影到第一張，剛剛好影幾粒雪花，即係話件事可行，但係只能碰運氣，睇吓雪花幾時飄到鏡頭前。雪都幾大，機會是有的，只係我呢部只係一部有 Manual Mode 嘅 DC, 影咗十幾幅，效果未如理想，呢個經驗似曾相識，就係响火車行緊嘅時候影塗鴉咁，結論係: 唔夠光。或者我係咪應該買部強勁少少嘅相機呢?
Anyway, 換好衫，食早餐。成日聽話 Continental Breakfast, 今日真係食到。其實就無乜特別，不過啲什果好似唔新鮮咁，有少少怪味，感覺就好似間酒店陳舊嘅氣息融入咗去啲什果咁。(唔好誤會，酒店舊還舊，但係好好住，只係什果出事)
食完早餐，全幅裝備出門口，一出地鐵站，嘩! 好大雪，影咗幾張相，部相機已經好濕。最後決定將部相機同全景鏡放返响酒店，睇嚟呢日只可以用手機影住先。
再度出發，見到國會大樓，過少少就係市政廳。市政廳前面有個公園，係影相嘅好地方，但係做緊維修，差不多成個公園都封咗，所以只可以响有限住置影相。
市政廳轉角，就見到 Votive Church, 睇落幾特別，於是就行咗過去
Votive Church 對面係一個公園 (Sigmund Freud Park), 全部都係雪 (廢話...), 重有一個裝置藝術品，同埋一張枱，有少少九唔搭八嘅感覺 (不過大神話張枱有十個位，代表唔十個2004年新加入歐盟嘅國家)。
好大風雪，都係落返地鐵去下一個景點先。
The Anchor Clock, 有一百年歴史嘅鐘，無時針分針，不過有個牌打橫報時，其他就無乜特別。聽聞每日中午會有音樂同埋啲公仔會走出嚟，不過嚟到嗰陣已經過晒鐘，睇唔到。
是日午餐，係阿拉斯加魚柳配薯仔沙律，條魚好正 (等我重新講多一次，我係一個唔鐘意食魚嘅人)，係薯仔酸咗啲。
週圍閒逛，見到一座幾大嘅教堂 (聖斯德望主教座堂), 呢個旅程入面，似乎好耐無見過唔係修葺緊嘅教堂
教堂大之餘，外牆亦有 Detail 位，不過天氣凍，無心情睇，只係影咗張相作為紀錄
坐地鐵嚟到英雄廣場
見到兩個英雄像
白濛濛一片，似乎無乜好睇，雪亦已經停咗，似乎可以返去國會大樓影相
跟住又去咗 Maria-Theresien-Platz. Maria Theresa 係女皇嚟，中間有個銅像講述呢位女皇，所以中譯大可叫做「皇后像廣場」。
廣場附近，就係莫札特像
影完相之後，就搭電車去搵貝多芬。不過，落咗車之後盪失路，兜咗一陣，終於搵到喇! 不過，天黑囉，要明日請早了。
星期日，無乜食肆開，所以去咗麥記。見到個麥香雞 Deluxe, 好似未試過，就嗌咗呢個餐。
杯飲品見到有 Ice Tea, 就想整杯檸樂飲吓，不過一飲之下，原來係蜜桃 Ice Tea... 味道不佳。
食完嘢，反正都無乜舖頭開，亦無地方可以行，今日就返房休息算數。
No comments:
Post a Comment