話說 JR 有一張立山黑部嘅套票，由富山去到長野，都只係9000個大洋，於是 Check-out 之後，就去咗新宿車站買飛。本來係好傻仔咁去旅客中心度問有無得賣，點知原來係去 JR 嘅售票處買，買完飛之後，手裏面就多咗一疊紙，包括車飛、簡介、時間表、用法。簡介放返响售票處度，時間表入衫袋，車飛入銀包、用法入另一個衫袋，買完飛，就要解決另一件事。
話說可能行得太多嘅關係，條牛仔褲嘅內則穿晒窿，買嘢嘅機會嚟喇飛雲，於是就去咗附近嘅無印良品，求其執咗條褲走。
雖然未好係 Lunch time, 但去富山程車都幾個鐘，於是就食咗個飯先
中途响大宮轉車搭新幹線，因為坐早咗一班車，所以比原定計劃早咗成個鐘到大宮，於是就响車站週圍行。有間賣甜品嘅鋪頭，見到排到長長嘅人龍，又一個人只可以買一打嘅芝士撻，見無聊，我又買返件試吓。好食嘅，但又不致於是排長龍咁好味。
搭新幹線，見到入車飛個指示有少少持別，於是就問咗個票務員點入先啱，佢話兩張飛疊埋一齊入閘就得。好神奇地，新幹線張飛打咗窿，另一張飛就打咗印。
架火車到咗，今次坐預留席，好舒服地獨覇一行。
到咗富山市，上到嚟先落雨，唔通連個天都唔鐘意我? 好彩間酒店响正火車站嘅對面，懶得開遮，總之一綠公仔就衝過去。
去到酒店，房號係1111, 第一次住啲咁特別嘅號碼，個接待員話換咗間大少少嘅房俾我，太好了，房大唔係問題。上到11樓一開道門，間房真係大咗少少，基本上隨咗 Airbnb 同人成間 Apartment 租嚟住之外，都無請過住咁大間房，而且只係700蚊港紙一晚，真係好抵。窗外雖然係落緊雨，但景觀亦不俗。
因為落雨，都唔想週圍走，但係為咗打聽吓張立山黑部套點用，於是就去咗富山地鐵站問。富山地鐵，係指富山嘅本地鐵路，唔係地下鐵。票務員話，第二朝過去換飛就得。問完嘢，就去食晚餐。
唔知叫咗乜，因為店員唔識英文，就唯有叫大神逐個逐個譯，總之黃色字係推介，就求其點咗其中一碗拉麵，再加多一碟餃子咁。到店員用日文講個名嘅時候，哦! 雲吞麵?! 千里迢迢嚟到日本食雲吞麵?! No~~~
不過反正都叫咗，如果要講特色，只可以講話個餡好細粒，細粒到食不出味道，是日本特色嗎? 餃子嘛，都係之前一晚嘅肉汁餃子好食...
食飽之後，就去咗酒店樓下嘅百貨公司買嘢，响地牢有一間百円店，可以買啲小食，以備第二日嘅不時之需。見到一舊唔知乜嘢嚟，睇落係甜品，夜晩就食咗佢，好甜，有少少滯，尚算好食。
之後，就落酒店大堂問寄行李返東京嘅事，因為上立山黑部，可以將行李由立山站托運到長野站，但要成2000円左右，而將行李速遞返東京，就只係1000円左右，反正上山落山到返東京嗰程都唔想帶咁多嘢，就問一問個程序。酒店就咗張速遞紙我，填好地址，第二朝將行李、速遞紙、同運費俾佢哋就得，好簡單。
夜晚無聊無乜嘢做，就用手機用同一個位置同角度影吓間房，睇吓同支超廣角鏡嘅差距有幾多。影完一睇，無嘢好講，支超廣角鏡好霸道，但我諗我 Handle 得到，某程度上，我愛死呢支鏡。
第二朝要早起，反正無事做，執好行李就完結一日了。
No comments:
Post a Comment