人生之旅 - Day 19

一朝早就响房度玩 2048, 玩咗成個鐘，終於完成到。


食咗個 Lunch 之後，又跟住旅遊書出去行吓。


今次去 Convent Garden,本來有車站直達，但今日封咗，所以要响 Leicester Square 落車，再行五分鐘過去。沿途基本上係購物區，尤其係賣衫，蕉共、Zara, GAP, H&M, CK, Marks and Spencer, 無印等等，我諗講得出嘅牌子都响晒度。去咗其中幾間兜咗個圈，係 H&M 相對嚟講叫做平香港少少，其他都係香港買會抵啲。


去到 Convent Garden, 又開始見到人表演。


其中一個係魔術表演嚟，Miss 咗前半部，但後半部大概估到之前做過乜，成個表演流程同埋觀眾嘅互動做得好正，表演完嘅打賞似乎都幾可觀吓。


再過圍行吓，有其他表演好似唱歌同耍雜技咁。


經過 Jamie Oliver 嘅餐廳


就見到工藝品市場，全部都係自家製產品，有裝飾擺設洋燭廚具等


响 St. Paul's Church 前面


重有人表演瞓釘床添


之後去到交通博物館，不過入場費竟然要十幾磅，好似唔係好值咁，最後都無入到去。不過，就响出面嘅賣紀念品嘅鋪頭閒逛。

剩係講地下鐵都有一個書架，其他書重有講火車、巴士之旅咁

最吸引我嘅係呢本，講地鐵站名嘅典故，等 Settle Down 之後可以買咗佢慢慢認識呢個城市

有少少攰，於是就响個 Cafe 度 High 咗個 Tea


時間差不多，係時候回程，途中見到蘋果店


馬車

又搵到位啱影 Slit-scan


行返去 Leicester Square 途中，見到間話自己係最大嘅賣旅遊書嘅書店，又走入去睇吓咁

好多講返自己英國嘅書


差不多到站，見到意粉屋，唔知同香港嗰間有無關係呢?

人生之旅 - Day 18

之前一日香港係公眾假期，但我就宅咗响房度做 Training Material. 今朝再執少少手尾，隨時可以 Deliver.

食過午餐，就去銀行開戶口，因為近嗰間分行要去到12號先可以 Book 到 Appointment, 於是就 Book 咗間要搭車一個站去嘅分行。過到去等咗十幾分鐘，有人招呼我喇，唔駛自己填表，個職員直接响電腦度打晒啲地址電話出生日期同埋部份 Survey 性嘅問題，就完成開戶過程。不過今次只係開 Current Account, 同香港好唔同，所有 Transaction 都係响 Current Account 度做，Saving Account 真係用嚟儲錢的說，不過都無詳細問個原理係乜，入鄉就隨俗吧!

開完 Account, 就存好張 Bank Draft, 要四個工作天先過到數，而張 Debit 咭就要五個工作天先有。因為五月五號係銀行假期，所以要下個再下個禮拜先有，好在現金夠洗。

開完戶口，似乎該要响英國定居嘅事都 Ready, 只係差一份工同一間屬於自己嘅屋企。下個星期，就有三份工等住見，而 Crawley 分工又無晒聲氣，睇吓幾時完成埋最後呢兩步。

人生之旅 - Day 16

一朝早去咗媽媽同學到拎郵件，點知拎完之後，Passport 亦都剛剛好送到，本來已經入咗地鐵閘口，都要出嚟再拎多次。

之後就搭地鐵去市中心去開個銀行戶口，因為地鐵大罷工，所以有啲站無開到。


去到市中心，又差唔多係 Lunch Time, 一於食咗晏先。去到間 Cafe floris, 入面好港式茶餐 Feel, 自不然諗起 Cafe de Coral, 不過，呢度有 All day breakfast, 由於一朝早已經食咗隻熠蛋，就打破咗食奄列嘅習慣，嗌咗個英式早餐。牛油多士好安全，但啲煙肉就真係咸咗啲，同埋啲焗豆，都真係由細到大都唔太識欣賞，但好彩有佢先至令呢餐無咁咸。呢餐盛惠六磅四，有橙汁同埋奶茶，其實平過香港。



食完午餐，週圍行吓之際，見到架幾神奇嘅榨汁機


終於嚟到告士打道，去到匯豐諗住開戶口，點知又話要其他嘢，開始頭暈。放棄了...


行過嚟嗰陣，見到一座好宏偉嘅建築，係 National History Museum. 返程嘅時候，決定走一轉。


一入去就俾幅恐龍骨招呼


根住，就橦咗入去一間好大，睇石頭嘅房

間房嘅最盡頭，就 Show 咗啲珍貴嘅石頭

例如火星帶落嚟嘅岩石咁


睇完石頭，都睇吓成千幾年嘅古樹，我諗如果係中國嘅話，呢棵樹或者都已經成咗精

其實重有好多展品，不過戶口未開到，都係閃咗先 

臨走之前，竟然俾我逛到《龐貝末日：天火焚城》嘅實物


又係開戶口時間，問咗 NatWest, 唔得，去 RBS 一樣嘅答案。見到林保堅呢嘅車行，又剛剛有人試車，型係幾型嘅，不過車對我嚟講未係必需品住。


正當萬念俱灰嘅時候，見到巴克萊銀行，橫豎都係，試埋佢。哈! 竟然唔使住址證明，有本英國 Passport 就得，於是就 Book 咗個 Appointment 過兩日開戶口。

搭地下鐵返歸，不過由於罷工，班次疏咗，又正值放工時間，所以都好多人吓。


本來想沿住嚟嗰程搭東行線返返去，但都係太多人，於是就去西行線月台，再轉地上鐵閃人。

人生之旅 - Day 15

要去攪申請 National Insurance Number, 俾 Flatmate 提醒地下鐵罷工，好彩個 Office 附近重有地上鐵搭，但都提早咗出門。

過到去已經係食晏時間，求其搵咗間舖食咗個 Chicken Burger 餐。即叫即整，薯條略嫌太多，件雞就太咸同好多炸粉，營養價值好低嘅一餐。

食完時間尚早，但都搵咗個 Office 响邊先，都幾偏僻吓，呢區似係回教徒住嘅地方，好多人都著到包頭幪面咁。重有少少時間，週圍睇吓，見到有枝未被吹散嘅蒲公英


差唔多時間，入去 Office, 交低咗張預約通知等嗌名，原來已經好多人等緊。夠鐘，就有人嗌名做 Interview, 無乜特別嘢，只係問咗幾時到，住响邊咁，不過要等佢填好張 Form, 影印吓啲文件咁，都攪咗成差唔多成個鐘。

攪完又週圍行吓，無乜特別，返程嘗試响火車度影月台嘅全景，不過火車最後開得太快，個 App 影唔到落去