夜晚食完嘢，就去做 Gym, 呢幾日有少少雲境睇吓，行去 Gym 嘅途中忍不住就去影咗落嚟
原來間 Gym 夜晚都幾多人，似乎唔係一個好地方，但反正 Join 咗，做埋呢幾個禮拜。
今日要去三個地方，見兩份工同去個 Job Agent 度，第一份工要八點去到，但其實五點鐘就醒鬼咗，跟住因為唔記得 Mute 咗部電話，食 Lunch 嘅時間就好多 Whatsapp Message 出現，似乎上天已經安排咗我要呢個時間起身，反正瞌埋眼都係諗緊見工嘅事，都係起身。
梳洗好後，食咗個簡單嘅早餐，就出發。出咗門口之後，我記得張 Oyster Card 好似剩低唔係好多錢，口袋亦唔係剩低好多錢，跟住又記得無帶到個後備充電池，但呢一刻返房擺就有機會遲到，睇嚟今日無論精神同金錢上都要慳啲洗。
第一間係做 Consultancy 嘅，約咗八點，迷咗少少路，搵咗成十分鐘，搭十一先到，有驚無險。之前做咗啲 Assignment 俾佢，今日就係去對份 Assignment 解話。於是一開始解話就話知唔知乜嘢係 Complexity, 用 List 嘅話加一個 Item 嘅 Complexity 係乜，可以有乜嘢 Alternative 咁，真係開心到呢，下次見人嗰陣我都試吓問呢啲先。解話之餘，亦都叫我响白板度畫返之前做過嘅 Project 咁，於是就講咗個 BizTalk 嘅 Project, 貪佢夠偏門，等佢唔使亂咁問嘢。跟住奇妙嘅事情就發生，佢問 SQL... 一個好明顯叫我答 Full Outer Join 嘅問題，同埋乜嘢係 Clustered Index 同 Non-clustered Index, 外加乜嘢係 Table/Index Scan/Seek, 最後問埋 Well-balanced tree 嘅重要性... 唔通佢見過一個做咗十幾年嘅 IT 人會唔識呢啲嘢? 佢差啲想問返啲大學嗰啲 Data Structure and Algorithm 嘅問題，我只好答話唔好玩啦，十幾年前嘅嘢...
見完工，決定去食個早餐全餐安慰吓自己，我諗佢係請我嘅話，我都要再三考慮，俾佢咁玩法，命都短幾年。
食早晨全餐嗰陣，見到牆上面有個幾盞鬼嘅擺設，心情好返少少。個早晨全餐嘛，塊肉無香港嗰啲咁咸、薯餅無香港嘅咁香、支橙汁當然大支過香港。跟住，乜唔見咗包果醬，但係坐底咗，懶得起身問佢攞，算!
食完個早餐，要去 Agent 度，落雨添，本來想搭巴士，但落雨又塞車，要要搵巴士站，唔太方便，都係搭地下鐵。呢間 Agent 都幾大支嘢，好多時都係電話講完就算，呢間要個人上去，反正下一個 Interview 係三點，於是就趁有空檔走上去。傾咗唔夠半個鐘，話有三份工啱我，就 Send 咗個 Job Description 過嚟。唔... 都有兩份有信心嘅，另外嗰份要攪 Infra 同 Mainframe 就真係唔太啱。
時間尚早，決定搭巴士，巴士站原來就响 Victoria Station 對出，知掟無難度。沿途經過柏麗大道、大英博物館、唐人街等等。可惜今次唔係旅遊，只好過門而不入。
目的地附近落車，又搵咗一輪，只係十一點幾，大把時間。想搵個地方座低，但附近似乎無乜可以坐嘅地方，連牡丹樓都只係得幾個位坐，但已經係最好坐，亦都只好响度開埋餐。
到咗 Lunch time, 亦都太多人，再坐落去都唔係辦法，都係返去見工嗰度，原來樓下係一個 Open Area, 無乜人，可以坐低慢慢等。等緊嘅時候，寫低咗少少 App 嘅 Idea, 睇吓遲啲有無機會用到。
終於去到兩點十，去咗 Reception 度叫人出嚟，呢間公司係做 Digital Agency, 一個未親身接觸過嘅行業，問嘅都係啲大路嘢，可以閒談到，都應該幾啱咀型。
今日洗費只係個早晨全餐同巨無霸餐，唔使十磅。張 Oyster Card 就用剩五毫子，無搭巴士嘅話就要焗增值。
至於部電話嘅電，响車站行返去嗰陣剩返 18%, 係底到省電模式直接幫我 Cut 咗個 Mobile Data, 都真係返遲少少都唔掂。
過咗漫長嘅一日。
No comments:
Post a Comment