嫁女

公司好耐都未有過喜事，一嚟就係第一次嫁女，有少少形容唔到嘅心情。

約咗人打牌，早就去到，新郎哥剛剛出咗嚟，新娘子換緊衫，佢今晚都有排忘，打咗個招呼，放咗佢走。未有人到，影吓全景，再影吓佈景。今次個人名牌好特別，唔係就咁 Grand 少少嘅草書就算，而係將公仔溶入人名嘅設計。

Views: 都會海逸酒店8樓 by Shane Ng

n 君遲遲未到，人家三缺一，我哋就三缺n... 新娘子換好衫，閒談幾句，無乜點瞓過的說。放走咗新娘子，再同到咗嘅麻雀腳食住餅傾住計等。


等到人齊，可惜所有枱已經 Occupied. 只好鋤D, 鋤咗幾鋪，有張麻雀枱吉咗出嚟，大家蜂擁而上，好攪笑。不過好耐無玩，已經唔係太識玩，碰同上都亂咁嚟，叫錯晒，不過都俾我一開局就對對糊冧莊。可以玩嘅時間不多，玩咗剛剛好一圈就收枱。

大會準備儀式迎接新人嘅同時，都準備好手機，著咗個 Burst Mode. 點知... 部機 Short 咗，剩係影得一幅相...


乳豬歌係 Be Our Guest, 呢首係最穩陣嘅歌，唔老土之餘亦將個 Focus 擺咗响客人到。12道菜，美味非常。不過個待應分得好急，亦收得好急，重要碟碟菜都分好晒，攪到坐响隔籬嘅美寶 BB 食唔切...

中場休息嘅時候，發現原來有啲好有心思嘅擺設，頭先掛住打牌無留意到，點都要睇真啲。


整個流程偏向平淡，可能新郎哥比較內斂，中場無攪到乜嘢天才表演，成個婚宴可以用安全嚟形容。其實好多女人別無所求，但求個男人穩穩陣陣，安安全全啫!

祝一對新人白年好合，永結同心!

再見 Fitness First

Fitness First 上環分店廿八號最後一日，因為佢又未搵到新地方，其他分店又唔就腳，今日去辦退會手續，幫我填 Form 嗰位姐姐話，有成千五人退咗會?! 重話噚日係最後一日退會，幫我填返噚日嘅日子咁。

就咁樣結束咗生活上嘅一個習慣，好兒戲。睇吓 Join 唔 Join 附近間 Physical 先。

殖民計劃

中共對香港嘅殖民計劃，一路都係以陰謀論為主導，實質上好似無乜直接證據。今日見到呢單新聞

智經研究中心發表研究報告，探討香港未來的人口及勞動力需求。報告推算2031年，本港生育率將會是1.19，低於發達國家大約的1.9，而人口增長率只有0.6%，建議鼓勵雙非兒童及家長有秩序來港，將有助紓緩人口老齡化問題。

中心稱有數據顯示，約6成雙非家長有專上程度的學歷，所以認為他們並非只為本港帶來負面影響。

報告又指，本港現時的勞動人口達360萬，但研究發現到2031年，將下降至350萬，所以報告認為屆時將額外需要50萬勞動人口，才可以維持勞動人口的參與率。

智經認為，若不正視低生育率、人口老齡化及勞動人口萎縮等問題，將會削弱香港的競爭力。

似乎已經赤裸裸咁講咗成個故仔出嚟:

1. 响基本法度，將中國公民响香港生嘅仔女即時成為永久性居民 (a.k.a. 雙非)
2. 1999年，人大釋法去 Reinforce 成件事
3. 2003年，趁沙士完後，百廢待興，引進自由行，將製造雙非程序簡易化，等待時機量產雙非
4. 多年來，鼓勵年輕人北上「尋找機遇」
5. 今年施政佈告，再資助年輕人北上讀書
6. 家陣再叫雙非連同父母一家嚟香港，完成整個計劃

呢個雞棚都搭得幾靚，故仔講完，都未講每日嗰150個單程證配額，你醒未呀?

遊客

你知道嗎? 其實好多地方，都係用自己嘅言語溝通，感謝大英帝國，旅遊嘅時候，英語好多地方亦都通行。

遊客去到人哋嘅地方要講返自己嘅言語，唔 Join 旅行團都真係無乜選擇。我諗得到例外嘅地方，就只有關島。關島隨街搵一個當地人都應該識日文，點解? 因為多日本人。有幾多? 一齊睇吓數字。

關島嘅 GDP 有大概47億，當中旅遊相關行業佔9%, 而日本𨘋客佔咗7成。照乘返，日本遊客對關島嘅 GDP 貢獻咗6.3%左右。

既然日本遊客對關島嘅 GDP 唔係影響太大，咁點解重有咁多人識日文? 或者重點早已經唔响 GDP, 因為關島人除咗識日文，重會睇日本嘅電視節目，同埋學習日本嘅文化 (當然，香港都會被迫普教中，有中央台, 同被學習包容大陸文化)。當大國在堀起時，有無諗吓點解一個二戰戰敗國可以文化入侵全世界?

關島對日本人嚟講，係陽光與海灘，輕鬆休閒嘅地方。
香港對大陸人嚟講，只係由奶粉到包包都有嘅超級市場。

神之約會

話說星期日十二點先起身，部手機著返個 Mobile Data, 個 Whatsapp 就自然有唔同嘅 Message 出現，馬拉松有關嘅就梗，另一個就係啊神帶埋個女返香港，約出嚟食飯，亦都同其他人約好咗時間同地點。

話說之前嗰日去咗睇戲，無做到 Gym, 於是決定下晝做 Gym, 夜晚食飯。

地點係灣仔嘅一間酒吧，無乜人，都幾啱傾計。到咗無耐，啊神到，一齊入去攞位，先送咗隻之前七仔嘅路飛，再傾多一陣計，Ju 姐亦都到場，傾咗一陣，另一位爸爸小輪亦都出現。叫做個 Buffalo Wings 加芝士薯條做頭盤。

之後，主角羅賓登場，大家又攬又抱又錫咁，玩得不亦樂乎。之後又嗌咗 Fish and Chips, 同兩個 Burger. 好大份的說。大有大食，細有細食，啊神拎咗件 Microsoft 嘅圍巾出嚟，都真係要影相留念。

為咗呢位酒吧入面最年輕嘅顧客，大家又大合照咗一幅。

小輪要走了，媽媽亦帶羅賓返去瞓覺，剩返三個人再慢慢傾，同埋清咗嗌咗嘅嘢食，Ju 姐清咗個 Fish & Chip, 我同啊神兩個大男人去食一個包，女人何止頂半邊天。時間差唔多，埋單之後，再响街邊傾出一個一班大學女同學重未嫁得出嘅原因，笑得不亦樂乎。起錨回家，因為食得太多，決定犧牲唔睇 Arashi, 行返屋企。

赤道儀

想影銀河，決定買個赤道儀玩吓，夠用就得嗰隻。搵咗一輪，有Polarie同Sky Tracker. 揀咗 Sky Tracker, 原因係香港有代理，可以上網訂之餘因為大陸原廠運落嚟，平過任何地方買。

因為唔係影開單反，所以要買多個波頭，聽聞 iOptron 個波頭都好實淨，所以順便買埋。有埋個 Polar Scope, 聽聞可以對得準啲。亦因為會响天黑嘅時候用，買咗白色易睇啲。

拆出嚟比相像中大，亦都好墜手，似乎用嚟做啞鈴都不為過。Anyway, 送埋個袋，都叫方便攜帶嘅。

希望搵日好天，可以去試機。

華爾街狼人

好耐未入戲院去睇 Leonardo DiCaprio 嘅戲，對上嗰次已經係 Titanic 嘅事，再加上個名夠吸引，一於去捧吓場。

無獨有偶地，同 Titanic 一樣係三個鐘嘅故仔，要 Dehydrate 成個人先，免得中途要去洗手間掃興。買飛嗰陣，見到佢係三級片，預咗係操口橫飛，F word 說不停，但估唔到佢有唔少露骨嘅場面。可能因為係真人真事改篇，所以 Leonardo 嘅演男主角嘅方法有少少誇張，就好似為咗錢就令到人失去理智咁。

頭嗰兩個幾鐘，就係講男主角都幾荒旦嘅行為同經歷，令到套戲嘅情緒起伏都幾大吓，可以掉咗粒摧淚彈出嚟之後就可以突然間開 Party 咁。所謂有咁耐風流有咁耐折墮，之後嘅故事就開始變成說教片，劇情太過「估得到」。

Leonardo DiCaprio 嘛，個人老咗同肥咗好多了，星味都有嘅，但唔似其他荷里活男影星咁，好似少咗份成熟嘅佬味。點解呢?

軍醫

火影忍者中有一段係講第五代火影綱手嘅一段經歷，大概係因為自己嘅細佬响任務嘅時候死咗，建議每個小隊都有一位醫療忍者，希望可以減低執行任務時嘅死傷，以完成任務。

我以為，一個奧運代表隊入面有隊醫係 Common Sense, 但原來唔係。所謂「工欲善其事，必先利其器」運動員訓練、練習、準備、比賽時受傷係正常不過嘅事，有專業人士响度可以即時處理，甚至建議放棄賽事。個前香港泳隊代表重要話人輸咗就姓賴，佢咁巴閉當年都拎個梗頸四，佢唔會天真到覺得一個小伙子可以第一次就摘金啩? 人哋都係攞經驗，其中一個經驗，就係話俾你知有隊醫，成績可以好啲，明無?

香港體壇俾一班無 Common Sense 同埋唔肯聽人話嘢嘅人話事，可憐!

象牙塔2

戴教授寫咗篇開天索價vs明碼實價，我唔明點解一個真普選，有公民提名都唔收做明碼實價。明碼實價係講緊一件貨品嘅真貨而無瑕疵，咁戴教授所講嘅普選係乜嘢普選? 唔通被人剝奪提明權同參選權都可以叫做普選?

究竟佔中係乜嘢一回事，依家知道了，亦唔抱一絲嘅期望。

普粵之爭

語言係溝通嘅工具，同職業一樣，無分貴賤 (笑!)。但廣東話係我嘅母語，無論係寫定係講，都係廣東話(邊個話廣東話唔可以我手寫我口?)。係㗎，寫嘢嚟講，我似乎已經唔記得點寫書面語，可能只係得返小學程度。

聯合國話全世界有6000種語言，未來100年會唔見咗一半，即係每個月都有兩三種語言消失，希望廣東話係唔係其中之一。

賀歲片

今日偶然機遇下要過尖沙咀，做完少少嘢，走去睇戲。好耐未試過一個人睇戲，但賀歲片，因為無一家大細，似乎啱自己睇多啲。

之前都糾結咗一輪睇邊出，作為發哥嘅 Fan, 本來想睇《賭城風雲》，但俾某君嘅評語，而掃興。跟住《金雞sss》又鬧出映射風雲，《大鬥天宮》多似乎太多特技，攪到好似無乜戲好睇咁。不過，前兩日聽到有人話想乜都唔諗笑一餐嘅，《賭城風雲》係一個唔錯嘅選擇，於是就去咗 iSquare 睇戲。其實，除咗發哥之外，霆鋒都係另一個入場嘅原因，剩係睇兩位型人鬥 Chok 鬥演技其實已經值回票價。

戲本身夠直接，亦夠笑料。洗牌功夫一開頭都係啲魔術洗牌手法，因為呢幾年睇得太多魔術，已經無乜感覺，但洗牌洗到可以好似韻律泳咁兩個人一齊洗，就真係第一次見。賭戲要出公海，似乎已經係慣例，亦都似乎 Assume 咗入場睇嘅人明白因乜事要出公海，無再响對白度交待。作為賀歲片，大團圓結局就一定，但最後一個 Shot 就有少少驚喜。

之前電視又播返《賭神》，發哥嬉皮笑臉嘅樣同《賭城風雲》一樣，都係無咗陣星味，唔夠吸引。霆鋒份傻個樣嘛，都真係傻得幾勻稱，一個幾討好嘅角色。

By the way, 呢出戲原來 TVB 有份，唔怪得呢幾個禮拜《賭神》、《賭聖》、《賭俠》出晒嚟了。

新春行大運

今日做咗領隊去行維多利亞城界石


十一點四左右出門，可能因為仲係農曆年關係，完全唔塞車，十五分鐘就到咗。

悶悶哋，開咗個 App 影全境，今次用咗 Google 嘅相機 App, 做 Stitching 做得好好多，亦見唔到重複嘅人像，有些少 Misalignment 但對於街景嚟講係可以接受，似乎 Weekend 可以再玩了。

Views: Central And Western District, Hong Kong by Shane Ng

跟住收到有人話到咗，但成個巴士總站都唔覺有人影，原來搭錯車，去咗第二個總站。人未到齊，時間尚早，見到一個紀念碑，原來係同卜力有關，反正咁多年都唔覺，影低佢。

人到齊行入去西寧街最入面嘅球場睇界石，石就重响度，但唔知邊個潑咗啲油上去，污糟咗... 無奈地影相，之後行返出去食 Lunch. 食完 Lunch, 經蒲飛路直上薄扶林道，除了斜，還是斜，下次做 Gym 可以試吓呢個斜度熱身。上咗薄扶林道，行多一陣，就到第二個界石嘅位置。

頭兩個界石因為都係响市區，並唔係難行，跟住就要上過百級樓梯。上到一半，大家都要抖抖，興起去要石春路，玩玩吓玩石春路的懸空照，一班好健康嘅細路...


因為第一次行呢條路，所以有少少迷路，但係有 Google 大神嘅庇佑，成功去到夏頓道界石。跟住出發去舊山頂道，大家都想去歷險，所以就帶大家去張保仔古道行吓。但出師不利，Miss 咗一個路口，要兜一兜返轉頭先去到入口。

點知，配水庫入口嘅入口，因為工程關係封咗。於是就入去一個無咁多人行嘅入口。其實前一晚做咗少少功課，大多數人都係由舊山頂道行過嚟，無乜人提過由寶珊道入，所以唯有當配水庫做「正常」嘅入口。呢個無咁多人行嘅入口，似乎都幾輕鬆，直至無路可走就唯有爬。


有驚無險，走出張保仔古道，行上少少，就見到界石，難免開心到彈起。


跟住上馬己仙峽道睇界石嘅遺址，上次嚟已經俾人拆去唔知去邊，今次因為時間嘅沖刷，已經不留痕跡。之後去寶雲道，有啲幾攪笑嘅 Graffiti

同埋唔知邊個刻落去竹樹嘅字，雖然唔太欣賞呢種行為，但內容都幾 Update 吓...

再經過姻緣石，行多一陣就到界石，徒弟見我抖得咁過癮，佢又過埋嚟影相。

又行多半個鐘左右，天黑都齊，亦都到咗最後一塊界石，不過因為附近有工程，俾水馬圍住咗。

旅程完畢，飯後閃得!

後記1:
Google 個 Auto Awesome 嘅較果都幾好

後記2:
唔知係咪又瘦咗，條澳洲買返嚟嘅牛仔褲已經唔太啱身。

初三

唔使拜年，見無乜嘢做，睇吓《矛盾大對決》，前兩日都睇咗幾集，本來都係行行哋，今次呢集係搵返最強嘅矛 (鑽孔機) 同最強嘅盾 (鎢合金板) 出嚟玩，有夠精彩。話說鎢合金板已經贏咗3次，今次搵嚟全球市場佔有率第一嘅 OSG 嚟玩，最後，鑽頭磨蝕，鎢合金板成個碎咗，正正同矛盾嘅故仔咁，夠晒戲劇化。


因為有兩個鐘，之後嘅對決係講火車員工同火車迷之間嘅對決，一來新年前徒弟仔抽咗火車扭蛋，聽咗幾個故仔，二來個節目介紹個對決又介紹得好攪笑，就繼續睇落去。其中有一條係問邊條路段嘅路軌係由三條軌組成，有少少汗顏，水晶球事件又出現，因為徒弟仔係講過呢件事。睇到片段之後，我想像嘅路軌擺位同現實係差好遠，証明我對於火車嘅事無 Sense...

所謂知識就是力量，睇完知識值咁豐富嘅節目，個人充滿力量，走落街行吓影吓相咁。

樓梯街嘅街頭書法

太平山街嘅畫廊

磅巷嘅咖啡店

三影雀仔橋

原本重响卜公花園同嚤囉街影咗啲 Photosphere, 但效果強差人意，第日換過第二個 App 再影過。

食完飯，上網典睇吓，等睇 Derren Brown 嘅節目，今次係嘗試將神顯示响無神論者面前，不得不配服。之前响 YouTube 睇過，但佢嘅節目拍攝方法，可以一睇再睇，同埋有字幕，好似明多咗啲。之後睇藍精靈，補完返聖誕睇藍精靈2嘅情節。

年卅

前一日唔見咗個鎖匙包，流落咗响巴士總站，好彩美寶BB幫我拎返。雖然一點半放，但似乎各人都好忙，兩點鐘一大班人去食晏，之後返屋企嘅返屋企，返公司嘅返公司，Xperia Z1 六人組就落銅鑼灣 Sony 個客顧服務中心做防水檢查。

落到銅鑼灣，竟然無人知東角中心响邊，要 Google 大神指路，上到去攞飛仔等 Check 機，埋到 Counter, 個姐姐話要七點半先可以攞機走，但我四點半要離開銅鑼灣，所以唯有放棄。因為六點要去到天水圍，我就先行離開，其他人去行花市。

正常嚟講，係可以搭969一程車，但係由銅鑼灣去上環嗰程車實在太費時，所以搭咗程過海巴，响紅磡搭西鐵直衝天水圍。去到天水圍站，想搭個巴士，但個個都話去巴士站好麻煩，不如搭輕鐵，最後，發現咗個巴士站就响輕鐵站出面，搭上一程969, 就去到啊哥屋企。

啊嫂訂嗰個盤菜，大大一鍋，有蝦有菜有魚有肉咁，好滿足。返到屋企，似乎有啲嘢唔記得咗，去尖沙咀攞年糕!有一個鐘頭嘅時間，好彩搭地下鐵路，話咁快就到，任務完成，好重料嘅年糕，正!

踏入子時，記得之前搵大學作品 Backup 嘅時候，有張福字嘅 Wallpaper, 就拎咗出嚟放咗响 Facebook. 得800x600嘅 resolution, 似乎用嚟做 cover photo 要被 scale up, 睇嚟要做過張高清，可惜部機會草書嘅字型，都係唔攪住。

夜晚無乜嘢做，睇吓日劇同之前錯過咗嘅美食風球2嚟睇。

尋根究底

話說，有人將 Napoleon: Total War 嘅片頭釋咗做唔同方式嘅中文，真係好強!


搵 Google 大神睇吓出處响邊，似乎大概係 2010年2月左右，不過就唔知係 Video 嘅 Comment 出現先定係黃龍騎士團論壇嘅翻譯出現先。一開始，都算正經。

2010年3月2號，遊俠NETSHOW論壇開始出現惡攪版，一個鐘頭左右被轉載到黃龍騎士團論壇。

2010年3月10號，响寬帶山論壇出現各方言版同埋 Java 版...

其他版本亦陸續出現，但詳細時間已經考究唔到，但應該係同年5月之前嘅事。

最有趣嘅係，當用聖經版嘅其中一段「現今他們都俯伏在塵土裡」去問大神嘅時候，同時亦出現好多聖經嘅經文...

日常 3

噚日本來諗住執一執間房，但最後下晝瞓咗，夜晚又去咗做 Gym, 最後乜都無做到。返到屋企，再睇發哥嘅賭神，可能已經睇咗好多次，同埋當年嘅配音，所以都係去到上賭船之後先開始有返啲 Feel. 廣告時間，睇到 Cartier 搵劉德華拍嘅廣告，真係型好多。之後再睇進擊的巨人就 close 咗個 Windows Media Center 了。攪吓攪吓夜鬼症候群發作，睇吓日劇上吓網咁，攪到 4 點幾先瞓。

今日瞓到 12 點先起身，食完 Lunch 就開始執嘢，將半年幾嘅信清咗佢，清咗成個下晝，電視播緊嚦咕嚦咕對對碰同 Running Man 個 BGM, 唔係咁吸引。夜晚响電視睇咗 Derren Brown 嘅 Fear and Faith, 其實之前都响 YouTube 睇過，但呢一輯係可以一睇再睇。

事過境遷

上年用咗特別的訓練技巧做 TechDays Speaker 嘅訓練。今年 TechDays, 似乎無人講嘢了。一來無需求，二來似乎今年都好似無乜人有時間做訓練，三來個人計劃進入倒數階段。

呢排制定緊一套教材，順便訓練徒弟仔嘅演說能力，本來只係無乜太大關係嘅科目，但經過兩個禮拜之後，見到條路點行，希望四月前可以完成。

愛最大

鐘意啲高亢，高強度，充滿正能量，令人精神嘅歌，前幾日响電台聽到謝霆鋒新歌，啱晒合尺。今日响 YouTube 度搵到返嚟聽，Loop 咗成朝，聽落係一首啱唱 K 嗰陣嗌嘅歌，正!

文化差異

有無諗過如果特別的朗誦技巧如果响台灣發生，個故仔會點樣發展落去? 適逢呀梁同學係大學生，《大學生了沒》必定請佢上去表演一次，收視一個唔覺意好嘅話，甚至可以巡迴各大綜藝節目甚至上埋《康熙來了》，賺返幾千蚊港紙，對大學生嚟講都係一個唔錯嘅收入。人出名，自然可以代言好多嘢，去創造自家品牌又得，甚至宣揚朗誦「藝術」亦得。得出嘅結論係: 無限嘅可能性

可惜梁同學係生活响香港，就只可以响度「一片冰心在玉壺」咁接受報紙訪問。問題係，點解一個社會話題，响台灣可以商業化，香港唔得? 一個無競爭嘅娛樂市場，就只有一班 YouTuber 响度拍短片去抽吓水嘅程度而已。

發夢王大歷險

去咗數碼港睇戲，小雲話病咗，响麥記拎咗杯熱水食藥，再响草地行一陣，就夠鐘入場。睇完戲，再出草地，一出商場門口，就見到大大個落緊山嘅太陽，不過煙霞太勁，只係屬於 B Grade. 風似乎太大，兜咗個圈就返入商場。

數碼港嘅商場，當然都係無乜好行，而且係星期日，剩係得返啲食肆開，都係兜一兜就走人。搭小巴出北角，送咗小雲入閘，自己就去麥記食嘢。

一入麥記，一大堆外傭，都唔知發生乜事，總之好嘈。本來想食個麥香雞就算，但見到個扭扭薯條，就好任性地叫咗個魚柳包餐加兩個半去換個扭扭薯條，聽日又要做 Gym 了...

失而復得

話說前幾日同徒弟仔分享我以前做過嘅作品，好似啲 PowerPoint 同網頁咁。其中最早期嘅網頁，無意中發現到一份無字預言書，都有七成準。但網頁中有部份因為死 Hard Disk 同埋轉 Web Hosting 嘅關係，已經變成死 Link.

噚日心有不甘，決定試吓搵返出嚟，又俾我响其中一隻唔用嘅 Hard Disk 搵得到，Lucky! 網頁嘅內容搵到就不在話下，最珍貴係搵到當年未有 Blogger 之前寫嘅日記，細味之下，如今又一番景象。

搵返網頁、日記之餘，重有唔少作品，包括 15 年前畫嘅呢幅「My Computer」


同埋呢幅 Wallpaper

大陸化

見到一篇文章話大陸有一批「中國式繁體字」入侵 Android, 做咗少少 Study, 就等我穿鑿附會吓成個故仔係點。

第一，GB18030 技術上嚟講只一套文字嘅標準。電腦上面嘅文字包含編碼同字型。編碼係電腦用嚟儲响 Hard disk 或者傳送嘅格式，字型係响個 Mon 度 Display 出嚟嘅樣。技術上 GB18303 只係同 Unicode 差唔多嘅編碼方法，只不過 GB18303 嘅 0001 同 Unicode 0001 係代表緊唔同字咁解，咁編碼唔同，字型唔同亦唔出奇。

第二，GB18030 係包含中日韓同少數文族嘅字，唔單止係繁體中文。要話佢文化入侵似乎有少少講唔通，起碼佢入侵唔到日本同韓國。

第三，GB18030 包咗一個 SimSun18030.ttc (宋體) 作為字型嘅參考，Android 係為一個 Open Source 嘅 Project, 根本唔 Care 啲字有幾咁啲字係點，總之有得用就用，只要 License 用得就OK。加上 Google Cheap, 無自己整字型，沿用 SimSun18030.ttc 係一件普通不過嘅事。

第四，如果以字體嘅美觀度嚟考量，宋體點睇都靚過細明體囉... 就好似 Arial 點睇都靚過 Times New Roman 咁。

所以成件事唔駛大驚少怪住，直至有一日你响地鐵見到北角變成北角為止。

上堂

今日博士開 Talk, 講 Big Data + Data Mining. 我諗呢堂係咁多年嚟第一次上堂，溫故而知新，一樂也。

調整

話說小雲間公司搬咗過嚟上環，但呢幾日都唔太得閒，噚日終於約咗佢出嚟食晏。食完晏，帶佢行吓上環，講吓故仔咁。呢幾個星期調整好心態後，個人輕鬆好多，或者有啲事情的確唔可以急嘅，慣咗走得太快，別人跟唔上步伐，係今次學到嘅事。

日常 2

又去深圳做嘢，呢排都係搭過境巴經深圳灣上去，可以瞓多幾個字，再早多幾個字到個客度。不過今朝，撞著個蹺腳坐嘅女仔坐响隔籬，係，個位係好闊落吓，但係可唔可以坐得好啲呢? 你咁坐法，攪到我個位好迫啫...

不過唔知點解，响深圳灣入親中國境個 e道，啲機一係就要 restart, 一係就前面嗰條友唔識擺回鄉卡或者唔識望鏡頭或者打指模，都唔知邊個咁聰明要做埋面部識辨先過到關，真係好討厭。

Anyway, 一朝早開個頭唔係太好，但工作總算順利，方法總比問題多的說。因為太多事情，所以返落嚟之後，又返返 Office, 不過 Accomplishment 唔多，只係完成部份工作。悶悶哋又睇係徒弟仔份 assignment 做成點，睇睇吓又走咗去睇以前 Technical Session 嘅 Slide, 其中一份係講 Linguistics 嘅，入面有啲例子點樣拆一個長字，跟住徒弟仔就彈咗呢個字出嚟: supercalifragilisticexpialidocious. 點睇都唔識拆，但作為一個 Linguist, 當然要問吓 Google 大神，Wikipedia 其中一段係咁講

The roots of the word have been defined[4] as follows: super- "above", cali- "beauty", fragilistic- "delicate", expiali- "to atone", and docious- "educable", with the sum of these parts signifying roughly "Atoning for educability through delicate beauty." According to the film, it is defined as "something to say when you have nothing to say".

但係 cali- 解 Beauty, 都真係未聽過，再問吓大神，BBC 原來做咗段訪問咗 Sherman Brothers 其中一個人，話 califragilistic 係無意思，只係佢哋兩兄弟傾出嚟嘅一個發音，徒弟仔有啲失望。於是响個 slide 度搵咗 pneumonoultramicroscopicsilicovolcanoconiosis 出嚟，起碼個字有意思，唔係堆切出嚟。

時間不早，一齊閃了。

白泥日落 2014

話說星期五女徒弟話大退潮，想去下白泥睇吓，剛剛响深圳灣搭跨境巴士返香港，天色麻麻地，但作為一個夕陽控，幾大都要去，於是就一班人星期六出發。

約咗兩點半元朗西鐵站，一點半出門，一點八上巴士，原本諗住有一個鐘頭瞓一陣，開咗個九巴 App Set 好落車提示，點知半個鐘左右就差唔多到，成程車都係八個字，好快。行埋過西鐵站，時間尚早，唯有等。三點左右，大遲到嘅徒弟仔都到埋，起程去搭小巴，不過無人識去小巴站响邊，唯有請 Google 大神指點迷津。四點左右到下白泥，一班唔識路嘅人搭到去總站，要再行返轉頭出泥灘。因為煙霞關係，雖然重有個幾兩個鐘先日落，但太陽已經唔太刺眼，直望都唔怕。

跟住，一班人响度搵蟹...


除咗反應王系列:


因為部 Z1 有 AR Effect Mode, 大家就開始瘋狂自拍:


差不多到日落時間，大家就開始唱夕陽無限好，然後回程。


出返去元朗市中心，原來想去田中食壽司，差不多八點，好多人排隊，去咗間附近嘅大排檔食。食得都好飽吓，完本來諗住返歸，點知俾徒弟仔挑機食甜品，對於喜歡接受挑戰嘅人嚟講，小弟樂於奉陪，於是就食咗個雪糕西米露。真係要返屋企，錯過咗一班巴士，等咗十分鐘先再有，十點鐘返到屋企。

因為噚晚食得太多嘅關係，所以今日要做 Gym 了...

Mr. Strong

細細個嗰陣，我係一個好瘦弱嘅人，所以好鐘意睇大力水手，好好奇乜嘢係大力菜，點解可以令人咁大力。差唔多時候，就睇到呢條片嘅粵語版:


嗰陣時嘅譯名叫強壯先生，唔知係咪因為呢條片嘅緣故，開始鐘意食蛋，亦開始研究點煮蛋。呢件事無耐前同人提過，之後就响書局見到有全套卡通賣，但我似乎只係鐘意強壯先生，所以無買到。

呢幾日無意間見到麥記全日都有早餐，其實無乜特別，但其實重有 Mr Men & Little Miss 公仔換，我其實唔知成卡通個名，但見到啲公仔就知發生咩事。呢啲童年回憶，當然要儲返個嚟留念，於是就買咗個餐加錢換咗返嚟，不過換嗰陣見到，依家俾人譯做大力士先生了... 食完個餐，又要做 Gym 了...

呢啲諗吓就會發生嘅事，個水晶球都真係靈!

2013回顧 展望2014

原來上年無做過回顧，其實無乜好回顧嘅，但今年嘅展望，同上年有好大關係，就係咁意講吓。

上年，因為一個大環境，加兩個人，加一套電影，計劃咗今年要做嘅事。本來係九月後先啟動，因為一個意外提前咗一個月。計劃啟動之後，做咗好多事，好似個人方面，學跳舞啦、去旅行啦、行畫廊啦、睇表演啦、同女生交流吓咁。公司方面，開始加入班後生嘅同事嘅活動、再度執起相機去記錄底大家嘅笑容、準備培訓計劃。

上年，出多咗街，剩係同同事們食飯睇戲唱K 嘅次數, 都已經多過之前三四年嘅總和，睇落好似無以前咁自閉，但其實我無講多咗嘢。以前覺得人微言輕，唔想浪費口水，依家覺得自己份量太重，講咗出嚟會影響得太多人。所以，到最後，自己都係一個聆聽者。我諗要搵一個可以口到我把金口嘅人，要係一個同自己有對等關係嘅人先得。

今年，要做嘅事就係去實行上年嘅計劃，要聯絡適當嘅人、重新整理個人履歷、調整流動資金咁。最後一項尤其重要，作為一個為期最少一年嘅作戰，最忌糧水不足，所謂「三軍未動 糧草先行」，資金方面係重中之重。

至於公司個培訓計劃，事關調整新人質素，最後實行成點，好睇管理層點去投資一位新人，我都唔太控制到。

I am ready for 2014!

再見2013

2013年最後一個工作天，放工後一班同事去新開嘅餐廳食晏，有全天候英式早餐, 但我唔食煙肉，無點到，最後嗌咗個雞皇局飯。

當等緊餐嘅時候，發現大家都係用緊同一部電話，於是就諗住影睇一行5部 Z1 用同一個 Lock Screen 嘅壯觀情境。問題係要有一部電話去影，好彩徒弟仔重响個過渡期，多帶部舊電話，點知，部電話壞壞哋，要 Reboot 的說。算，啲 Order 陸續上枱，食完再影。

女徒弟點咗個早餐，個樣好吸引，不過除咗煙肉之外，重有焗豆，唔係咁合心水，好彩無 Order 到。食飯嘅同時，都 Show 咗啲舊相俾大家睇，包括一張12年前嘅肥仔相。食完嘢，再拎徒弟仔部手相影相，點知，無位... Delete 咗部份 App, 終於影到。

影完再傾多陣計，就散水，我要準備出發去淺水灣影相。前一晚大致執好工具，但都係漏嘢，唯有再折返屋企。搭巴士又上錯車，要落車再等過，時間一分一秒咁過，對住個天文台 App 睇日落時間，再對住個 Google Map 嘅行車時間，有少少著急，咗十分幾鐘後差唔多五點，啱嘅車終於出現。啱嘅只係第一程車，要轉車，又要等，好彩唔使五分鐘就有車，但 Google Map 個車程，都好似爭啲啲咁。好好彩地今次唔塞車，山路嗰程亦好暢順，五點半到，大把時間剩。


影完相都只係6點過少少，時間尚早，但天已經黑齊，見到金星，用長少少嘅曝光 Zoom 埋去試吓影，效果真係得啖笑。之後玩 Light Painting 但又無帶 LED 燈，用手機試吓先，螢幕因為有唔同嘅顏色，效果 OK, 但幾難控制。最後都係 Download 咗個 App 去控制手機個 LED. 响搵 App 嘅時間，發現有唔少 App 都要用到 Network Communication 嘅 Permission, 開盞燈啫，上網做乜鬼呀?! 搵到個剩係要 Camera Permission 嘅，用法就手，啱晒玩 Light Painting. 寫完個 2014, 返歸。