給警察

帶定頭盔先，呢篇文只能用有限嘅資訊同常識，外加少少陰謀論去講俾依家唔得閒嘅警察朋友知。

首先警力不足，一場咁和平嘅示威，係唔需要太大量警察，衝並唔係民眾想做嘅事，只係响邊界守住唔好比佢擴散就已經交到差。每每用幾百警力去佈防一個點，多多都唔夠。但資源掉配嘅嘢，真係零資訊，要問就問坐响辦公室嗰啲點解要咁做。

第二執法不公，攪清楚坊間嘅指控係就手旁觀同埋捉完即放人。警力不足唔係執法不公嘅理由，當一個地方係 Hotspot, 响附近調人嚟係唔會有問題，正正因為衝並唔係民眾想做嘅事，佢哋唔會趁你去救佢哋嘅人嘅時候就走去衝咁無義氣。

第三騙局，破壞同民眾嘅互信係最不智嘅選擇，我諗唔使我再多講。民眾嘅反應係好快，你呃咗一次，以後就唔使再旨意行任何方便。至於點解要呃第一次，就要問吓出橋嗰位人兄。

第四困境，邊個攪到你哋咁攰? 民眾好地地，你只係响度睇實有無異樣就已經 OK. 但偏偏嚟咗批攪事嘅，一日唔拉晒班攪事嘅，以後嘅日子你有排捱，捉完即放變咗捉蟲。

第五陰謀論，如果批攪事份子變成梁美芬所提出嘅志願軍，你又有何感想? 志願軍嘅意思，係警察已經無利用價值，警察做唔到嘅事，佢哋做到。睇返羅太嘅言論，一出事就話警察唔啱，我嘅感覺係用完即棄，替你不值。

本來想寫短少少俾唔得閒嘅你容易啲消化，但道理真係好難寫得太短，希望你睇得晒。你有咩資訊可以分享嘅亦無任歡迎，各自在戰場努力。