將行李交低咗俾 Reception, 就揹住個背囊出發
去到地鐵站換飛，原本有班10點鐘嘅快車，但係前面排隊嗰個攪咗好耐，換唔到飛。還好，有少少時間買個三文治做早餐。買完三文治，站務員話可以响車上面食嘢，咁就可以上車了。
由富山出發嘅，多數都係遊客
電車 Go!
開車喇! 沿途風景唔錯
路線以單軌行駛，係有對頭車先見到另一條軌
接近立山，天色開始轉為陰天
到立山火車站了
首先要排隊上登山䌫車
因為太斜，所以架䌫車唔係長方形，係平行四邊形，
雖然唔係排第一，但係神奇地無人企車頭，於是我就唔客氣了，雖然無乜特別嘅風景
䌫車到達嘅係美女平，如果好天嘅話，應該有啲嘢睇嘅，但陰天嚟講，出面白濛濛，無乜嘢好睇，未係想即刻去室堂，於是就去彌陀原睇吓，不過等車要等耐啲
巴士沿途都係呢啲天氣，似乎已經入咗雲層入面，聽聞有一個瀑布，但因為乜都睇唔到，巴士無停到俾我哋影相
去到彌陀原，要講低想邊班車走，等佢哋安排美女平嘅車留位
彌陀原其實已經有啲小雪牆
由於太大雪嘅關係，有啲行山路徑已經封咗，但可以照行上山嘅，不過就辛苦少少
上咗山抖咗一陣，就返返落嚟車站，又有一陣霧氣來襲
彌陀原嘅飯店，呢一刻似乎唔係咁好住
有巴士到喇! 雖然唔係我剛剛留位嗰班車，但係架車有位，可以上去。跟住架車越近室堂，就越好天氣
响車度有少少餓，就食咗包噚晚買嘅零食。
到喇! 到喇! 好多人呀!
因為氣壓問題，啲包裝都脹晒
跟住就週圍行了，去到雪之回廊，又係一個小雪牆，無人，影相好地方，但無人... 我要搵人幫我影呀!!! 好彩地，有人經過
行咗一個圈，去拎份禮物先，响 http://www.jrtateyama.com/tc/ 填完問卷就可以攞
好，係時候出去大雪牆了，有啲所謂嘅通行証，鐘意可以攞張留念
出到嚟，但係去雪牆嘅方向好多人!
返轉頭，睇吓有乜睇先，有一段去溫泉酒店嘅路，風景好好
只係條路難行，純雪地、高山、大太陽，即係耗體力、缺氧、好熱，加埋件黑色衫，重要揹住個大背囊
靚相得來不易呀
體力有少少不繼，因為都有一段路，唔想行過去溫泉酒店，打道回府。再遇見人羣，返到嚟大本營，不得不影相留念。
可惜過咗午飯時間，其實只係兩點半，日本人好早食午飯，所以一點半左右，餐廳直接唔再接客，於是就無午餐供應，只好去小食店買碗菜湯。
雪牆入口開放到三點，可以 Check-in 之得再嚟，應該少人啲
Check-in 嗰陣，因為一定係 Book 兩人房，但我又得一個人，酒店話 Agent 會收 Cancellation Fee, 幫我打咗個電話俾個 Agent 睇吓點安排。原來只係無得 Refund 咁解，反正預咗，對我無影響。
接待員介紹咗今日有詳節目，包括五點嘅雪之大谷遊同埋夜晚嘅幻燈片加觀星遊，重有個日出團，但係晨咁早四點，免了。
跟住又問我想咩晚餐，有日式同西式，咁梗係日式，有咩唔食? 傻啦! 嚟到就梗係乜都食!
接待員妹妹講解得好詳細，用咗唔少時間，終於可以放低個背囊，一身鬆晒!
再度向雪牆出發，人比剛才少
搵到個位可以影相
其實唔少人，只係有啲時間同地方空咗出嚟
行到好攰，返房抖抖。有 Wifi 使用方法，有優惠券，有折呀! 早知唔咁早買明信片... 重有剛剛接待員妹妹介紹嘅活動行程。
休息咗一陣，係時候雪山大谷遊。原來酒店可以免費借雪靴，之前因為啲雪太鬆，踩咗半隻腳入雪，好凍，都係換返對雪靴先!
因為基本上要落山嘅人都走晒，所以參加雪山大谷遊嘅都係酒店住客，啲圍欄亦都開始收埋。跟住，就梗係行响頭位影風景。
影完相，因為對雪靴太細，好快咁返咗酒店。
可能夜晚會太風，啲直立嘅標示都要打橫放
開天闢地嘅鏟雪車，叫做立山熊太郎，已經去到第四代了
無人嘅大堂，同下晝人山人海嘅情景有天淵之別
响 Lobby 度𠾍影一返
好快就到食晚飯嘅時間，因為唔識睇日文，所以有英文 Menu, 個侍應續道菜介紹
好豐富，食完一道，又上一道，雖然有生嘢，但衛生方面信得過，所以都食咗落肚，口感無乜特別，都係肉一舊，有少少滑潺潺，唔太習慣，唔難食嘅。啲熟食就好好味，不過份量略嫌太大，去到近十成飽。
未食完，重爭個甜品，但係出面個日落景太靚啦，唯有話俾個侍應知 I will be back. 原來 Lobby 位已經好多人响窗邊影緊喇! 好彩趕得切，開咗隻窗，快門就閃個不停，近景、遠景、雲海、雪景，影到最後一度陽光。
影飽後，係時候食飯後甜品，類似糯米滋嘅物體，總之好好食
日落西山，天色開始黑
跟住又返房，究竟點解件和服係一藍一粉呢?
八點半左右，有個幻燈片講座，講返立山黑部嘅氣候、環境、點樣開山等等
之後就有觀星團，呢張相係長時間曝光影出嚟，因為月圓之夜，有好大個月亮，好光，影到好似日頭咁
支超廣角鏡除咗超廣角，個光圈亦都好大，都幾食光吓
個腳架 Pack 咗响大行李去緊東京，所以求其搵支柱綁住部相機嚟影
不少得嘅係酒店加星空
因為山上氣壓較低，所以沸點唔係100度
返到酒店，好暖，返到房，好熱，真係好熱，打俾接待處，佢話係中央暖氣，無得較細佢，叫我開窗喎... 呢個暖氣，係酒店嘅唯一敗筆。
睇嚟睇去，都唔明句英文點解，係指可以酙落水樽，所以 portable?
是日嘅行程實在太豐富了，係相機大豐收日。
.jpg)
No comments:
Post a Comment