兩粒好似無乜特別，但半分天下嗰陣，就分外令人注目
跟住去 Fulham 嘅 Studio 跳舞，途中見到聖誕樹，佈置得好平淡吓，唔係七彩繽紛嘅燈泡，亦無顏色鮮艷嘅裝飾。但當 Google 嘅 Auto Awesome 發功之後，原來黑白相個效果都別有一番風味。
講真，其實之前唔係太識欣賞黑白相，但機緣巧合下識到專影黑白相嘅朋友，睇得多，大概知道乜嘢叫做靚。
跳完舞，出咗一身汗，搭地鐵返屋企之際，咦?! 入口封咗?! 地鐵員工指咗我去第二個入口，原來附近有球賽，好多人，一班車上唔到，第二班就除住啲人一齊迫咗入架車度。但總算趕到去另一個站轉車。
星期四，叫靚仔魔術師寄俾我嘅嘢到咗，因為去布拉格，想貼啲嘢响幅 Lennon Wall. 選擇咗熱血少年隨書附送嘅貼紙。本100毛嘛，隨 Request 附送，外加聖誕咭一張，個 Display Corner 又有新嘢了。
星期五，落咗幾日雨，難得地响 Office 見到夕陽 (四點左右)，算係輕鬆嘅一個星期。
星期六起身，電話表示得-1度，拉起窗簾，屋頂車頂都結晒霜。
幫友人去玩具反斗城買嘢，但先去咗買戲飛，再搭巴士去玩具反斗城。去嗰間近倫敦市郊，一來唔想入塞車嘅市中心，二來因為網上缺貨，遠少少買到嘅機會大啲。入到去，都幾大間吓，但搵嚟搵去都搵唔到要買嘅嘢，一問職員，遠在天邊近在睇前，最後兩盒了，真係手快有手慢無。
買完返到屋企附近嘅市集，一棵一棵嘅聖誕樹，高矮肥瘦任君選擇，但係對於聖誕去旅行嘅人嚟講，無乜意思。
星期日，九點鐘起咗一次身，但只係瞓得六個鐘，於是掃咗一轉 fb 就再瞓過，一起身就已經差不多十二點，因為兩點九要去到戲院，急忙地洗衫煮飯先再梳洗。好彩，最後時間充足，夠時間刨埋本100毛先出門口。
今次睇嘅係 The Imitation Game, 講 Alan Turing 嘅故仔，描述當年二戰嘅時候點樣拆解德國嘅密碼。其中一幕係出面炸到七彩，平民响防空洞度玩 Crossword, 出嚟之後好平靜咁執拾瓦礫，深深體會到英國人嗰種 Keep calm and carry on 嗰種性格。最後當然係點題 Shot, 玩 Imitation Game. 至於個 Imitation Game, 今時今日變成 Turing Test 了。因為今次揀咗場有字幕嘅嚟睇，感覺好好多，我諗以後都會咁揀。套戲不論人物劇情都唔錯，已經連續三個禮拜睇戲，應該暫告一段落,下次最大機會會係 The Theory of Everything.
No comments:
Post a Comment