上咗火車，都幾快，原來都有 140km/h, 如果係東鐵一定無咁快
出面風景唔錯，有 Windows XP 嘅 Feel, 可惜只可以透過污糟嘅窗影
本來想瞓一陣，但係半個鐘左右就到站，快過落 Crawley 好多，再去機場，就要搭接駁巴士。到咗機場時間尚早，過咗半個鐘到12點先食晏。見到有 Burger King, 當然係叫返個 My Favorite: Whooper Junior Combo
因為呢度好多廉價航空，攪到成個 Luton Airport 都係一個幾自助嘅機場。但就有啲創意位，例如呢個 Project 落人型玻璃嘅 Video
本來要買袋裝牙膏，但咁啱見到有人剩係用一個袋，就膽粗粗咁問佢可唔可以俾我另一個袋，得咗!
排咗好耐隊做 Security Check, 跟住又去登機閘口，其實時間真係跟晒之前嘅預想咁，過多5分鐘就過晒預定1點嘅最後召集時間。臨上機前，就俾我見到呢個畫面，藍天白雲橙機，啲色撞得太有趣，唔影對唔住自己。
就嚟降落，因為自己坐咗响走廊位，搵咗坐响窗口位嘅乘客幫我影風車
機場入面嘅風車
出咗閘，第一件事搵地方買 SIM Card, Lyco 卅蚊無限上網，Lebara 廿蚊有 1G, 用唔夠一個禮拜嚟講，1G 已經好夠用，所以都係揀咗 Lebara.
跟住去買火車飛入市中心，表面上係一張紙嘅飛，其實應該係 RFID 或者係 NFC 嚟，所以可以拍一拍個感應器就得
入市區嘅火車比上 Luton 嘅火車慢咗好多
不過沿途就城市化好多
落咗車，就搭船過對面岸，免費的說。
好大嘅中央火車站
相對於河嘅另一邊，對比實在太大
碼頭外泊滿嘅單車
成幢建築物都係塗鴉
啲屋嘅建築風格好明顯同倫敦唔同，而且路亦都寬闊好多
搵咗一輪，終於搵到目的地，今次嘅 Host 係兩個女仔，住一間有兩層四間房嘅屋。間房都幾大吓
放好行李，就去超級市場買生果同埋零食，五分鐘唔駛就行到，都幾方便吓
安頓好晒，再洗一洗個面，就出發去紅燈區，首先係去碼頭，無敵大河景，我諗我係咪應該搵日早啲睇晒啲景點佢，再嚟影 Time Lapse
又去返中央車站，再行出另一邊，就係電車總站，但係紅燈區係 Walkable Distance, 所以今日唔搭住
再行出少少，就係一條大街
過咗馬路後，見到遠方就係一堆人，似乎呢條大街係做遊客生意
於是神奇嘅境象就出現响眼前，Sex Museum 正正就座落响條大街度，其實之後重有間 Museum of Medieval Torture Instruments. 但呢兩間 Museum 似乎都係個名誇張啲，有少少九流嘅感覺
不過攪咗成日，都已經七點，好肚餓，於是求其搵咗間餐廳坐底，Order 咗個 Pizza 嚟食，同埋一種叫做 Bitter Lemon 嘅飲品
原來係樽裝汽水，即係 Bitter 極都有限啦!
餐廳外，就見到呢啲特色建築，於是食完咗就走過嚟影吓相，亦都搵人幫手影
其實我唔知呢度係咪紅燈區，但係就好多 Bar, 食肆、同精品點
河境亦都不俗
跟住就嚟到一條好多唐人餐廳嘅街
同埋响街度睇到有人 BBQ
之後又見到有幾間 Gallary 出現
跟住發現行錯路，而且已經兜咗個圈。
兜兜吓，就見到佢，本來想同佢影相，但係之後有人坐咗落去影，影好耐都唔走，算數
啲雀開始返歸
好橙嘅𣄃海
又係唐餐館?
重有間廟添!
又行錯路，發現呢個 Sculpture
同埋呢架塗鴉車
重有呢個我本來都唔知係乜嘅建築物，下面又圍晒圍板咁，第六感話我知係一個景點，於是就影咗佢。之後查返，原來係叫 The Oude Church
兜來兜去，終於到紅燈區，其實外表上無乜特別，最多只係見到啲著內衣嘅女人企响玻璃門度騷手弄姿咁，不過唔影得相。
呢一排屋，其實就就係佢哋工作嘅地方
當然重有其他俱樂部可以玩，原來都係諗住行過對面睇吓重有乜嘢舖頭，但係俾我聽到巡遊嘅聲，同埋見到圍觀嘅人群，二話不說就追上去睇
真係巡緊，不過就唔知係乜嘢性質
遊遊吓，嚟到另一個唔知係乜嘅景點，但總之影咗相先，之後查返，原來係叫 National Monument, 個名會唔會太普通呢...
之後搵啲巡遊緊嘅隊伍影吓相咁
巡遊過後，見附近都幾靚，再响度影多幾幅相
影飽影夠，返返大街，見到靚建築物，再影多幾張
呢間唔知點解週街都有人拎住嚟食，遲啲試吓先
有澳門，但無香港，不過唔使大驚少怪，因為係賭場嚟
夕陽西下，之後就係瘋狂晚霞系列
好耐都未同夕陽先生一齊影過相
是日自拍系列
No comments:
Post a Comment