暇，感覺好舒服，為旅程變得更圓滿地結束!

雅典行 - 尋找女神

相薄

到咗幾日，都未影過雅典娜嘅神像，下晝就要上機，已經無時間去博物館參觀。靚女導遊講過，市中心有幾幢建築物，其中一幢有神像，而附近市議會响每一個鐘都會有個軍人換班儀式。

瞓嘅時間唔多，夜晚整理好 D 相後，都差唔多12點，諗住會瞓到10點左右，但7點就己經醒咗，寫吓 blog 攪吓攪吓，差唔多10點，又有少少倦意，決定瞓多陣，十一點出發。

行吓行吓，弊! 當失路添，問人，竟然無人知市議會响邊?! 差唔多12點，見到神像，但睇睇巴士站嘅地圖，離市議會仲有一段距離，唔爭在影吓相先。

影吓影吓，又半個鐘，差唔多去市議會，好多人圍住，乜事? 原來係步操儀式，無乜大特別。影吓其他嘢先，咦?! 突然三個人出現?! 唔通，換班儀式開始?! 死火，video cam 無電，可以... 相機!!! 好彩成個儀式唔係太長，錄得到，Lucky!

早上嘅旅程總算順利，搭的士返酒店，但上咗車之後，司機先話唔知間酒店响邊... 無地址添，唯有大家靠估... 食完 lunch, 接我去機場嘅的士到咗，打道回府!

雅典行 - 夜遊自由行

相簿

雅典好似香港，係一個不夜城。去完 Delphi 食咗少少嘢，又唔係太瞓得著，決定响酒店附近行一趟，九點幾依然唔少人响街玩緊。最主要目的，當然唔係體驗夜生活，而係影巴特農神殿，影到一張已經威威食雞，响無腳架嘅情況下影夜景，都夠高難度。

好，影完，目標達到，週圍行吓，穿過舊城區嘅橫街，走入大馬路，唔少嘅 graffiti. 影咗幾張，但唔敢開閃光燈，唔想話俾全世界聽有個遊客响度，始終唔係太安全。

行吓行吓，返到酒店附近，去唔去市中心好呢? 唔好喇，都係早 D 瞓，應付聽日 20 個鐘嘅旅程。

雅典行 - 衝出雅典

相簿

Join 咗另一個 local tour 去 Delphi 睇阿波羅神殿。又係晨早起身，今日係自動醒，morning call 未就醒咗，但今日狀態應該唔係咁好。

上到旅遊巴，咦?! 又係之前個靚女導遊，應該 OK. 座咗兩個鐘車左右，到達 Delphi 附近嘅村仔 Parnassia, 好多紅色屋仔，依山而建，好靚。

去到 Delphi, 又聽導遊講一輪故仔，到影相時間，但得半個鐘影。嘩! 成個遺蹟都唔細，半個鐘由山腰到山頂再走返去山下面博物館集合，真係趕過打12宮。都好彩，影得晒，係出晒汗啫，同埋又唔夠瞓，頭痛開始。

睇埋博物館，掛住影相，已經無留心到 D 故仔講乜。差唔多三點，又攰、又餓、又眼瞓，終於去食晏。噢... 又係希臘菜，cheese pie + 大件雞飯，依然唔係太欣賞 cheese pie, 但大件雞飯都叫 ok. 同兩位女士同枱食飯，一個意大利人，一個日本人，傾咗一陣，感覺良好。

回程，頭痛依然，但已經瞓唔著，唯有打機是也。

雅典行 - 搵笨夜遊

相簿

夜晚七點幾，差唔多落大堂，但一等就等咗半個鐘先有人接應，心知不妙。中途再接其他客人，有人遲到發老脾，個導遊仲同佢一齊嗌交...

跟住去咗海邊城鎮，但不設落車影相，得個睇字，有景無得影...

返去舊城區食飯，係本地菜，超咸嘅小食 + 超濃嘅 cheese pie + 超大份嘅大件雞飯 + 雪糕，仲要坐响個表演台前面，跳舞都唔知跳咗幾多塵落嚟...

一路食一路睇表演，略嫌悶。上咗兩次台玩，都 ok. 但後悔無叫人幫我錄低...

返到酒店，差不多一點，攪呢攪路一點半先有得瞓，但第二日要七點前起身，大鑊...

雅典行 - 走馬看花

相簿

雅典，太多名勝古蹟，個朝早無可能睇得晒，個 package 就係包咗一個 local tour, night tour 就自己俾錢。

一朝早起，落住雨，無乜期望，但靚女導遊喎，聽吓都好，都有唔少故仔。雖然部份都聽過，但係靚女 present 係唔同 D. 去咗舊奧運場館、宙斯殿、同巴特農神殿一帶，聽完故仔，城市簡介，就係影相時間。

下晝本來想去市中心同舊城區一逛，但實在大攰，力不從心，整醒自己之後都無精神出發，最後就留咗响酒店房睇 heroes...

Athens Trip

Go to gallery

雅典行 - 到埗

相簿

第一次搭卜夜機，就搭咗十幾個鐘飛機，但感覺比想像嘅好好多，起碼瞓得到幾個鐘。
見聞一: 瑞士都有賣 HTC Touch Dual 嘅廣告
見聞二: 雅典機場俾 HSBC 攻佔
見聞三: 用 EU 國家護照入境唔駛排長龍打印
見聞四: 週街都係 Graffiti, 連酒店都有 Graffiti Room. 但係無晒 non-smoker room, 嘥晒...
見聞五: 週街都有白鴿
見聞六: 雅典都有孖人牌?!

自己的一個家

終於，將 shaneng.net 買咗落嚟。網頁籌備中...