今次係先北上去 Luton Airport, 第一次用自助形式去 Check-in 件行李，其實都幾方便，因為架機一點飛，Check-in 好件行李之後就去食個早少少嘅午餐。Burger King 就响出境閘嘅出面，嗌咗至愛嘅 Whopper Junior 餐，平時食開嘅 Whopper Junior, 塊漢堡扒都係細少少，但今次，唔知點解係將一塊正常嘅漢堡，對摺... 除咗好抵之外，我都唔知講乜好。
因為唔太夠瞓，所以响飛機上面都小睡咗半個鐘，去到蘇黎世機場，效率非常好，好快咁過到關，好快咁拎行李。之後第一時間買電話咭，15瑞士法郎就有3GB, 去過幾個歐洲國家，似乎呢度都最抵玩。就响個 Sales 攪緊手續之際，見到三角朱古力，先醒起係端士出品。
有咗電話咭，上到網，就快火車飛入城，上咗火車之後，Send 咗個 Message 俾 Airbnb 嘅屋主，佢會响火車站等我。車程唔駛半個鐘，就到達目的地。
Apartment 只係距離火車站大概三分鐘嘅路程，好就腳。四樓有露台，好骨子嘅 Apartment
雖然係馬路景，但對住個山，加上燈光，個景不啲都唔差。有機會可以影一影 Time Lapse.
跟住問題就嚟喇，原來瑞士嘅插頭同歐洲嘅插頭唔同，好彩附近有電器舖，貴就貴咗啲，不過好過無電用。
買完 Adapter, 順便响附近逛吓，再搵吓食咁
無意中見到塗鴉，唔太似平時見嘅風格
附近其實無乜特別好食，一係麥記，一係 Bar, 一係東南亞食品，一係意大利餐廳，重有一兩間瑞士餐廳，不過就完全睇唔名個餐牌，因為價錢唔平，為免中伏，都係等最後一晚睇吓使剩幾錢先再睇吓試唔試。最後揀咗間意大利人經營嘅 Pasta 店，入面就剩係食 Pasta, 格局就好似香港啲麵店咁，個廚房有一煲滾水煮 Pasta, 跟住有幾個兜裝住啲熟料。入嚟純綷因為睇得明啲 Pasta 名咁解，起碼知自己會食乜。不過個份量都幾大吓，本來以為碟中心好細，會唔夠食，但最後係好飽之餘，重撐住個肚幾個鐘，有機會可以再入嚟試其他意粉。
之後就去超級市場買生果同埋麵包做之後幾日嘅零食同早餐，跟住就返去 Apartment 了。
今晚可以抖返夠本，聽日行程都幾集中响一個地區，唔急。
No comments:
Post a Comment