鄭氏夫婦新婚，嚟歐洲渡蜜月，約咗 Weekend 飯局。訂咗英航，諗住用嚟希斯路機場，唔使浪費時間响交通度，點知臨出發前三日，取消咗回程班機，話羅馬嗰邊因為機場失火所以被要求取消的說。但失火係對上一個星期嘅事，乜唔係應該當刻就知要取消咩? 做乜三日前先話俾乘客知?
退票唔係 Option，打去 Hotline, 就只可以轉去其他機場，一個最唔想嘅答案，回程要深夜到 Gatwick 機場，呢鑊一定要 Claim 返個支出。攪掂張機票，因為起飛城市轉咗做拿坡里，重要睇吓點由羅馬過去。一切安排好，星期五早少少瞓再出發。
四點鐘起身，按照劇本搭十出門，五點半到機場 Check-in, 搭七點嘅飛機，但係班機 Delay 咗半個鐘，出晒事。起飛之後，派咗個簡單嘅三文治早餐，食完就瞓，不過個位似乎唔太好瞓，感覺有啲怪。
落機之後就搭機場快線出市中心，個機場快線無乜冷氣，焗咗半個鐘之餘，發現唔記得買車飛嗰陣要找錢，有一歐羅留咗响部售票機... 去市中心後，再轉地鐵去許願池。比原定時間遲咗四個字，好彩最後都見到對新人。上次嚟囉馬嗰陣同班團友誤打誤撞响許願池附近搵到間當地一個家庭開嘅餐廳，啲團友覺得合格，而且環境唔差，於是今次就走過嚟食 Lunch. 不過因為係誤打誤撞，所以唔太認得路，好彩經大神指點，搵得返間餐廳。
坐底之後，點咗個寬條麵，一個薄餅，同一個意粉，因為未係太多人，所以好快就上菜。一路食一路傾，食得差不多之際，出面落大雨，餐廳亦都開始多人，啲雨落得太誇張，都係傾多陣。雨細咗，埋單走人，去返許願池同鄭氏伉儷道別，搭地鐵返火車站。
要買飛搭火車去拿坡里，重有九個字時間當早，去麥記買咗杯奶昔之後响火車站週圍逛，行行吓都已經差不多。上火車之後大概一個鐘嘅車程，落車之後，先問咗警察哥哥點去機場，收集好情報後，就出發去考古博物館，可逗留時間為兩個鐘左右。
最快嘅方法係搭二號線地鐵，落到地鐵月台，無冷氣，好焗。等咗十分鐘先有車，一樣係無冷氣，好彩只係搭一個站，不過去博物館重有一段路要行，但都好過焗响地鐵入面。
地下嗰層係我鐘意睇嘅石像，有雅典娜
大力神
同子大坐嘅藝術品
之後闖咗入去收藏展品嘅地方
呢個好有 Feel
原來呢度第二層係龐貝古城嘅展覧區，一上到去，有個展品係十二點半前先開放，係古城嘅模型，暫時只可以遠觀
展品目不暇給，可惜時間唔夠，只可以走馬看花
去返地下睇完其他石像，覺得心有不甘，見有少少時間剩，於是又走返上去，趁無人見到，違規地去影多兩張相，跟住就閃人了
時間充裕，返到火車站，行去搭機場巴士之際，見到「好叉多」超市，睇真啲，係「好又多」先啱。所謂差之毫里謬之千里，差一點，差好遠。
跟手見到原來火車站有間麥記，睇睇時間，又差不多係晚餐時間，班機九點先開，即係差不多十點先至會派分三文治做晚餐，之後返屋企又要最少成個鐘，於是就去買咗個麥樂雞餐。呢度嘅沙律，係派橄欖油、檸檬汁、同埋鹽，本來剩係諗住落橄欖油，但食落怪怪哋咁，於是就落埋檸檬汁，都係怪怪哋，但唔想落鹽，最後就生吞咗客啲味怪怪哋嘅沙律。
吃飽後，繼續去搵機場巴士，因為得張廿蚊歐羅，費事上到巴士買飛無得找，就去咗附近賣手機配件嘅舖頭買車飛，反正比上巴士買車飛平一歐羅。之後無耐，巴士就到咗，車程亦只不過係十幾分鐘左右，係唔知點解大神話要差不多成個鐘。
Check-in, 入閘，走去候機室嗰陣，忍唔住買咗杯意大利雪糕
去到候機室，已經要上機，好快咁搵到個位坐定定等起飛
因為向北飛，於是由起飛到降落，都係處於黃昏嘅狀態
落機出境，等咗半個鐘，架的士先到，重要响個停車場塞咗陣車。同個司機傾傾吓，原來佢之前响醫院車過我返屋企，咁就得喇，可以响車度小睡咗片刻，舒服過响飛機瞓。返到屋企，已經過咗一點，廿二小時旅程就咁作結。
P.S.: 十隻黑豬俾英航，之後會盡量避免
