台中高雄之旅 Day 3

旅行咁多日，落足咁多日雨，高雄重要落雷雨，落高雄之前，週圍行吓，去咗七仔度買咗杯雪糕，係北海道牛奶味，超正。因為把遮斷咗條骨，所以要買過把，見到有一款有 Telfon coating, 就買咗把，都幾貴，希望襟用啦!


經過一個鐘左右嘅高鐵，有少少餓，就响高鐵站買咗個腐皮壽司做個簡餐


左營高鐵站同高雄捷運相連，所以唔太使濕身就去到高雄火車站。不過呢高雄站係分前站同後站，要攞張飛仔入閘先過到去。


個站其實都幾大，間酒店係平嘅，但係有少少唔方便咁。不過到咗酒店，個感覺太舒服喇，好啦，我原諒你啦!




房入面嘅設施都好好，除咗有畫做裝飾


重有係 USB 直叉，Adapter 都唔使拎出嚟


由於持續大雨關係，於是就去夢時代行吓。間商場，我估應該同 Elements 差唔多，得個大字，特色欠奉
 

台灣人真係好鐘意唱 K


夢時代最頂層有個摩天輪，不過因為响室外，加上落大雨，相影唔到，係撞到呢隻好假嘅恐龍咁


商場其實無乜嘢行，又唔想入面食嘢，於是就去咗六合夜市，因為落雨，唔多鋪開，行嘅人亦唔多，好彩個個都推薦嘅果汁店有開，算無白行


正當再搵吓有咩好食嘅時候，就落起大雨喎，咁啱去到餃子店嘅位，反到都係等，就叫咗碟餃子食，味道不過不失。


不過食完餃子，雨重係咁大，行夜市嘅雅興完全無晒，只好冒住大雨去捷運站。好彩鞋係防水嘅，遮係跣水嘅，背囊防水笠，所以只係褲管濕濕地，個人整體上都係乾嘅。

返到去火車站，已經停咗雨，原來間酒店夜晚都幾靚仔
 

是夜開心大發現: 响床頭張櫈度，見到呢張咭片。原來係送耳塞，質料亦都唔錯，難得!

台中高雄之旅 Day 2

放假是懶洋洋的，懶洋洋的起床，懶洋洋的梳洗，懶洋洋的出門。

本來想去柳川水岸步道行吓，可惜遇著落雨，所以都係打個卡算


反正落雨，想試多次 slow shutter, 但似乎太光了，失敗嘅作品


雨中柳川，其實可以好好影，可惜又要擔遮，又要影相，太麻煩了


因為落雨嘅關係，離開柳川之後，就去睇博物館。台中其實有幾間博物館，但係唔知係因為星期一嘅關係定端午節假期嘅關係，就剩係得自然科學博物館開


其實入面都無乜太多嘢睇，有講晶片呀，太空之類嘅展館，上到去一個有個室外嘅地方，養住啲小動物同植物咁。不過啲小動物通常都匿埋晒，其中一個缸，發現呢隻嘢，算係好彩啩。


去到另一個展館，講好多科學原理，其中一個係凹鏡。令我記起讀書嗰陣嘅一個趣怪現像: real image. 話說 Physics 讀到 Optics 嘅時候，鏡像通常都係响塊鏡入面，稱之為 virtual image. 但有一日啊 Sir 畫咗所謂嘅 real image, 即係個鏡像係响鏡出面，當時班上都為之震驚。但當時係無做到任何實驗，所以跟本想像唔到 real image 為何物。但今次，見到了，就好似啊 Sir 當年所畫嘅咁，可惜唔記得拍片。


行完展館，無乜嘢做，就去咗睇天象電影。嘩，座位向後傾斜嚟講，實就太好坐，亦都好好瞓，於是半個鐘嘅電影，就瞓咗十分鐘。瞓完個人幾精神，諗住出發去夜市，但行行吓突然狂風大驟雨，咁啱有個商場，就走咗入去。

個商場叫第六市場，反正時間尚早，行吓都好


行行吓有少少餓，因為都想去一轉夜市，就叫咗一碗陽春麵同買咗盒生果食


食完嘢，有個健身中心嘅人搵我做問卷，我話我香港嚟，於是就由做問卷變咗吹水，一吹又吹咗十分鐘。不過好彩有佢，正當我猶豫緊落雨去唔去夜市嘅時候，佢就話:「去一去吧，反正應該都不會再下太大的雨。」於是我就搭車過去。

轉車其間，雨已經停咗，有少少口渴，經過飲料店，見到有阿華田奶茶，好奇心驅使下，買咗嚟飲，味道又唔錯喎，見到可以再試吓。


終於到咗逢甲夜市，熱鬧非常，而台灣人推薦嘅明倫蛋餅，日船章魚小丸子同繼光香香雞就喺晒眼前。


但呢一刻，因為成肚水嘅關係，感覺重係好飽，但要揀一樣食嘅話，我決定揀明倫蛋餅。


好多人排隊，拎咗號碼牌等嗌號碼，十分鐘左右就到我喇! 不過太熱，等咗一陣先食。一食落口，好好食，蛋同葱嘅香味剛剛好，又唔會太䶢，果然名不虛傳!


可能天氣太濕熱，無乜胃口，加上之前食咗少少嘢，已經唔想再食。但有啲嘢唔食都睇吓，呢間我見好多人都拎住個盤嚟食，應該幾好食


除咗細細個住响燒味工場附近，好耐未見過成隻燒豬


雪花冰嘅嘢，好難唔買嚟食
 

行過一間扭蛋鋪，見幾得意，就扭咗隻嚟玩


該食嘅食完，該行嘅行完，係時候返酒店執好啲嘢，第二日 check-out 了。

台中高雄之旅 Day 1

好耐未試過一個人旅行之餘又好想逃離香港，於是有日就想趁端午節小休一會，好快咁訂好機票，輕裝上路。

因為係夜機，加上班機 Delay, 所以去到台中機場，都差不多11點, 比原定時間遲咗大半個鐘。好彩係過境櫃位無人排隊，唔駛5分鐘就已經出咗機場，不過要等11點半架巴士，去到酒店，就已經差唔多1點。

第二日起身時都差唔多11點，天陰陰的，所謂貴人出門招風雨，聞說台灣同香港一樣，差不多鬧旱災，就等我嚟幫吓手。今次旅行嘅目的只係想閒逛，所以，就閒逛吧!

酒店外面就係台中火車站，唔知係擴建定要搬，總之有工程做緊，左邊新站，右邊舊站


穿過火車站，火車站嘅另一邊原都幾熱鬧，熙來攘往嘅行人，各式嘅飲料店，途中遇到有人賣車輪餅，就買咗件紅豆味嚟食，都幾好味。又經過一間水果店，就買咗件西瓜，一路行一路食，行吓行吓，就到咗台中文化創意產業園區


依家台灣每個大城市都有呢啲文創區，主要係將以前嘅工廠，變成展覧活動館咁。睇咗個介紹庶糖嘅展館同埋同灣工業展，就落起大雨了。避咗一陣雨，又行咗一陣展館，雨終於停咗，亦都好似無乜嘢好行，就離開咗


返返去火車站附近，就係宮原眼科，聽聞雪糕好食，但唔值得我去排隊囉... 所以就出絕招，影咗當去咗

其實唔係特登 out focus, 只係後來發現相機 set 咗做人手對焦，所以基本上用相機影嘅相都係朦朦哋

宮原眼科對面係綠川親水步道，好彩天陰陰，就練習吓長時間曝光，睇落都 OK 嘅


本來想輕裝玩，只係帶咗斜孭袋出街，但完來都幾唔舒服，所以返咗酒店房抖一抖，再換個背囊出發。

目標係酒店附近嘅秀泰廣場，其實係一個戲院商場，分一二期。而聽聞好天嘅話，上四樓影相係會幾靚，可惜就只係落住雨


原來台灣係興咁樣唱K


湯姆熊嘛，差唔多就係 Jumpin Gym, 之前成日見黃氏兄弟响YouTube玩


行吓行吓，差不多係食嘢嘅時候，反正有個 Food Court, 於是就求其搵咗間嚟食。上海湯包即係小籠包唔錯，不過食完之後，碗飯就變得太多了。所以如果有下次嘅話可以選擇食兩籠小籠包。
 

因為食完嘢，都無諗住再去夜市，就返酒店房打墩

每日一字 41

朋友遠行，中文可以祝福一路順風，英文就可以講 Godspeed.

God 當然係神，Speed 除咗加速，Old English (spedan) 嚟講重可以解 to succeed, prosper, grow rich, advance. 原句 "God spede thee" 响 14 世紀出現，就即係 "May God give you success".

唔想太神化，簡簡單單咁講 Have a safe trip 或者 Take care. 高雅少少用，用埋法文: Bon Voyage

Tank Man

沒有人可以認識所有事物，但有些事，你總會認識。

十幾年前，唔睇足球嘅，個個都識碧咸。而世界上有好多知名相片，當中嘅歷史背景大家可能都唔知。時代雜誌响2016年選出100 Photographs: The Most Influential Images of All Time, 我自己識唔晒，但係我諗大約知道究竟張相係戰爭與和平，定抑或科技與文明。

大是大非面前，Hea 答唔係問題，但 Hea 答 OK 就變成咗一個問題，幾 Hea 都好，六四慘案，唔 OK. 採訪手法拙劣，唔代表 Hea 答有理。除非，你覺得殺人係 OK, 咁另當別論。

反之，作為六四嘅 Icon, 千禧世代已經唔認得，可悲。

校歌的二三事

And 字基本上個個都識講識用，但係就唔係個個都識唱。話說母校90週年聚餐，有師兄提到 And 嘅唱法:

在當年陳教授的指導下，在唱聖類斯校歌時，每當唱到『AND』字時，不能把這個字，讀成傳統英文發音的『AND』，而是要把『AN』音讀成類似『UN』音並拉長少少，並把尾音唱成『特』。這個『特』音不需要很誇張，有點聲就可以了。因此，如果唱『TO THEE AND FRIENDS OF YORE』時，就要唱成『TO THEE UN～特 FRIENDS OF YORE』。和在唱『AND MAY THY SONS HEREAFTER』時，唱成『UN～特 MAY THY SON HEREAFTER』。

當年 Mr. Lau 教話唱 UN 會好聽啲，但其實嘅好聽，當年係唔明點解會好聽。幾年前學過少少點運用聲音，依家大慨明佢講乜。所謂嘅好聽，唔係悅耳嗰種好聽，而係清晰嗰種好聽。And 嘅發音口形係扁扁哋咀，氣流唔太𣈱順，聲音會較為柔弱。

而 UN 嘅發音口形，係成個口張開，氣流可以大量通過，唱出嚟會比較雄亮，感覺亦為之激昂，呢個就係今日我對當年「好聽」嘅演繹。

另一件較少為人知嘅事，就係慈幼會嘅校歌係百分之九十九都係一樣，唯獨學校名不同。皆因作校歌嘅係同一位神父所作，而校歌係用最好嘅曲詞編寫，如果第二首作嘅校歌同第一首唔同，即係第一首作得唔夠好。用同一首歌，就解決咗優劣嘅問題。

私隱何價

做 Data 相關嘅人都知，Data 有價，有 Data 就可以搵到不同嘅 Pattern, 由呢啲 Pattern, 就可以起個 Model 去做唔同嘢。

微信支付、支付宝紛紛登陸香港，以各式優惠作招徠吸客。當然，信用咭公司一早就掌握咗大家嘅消費模式，但用得信用咭嘅大都係大額交易，小額交易嚟講，對於日常生活息息相關，啲優惠基本上就係買起你日常起居生活嘅模式。

咁知道生活模式係又點呢? So What? Let's see how far we can go...

知道你日常响邊度買嘢，就知你响邊度住，邊度返工。因應買嘢嘅價錢，買嘢嘅商鋪，可以推算到你大慨年齡層、入息、婚姻狀況、行業。行業或者可能有少少誇張，但要知你係咪退休、學生、家庭主婦/夫、無業、公務員就一啲都唔難，亦只要一個簡單嘅優惠，大部份人都應該會乖乖奉上。要知嘅政治取向，就只要加埋社會時事嘅原素，睇吓咩時候你特定日子响咩地方，甚至睇吓 WeChat History, 亦唔難得到。

如果用埋嚟做 Peer-to-peer transactions, 就知埋你同邊個食飯, 知邊個係你同事，同邊個 Friend 啲，邊個係你朋友或者係另一半。Now, if I want you to buy something, 跟本唔使同你推廣，只要同你個 Friend 推廣，又或者你嘅另一半推廣，Word of mouth 就係最佳嘅宣傳工具了。

To push it a bit further, 只要同連鎖超市合作，就大慨知道你嘅家庭狀況, 即係屋企有幾多人、幾時生過仔、仔女大慨幾歲等等。

基本上，整個人生，同埋朋友嘅人生，就掌握在別人手裏。當只係掌握 Facebook 就可以影響投票意向嘅時候，人生落在別人手中，唔係更加可怕咩? 你覺得中國大陸嘅社會信用系統係流嘅? 定還是覺得 Black Mirror 嘅情節無可能會發生?

講古系列 12: 鼇洋甘瀑

話說古有新安八景，香港有二，一為杯渡禪蹤，二為鰲洋甘瀑。熙時年間嘅《新安縣志》曰:「鰲洋甘瀑在七都大洋中。有石高十丈，四面鹹潮。中有甘泉飛瀑，若自天而下。」

鰲洋甘瀑今位於南區薄扶林瀑布灣，搭車去華富邨行一陣就到。

香港開埠前，英國外科醫生及博物學家 Clarke Abel 曾到此一遊，响 Narrative of a journey in the interior of China : and of a voyage to and from that country, in the years 1816 and 1817 中係咁樣形容個瀑布:

As seen from the ship, this island was chiefly remarkable for its high conical mountains, rising in the centre, and for a beautiful cascade which rolled over a fine blue rock into the sea. I took advantage of the first watering boat to visit the shore, and made one of these mountains and the waterfall the principal objects of my visit.

中譯:

從舟上觀香港島，只見其中峰挺拔，狀若圓錐。山下則有美瀑，水沿岩壁滾流而下。待駁艇備妥，即乘艇登岸，爬上此山，細賞此瀑美景

英國外交使節 Sir Henry Ellis 亦响 Journal of the proceedings of the late embassy to China 提到:

In the evening the ships weighed, and proceeded to the island of Hong-Kong for the purpose of watering. We hope that we shall be enabled to pursue our voyage on the morning of the 12th. The situation of the watering place is picturesque. A stream of water falls down the mountains forming the island, and the casks may be filled when the tide serves, close to the beach. Surrounding projections of the land enclose a small bay, the resort of fishing vessels.

中譯:

船隻為了補給儲水開往香港島，水源周圍的環境如圖畫般的優美。
在島嶼的山中湧出瀑布，潮漲時便可在灘上裝滿水桶……
凸出的地形圍成一個小海灣，這是漁船的庇護所……

幸得 Google 幾年前 Scan 咗當年 Clarke Abel 嘅書，還原咗當中嘅插圖:

再對比返 Google Map 嘅衛星相片，今日嘅只係一個小型瀑布，

當年嘅壯觀景況，大慨就係成張相都係瀑布

時移世易，香港開埠後，為咗應付食水供應，19世紀60年代起咗香港第一個水塘: 薄扶林水塘。大部份原本流向呢個瀑布嘅山澗水流，都引到去水塘度，鼇洋甘瀑亦只能剩下瀑布灣一名。