Good Morning

噚日臨出門口去開會前，個客話唔使開會，於是，就多咗一個鐘出嚟。唔太想返工住，於是就去咗附近間杜丹樓食早餐，一向都唔會咁早走過嚟，原來一朝早係好多人


因為見到早晨全餐再唔係叫早晨全餐，又唔想改叫法，所以用咗號碼餐嚟代替。

等咗都一段時間，早晨全餐登場，但係個感覺好頽，真係好又一餐唔好又一餐。


吃飽飽，時間差不多，上班去。

北海道之旅 - 層雲峽

一早起身，Pack 好行李，去附近嘅 Aeon 睇吓食乜早餐好。但可能因為太早，Food Court 無乜舖頭 Ready. 最後占占揀咗 Mos Burger.


好快咁完成個早餐，就走去巴士站。好出奇地係 Local 巴士而唔係旅行巴士。由道北巴士營運，巴士站就响旭川火車站右手邊，時間表顯示9點15分有班車，行到去剛剛好巴士到站。

差不多兩個鐘嘅車程，終於到咗層雲峽，酒店離巴士站有段路，又大風又凍，衫夠厚但係塊面吹得好凍。

到咗酒店，未到 Check-in 時間，於是放低行李，抽出厚衫，帶埋相機，就出去影相


附近啲樹似乎都係未黃得晒


附近無景，只好上山，但遠看山頂，係雪... 我嚟係想睇紅葉，唔係睇雪㗎...


於是，一路搭䌫車，一路慢慢變雪景


上到去黑岳


雪，全部都係雪...


占占幫我影一幅


有雪嘅地方，當然要留名


沿住條山徑


去到吊車站，個行程本來係搭吊車再攻頂，但係占占病病哋，影張相就返返䌫車站


見有厚厚嘅雪，可以玩吓 Snow Angel, 不過效果唔太明顯。我玩完之後，有人又嚟到見到咁過癮又玩，我就走人了。


時間不早，去餐廳買嘢食，本來有個冬季限定嘅，但斨完錢之後，著咗紅燈... 賣晒了


嚟個黑岳大餐，有飯有麵有配菜，好大的一份，有少少過飽


食完嘢，風雪比剛剛大，都係要打道回府


落咗山，個景變成咁


一樣，有雪就有我個名，但占占加料，所以呢幅相我會命名做《占占的便便》


溫泉街週圍影，但天陰無乜好影


連個招牌都被披上一層薄雪


未想返酒店住，就去咗附近一個公園


個景還好


同占占响風雪下嚟張 Selfie


再入公園影幾幅相


返到酒店，未到 Check-in 時間，响 Lobby 坐咗陣，個天放晴喎...


Check-in 完，再 Book 第二朝返旭川，因為有少少攰，於是咗抖一陣先


Hea 之全景


4點幾左右，占占話去睇瀑布，於是就行咗大半個鐘，去睇流星同銀河瀑布


睇完瀑布，食返杯雪糕，巨峰提子味，唔錯


跟住睇到有條路上山睇，兩個瀑布合體，就行呀行，又行咗十幾分鐘去影幅相


嘩! 年紀對體力嘅消耗真係唔講得少，睇住占占一枝箭咁走咗去，我就要慢慢行，真係唔認老都唔得。

返到酒店，意想不到地有人幫我哋鋪緊牀鋪，我以為要自己鋪添。

放低攝影器材，就去食晚餐，自助餐嚟，好多嘢揀嚟食，每樣試少少，好滿足。


食完嘢，响 Lobby 行咗陣，有唔少紀念品賣


行完 Lobby, 返返房，抄返咗 GPS Log 同埋相落電腦，就完成一日。

北海道之旅 - 起行

話說之前占占成日話搵唔到人一齊去旅行，咁啱我又 Plan 去北海道睇紅葉，就邀請咗占占一齊去。

一大早就要起身，早過返工，因為之前一晚 Pack 好晒嘢，梳洗完就可以搭機場巴士。

Check-in 好之後，因為飛機餐都要預少少時間，於是就搵地方食早餐。好以由旅居英國開始，習慣咗如果早機嘅話，就會去機場嘅牡丹樓食個早餐，夠快夠方便，15分鐘完成買餐同進食嘅過程。

唔知係咪錯覺，機場嘅早晨全餐，好似靚過街外面嗰啲咁，上一次見到咁嘅質素，係响東京新宿食嗰分早晨全餐。


老土照一幅


今次係搭香港航空嘅飛機，比廉航貴，但比大航空公司平，感覺出乎意料地不差，唔窄，飛機餐不俗，電影都幾新吓，睇咗套《當這地球沒有貓》，一套幾慘嘅作品，睇完個人有少少虛，加上唔夠瞓，於是就瞓一瞓填充返失落嘅精神。

落機前一個鐘左右醒咗，架機 Land 好後，見好多人企起身攞行李，於是就攞埋一份，點知跟住空少係咁做手勢叫人坐低... 超級失禮，真係想搵窿捐...

差不多日落


新千歲機場雖然係國際機場，但繁忙程度始終不及大城市，好快就出到關，等埋占占嘅行李 (我唔係無行李，我只係無寄艙行李)，唔使一個鐘就出咗機場，重搭到比預定時間早一班嘅火車。

因為要去層雲峽，所以要先搭火車去旭川，本來想買火車飛，但占占話可以買張儲值卡，於是就買咗。買咗儲值卡，增埋值後，先記得一早買咗 JR Pass... 出晒事添

日落了


由新千歲去旭川都要啲時間，於是就買咗個腐皮壽司頂一頂肚先


响札幌見到傳聞中嘅動物火車


吃完壽司，完吓長時間曝光
 

去到旭川，落雨，好彩地火車站有蓋，遮到一段路，但過馬路嗰吓點都要開遮。

小小嘅房間，只可以用嚟瞓，連開行李嘅地方都無乜，酒店只係勝在近火車站，一個人會啱啱好，兩個人就好迫吓。Fujita Kanko Washington Hotel, 呢一晚六百蚊左右，之後嗰晚四百蚊唔使，算係咁。


放好行李，就去食嘢，個人嚟講對食無乜要求，但占占就唔同，搵咗間出名嘅拉麵店山頭火。出唔出名我都少理，但最特別嘅地方，係可以嗌無咁熱嘅湯底，感覺上還可以，另加餃子，好飽好滿足。


食完嘢週圍行吓，占占無帶到手套，本來想响 Lawson 買返對，但酒店對面係 Aeon, 可以再行吓先。百貨公司嚟講，衣履鞋襪都幾貴吓，好快咁行咗一圈，之後兩個人都不約而同地行咗超市區域，我係想買少少生果。


買完生果後，就上幾層再睇，有鞋舖，玩具舖，正當想放棄之際，有雜貨舖，外面掛咗一對一對嘅手套，三百円唔使。

買好嘢後，就睇吓第二日去邊度搭巴士，原來都係响火車站出面。定好行程後，雖然只係九點幾，但搭早機嚟講都幾眼瞓，於是就好早咁完結咗一日。