朝聖

今日去咗 Mikiki 度睇星矢展，地鐵唔到，但係101直到，一個鐘嘅車程，中間瞌咗一陣，用手機較埋個 App, 差唔多到站就有提示。提示一響，大大個 Mikiki Logo 响眼前，但個車站就遠咗少少，要行幾分鐘左右先到。

未入展覧場地，就有件雙子聖衣同我打招呼:

行多兩步，就不得了。大鐘、女神像、星矢、聖衣箱咁，而且手功一啲都唔馬夫。


不過最靚都係啲場境，本來都無點留意，但係影完幅相之後，先見到真係成個曙光女神個背景，感覺特別唔同。

不過見到啲公仔冧晒檔咁，略嫌美中不足。


咁多展品，我諗最有收藏價值都係呢啲手稿:


影影吓差唔多兩點，Cosplay 嘅人出嚟，都幾犀利，最起碼身高比例真係啱漫畫嘅設定，尤其係處女座，好入戲唔合埋對眼。

不過 Cosplay 的確唔易做，睇住佢哋啲鞋底鞋踭都咁高，似乎平衡感少啲都會跌落地。

就咁响 Mikiki 消磨咗一個鐘，閃人。

Yet another Christmas

好幾年無寫過聖誕，可能無乜好寫。今年係特別嘅一年，想將記憶留一留底。

聖誕前夕嘅一日，係公司嘅 Party, 不過有咩好得過一朝早出現咗兩句咁扺死嘅台詞：

不過似乎無包禮物嘅唔單止係男主角，好多人都係返到嚟先包。我嗰份就太大份，為咗下世唔使做樹，搵個大少少嘅膠袋封一封算。

好幾年都無响 Party 影過相，今年想影，就帶咗部相機，同個腳架。腳架大概只係影團體照先會用，所以都係放埋一邊先。

遊戲有Pictionary, 掉乒乓波，飛拖鞋，同世界之最。世界之最再分幾題，有最短、最長、最精、最靈活、最快、最夾。

最短，不外乎頭髮、手掌、身高之類，最後原來係姆指...

最長，都係差唔多，點知原來鬥長氣，輸俾個跑開步嘅，無計...

最精，似乎係數口要精，計數要留俾計開數嘅人，點知攪心算，失策了...

靈活，唔理，搵個做開運動嘅都好，但係... 面部肌肉???

最快，我對自己嘅 Reaction Time 係好有信心，當知道要睇顏色排次序，只係頭嗰一兩秒唔覺意留意到字，之後就將眼精速度加快，將啲字 Blur 咗，好快咁依次序排好顏了。

最夾，要兩個人，本來我諗除咗同我合作咗幾年之外嘅徒弟，都無乜點走雞。點知要用快子夾乒乓波，出事嘅係我，用咗少少時間搵唔跌波嘅方法，開始。最後，徒弟一個華麗嘅轉身，運好所有波，又掂咗。[相片欠奉]

玩完遊戲食嘢，過咗少少食飯時間，頭先玩遊戲又 Hyper 咗，所以無乜胃口，食少少嘢就算。食完嘢，係 Secret Angel 送禮物嘅時間，呢啲嘢有 Loop 唔出奇，最出奇係對方係 Angel 之餘又係 Master, 一起影相吧!

Secret Angel 送完到抽獎，抽完獎到大懲罰，其實都無乜嘢，只係扮吓五色戰隊咁。

大時大節有相機响手，不其然就會同大家玩「反應王」嘅遊戲，就係毫無準備下叫一個人，再影相，睇吓我㩒快門快定係佢擺 Pose 快。失敗嗰啲無謂失禮，成功嗰啲唔錯:

Party 過後，吹吹水，做少少嘢咁，再聽完徒弟仔講啲火車嘅故仔，閃。

約唔到人出街，唔代表要一個人過，上咗友人屋企探吓女，睇吓戲，傾吓計，好舒服咁過咗一晚，亦重拾咗少少正能量。攪吓攪吓成5點先瞓，都好耐無試過咁夜瞓，似乎夜貓基因並未年紀而消失。

因為太夜瞓，所以聖誕日12點先起身。睇吓日劇，做吓 Gym, 去啊哥度探姪兼打邊爐，Secret Angel 嘅禮物啱啱好可以氹到班姪。

Boxing Day, 又係12點起身，清埋 Dr. X, 太眼瞓，八點瞓咗... 咁就完結咗個聖誕假期。

滄海遺珠

呢幾個星期都不斷執相，一來攪關島嘅相，二來年尾又係差不多做回顧嘅時間。睇睇吓相見到呢張响遊船河影嘅相，一來張相一開出嚟就係羣星拱照格，自己做咗主角都唔知。

二來俾俊哥仔嘅 Good Pose，好夠 Power, 型到爆呀! 跟住再望上去太陽伯伯、小師弟、同神魔創造者嗰種含蓄嘅微笑同托腮嘅表情，令到番書仔嗰種興奮好突出，令到幅相好立體。

最殺食都仲係大家嘅笑容，滿滿嘅正能量由相到瀉出嚟，好正!

床上哈哈笑

前兩日去睇卓韻芝嘅棟篤笑，其中有一段係講男女關係响熱戀期嗰陣，大家都會改變自己，過咗熱戀期就會做返自己，即係所謂嘅「你變咗」。

我係想以做自己嘅方式去同人相處，不過似乎唔係好 Work. 似乎未來一年零三個月嘅路都係要自己行了。

日常 1

今日响深圳做嘢，搭火車嗰聽電台話關島附近地震，都唔知咩事，係咪我每離開一個地方一個月左右都會出事嘅呢? 97係咁，911又係咁，去澳洲旅行都係，家陣連關島都中埋，都真係太巧合，係歐洲嗰邊無事囉!

食 Lunch 嗰陣，叫做個刀拍黄瓜，有少少花椒，有少少辣，但天寒地凍，呢少少辣足夠令我發熱再出少少汗，剛剛好! 做完嘢走嗰陣，食咗10分鐘風先截到車，到福田口岸嗰陣已經6點，比平時晏咗少少。為咗買聖誕禮物，去咗深水埗，我記得有一條街有好多玩具賣。不過逛之前，先食個簡餐，為之後做 Gym 打定個底先。食完嘢，用 Deduction 嘅方法去搵返條街出嚟，原來係福榮街，一行出街口就見到好多聖誕裝飾，比太原街多選擇好多。行咗幾間，揀好咗，俾錢，閃!

落到嚟深水埗，無理由唔行電腦商場，反正隻 Mouse 唔見咗，要買返隻。唔使5分鐘就搵到啱心水嘅，又閃。本來想落旺角拎訂咗嘅另一份禮物，但手上又有公事包，又有禮物咁，都幾唔方便週圍走，而且 Agility 响旺角係唔少得，都係打道回府。拎住咁多嘢，唔太想搭地鐵，巴士! 咁啱又有一架 905, Lucky!

今晚做 Gym, 有少少攰，所以只係輕輕咁做。沖完涼後，著好褲著好鞋風好頭，再望住塊全身鏡，其實係除咗個肚腩之外，上半身都算練得唔錯，個肚縮一縮都呃得吓人。另一個做 Gym 嘅好處係無咁怕凍，即係前兩日12度都係一件薄嘅短袖底衫，加一件恤衫，再加件外套就 OK. Anyway, 換好衫，有少少熱，出到街都唔使著褸，一件長袖衫就攪掂，享受住冷風同體溫嘅沖突，好舒服!

太源街

放工落灣仔，睇吓有乜嘢可以做聖誕禮物。同事們都話太源街七點幾就收，但唔知係咪聖誕關係，過咗七點九，好多都重開緊。

太源街係一條好應節嘅行，Halloween 會有晒啲南瓜呀、巫婆呀、彊屍呀咁。聖誕節喎，就有好多波波，其中一間鋪就專賣聖誕裝飾。入面有好多波波球，有大有細有光面有磨砂有金粉，Send 咗幅相俾女徒弟，對眼肯定發晒光!

行吓行吓，有好多 Line 公仔之餘，亦有另一位大熱「紙箱人」。

有少少出奇嘅係，有好多火車，怪不之得徒弟仔會過嚟睇。

不過就唔見太啱心水嘅禮物，下次去深水埗𥄫𥄫再決定。

萬惡根源

乜嘢係香港居民?

基本法第三章
第二十四條

香港特別行政區居民，簡稱香港居民，包括永久性居民和非永久性居民。

香港特別行政區永久性居民為：
( 一 ) 在香港特別行政區成立以前或以後在香港出生的中國公民;
( 二 ) 在香港特別行政區成立以前或以後在香港通常居住連續七年以上的中國公民;
*( 三 ) 第( 一) 、( 二) 兩項所列居民在香港以外所生的中國籍子女;
( 四 ) 在香港特別行政區成立以前或以後持有效旅行證件進入香港、在香港通常居住連續七年以上並以香港為永久居住地的非中國籍的人；
( 五 ) 在香港特別行政區成立以前或以後第( 四) 項所列居民在香港所生的未滿二十一周歲的子女；
( 六 ) 第( 一) 至( 五) 項所列居民以外在香港特別行政區成立以前只在香港有居留權的人。

以上居民在香港特別行政區享有居留權和有資格依照香港特別行政區法律取得載明其居留權的永久性居民身份證。

香港特別行政區非永久性居民為：有資格依照香港特別行政區法律取得香港居民身份證，但沒有居留權的人。

第三十六條

香港居民有依法享受社會福利的權利。勞工的福利待遇和退休保障受法律保護。

好喇，即係總之係香港居民，就可以申請社會福利，咁永久不永久其實係無關係啦! 其實成篇第三章用到永久性居民嘅字眼只得一條，其他都係香港居民...

第二十六條

香港特別行政區永久性居民依法享有選舉權和被選舉權。

第四十一條

在香港特別行政區境內的香港居民以外的其他人，依法享有本章規定的香港居民的權利和自由。

Holy Shit! 照字面咁睇，即係只要响香港境內，就可以申請社會福利乎? 邊有咁粗疏嘅法律㗎?!

我係一個相信制度嘅人，法律寫咗落嚟，俾人鑽空子，我認命，但唔該我認完之後，可唔可以有人去堵塞漏洞? 我唔係要你人大釋法呀! 你人大釋法，可以一時一樣，鬼知你想當年係乜嘢法律原意呀? 我要你條改基本法!

我唔明點解基本法唔改得，香港好多問題，只要肯改基本法，好多事都好辦好多:

• 修改基本法，雙非問題根本唔存在
• 修改基本法，香港就可以有單程証審批權
• 修改基本法，綜援唔會俾人一入境就申請
• 修改基本法，晨早有普選

我本來都唔信有人先知先覺，但有時有啲人，無論你幾咁唔鐘意佢，真係有資格講: I told you so!

下一條問題就係，修改基本法嘅制度係乜嘢?

唔好意思

鐵路，係政府對公共運輸嘅重中之重。問題係政府似乎過份依賴鐵路網絡，當一條幹線死咗，咁幹線沿途就跟住死。無咗地鐵，將軍澳區就變成孤島。今時今日，政府起個網站都識要上雲做 HA/DR, 但係點解一個對市民日常生活息息相關嘅公共交通工具，係咁 Fragile?

答案好簡單，因為所有制定政策嘅人都唔會亦唔使住响呢啲新市鎮，規劃地鐵路線嘅人同埋設計轉車站嘅人唔會去撘地鐵。佢只會揸住架私家車，由山頂高處望住，所以地鐵停駛，唔會影響佢返工放工。將港島線一分為二，亦唔會對佢影響。事不關己，己不勞心是也。

打保齡 @ 黃埔

今日去黃埔打保齡球，為咗唔想手腕受傷，帶咗護腕。打咗一盤，似乎比以前舒服好多，第二盤，想嘗試落少少西，唔知係太耐無打，但係護腕嘅關係，似乎唔係太捉得到個感覺，最後一球，終於做到。第三盤，隻手無力，膊頭有少少酸，唔知係咪噚日做 Gym 出事，唯有用返個輕少少嘅波去玩。執好嘢等大家去洗手間嘅同時，睇吓啲壁佈，有啲比賽公告咁，見到一個唔明嘅 Term 叫「唔著褲分」...

五點左右，時間話遲唔遲話早唔早，大家去 Mos Burger 食個 Tea. 我同徒弟仔嗌咗同一個 Rice Burger, 但我個包嘅賣相，靚仔過佢嗰個好多。之後本來諗住去打邊爐，但似乎時間太倉促，無乜邊間可以訂到枱，最後決定去韓燒。

搭船去北角，剛剛有班船要走，好彩碼頭嘅員工話可以上船，Lucky! 去到韓燒店，另外三人陸續到場，燒咗好多嘢食。但我覺得，佢啲熟食同 Side Dishes 似乎好食啲。韓燒後遺症，啲衫好大陣味。

後記，响 Google 搵「唔著褲分」，竟然係咁:

Flashmob

國泰今年做咗個迷你 Show, 佢話自己係快閃啦!


但係:

1. 快閃嘅地方係唔會好特別咁無端端空咗出嚟
2. 快閃嘅人係應該响唔知邊道不經意咁出場
3. 快閃散水嘅時候係應該當無件事發生

呢場 Show 只係無搭到舞台，無放到圍欄，無保安控制人群，都叫做好有活力，好生動，好好睇。但係唔係快閃囉!

最後一堂

唔經唔覺就上咗兩個半月嘅堂，呢堂只係做個總練習。原本都唔知點解今日咁少人上堂，但上完堂後，啊 Sir 帶我哋去睇各表演班嘅結業表演，原來班同學仔都係其他課程表演班嘅學員，有 Jazz 呀，Musical 呀咁。雖然唔係好專業，但係都唔會太失禮人。

一個小發現，呢啲班好多都係女仔，芭蕾舞就唔使講啦，但 Street Jazz 成班都係得一個男仔，有少少女校男生 Feel.

關島之旅 - 後記

• 徒弟仔嘅瘋狂自拍行為，令人為之側目
• 加埋我影佢啲相，變咗成輯旅行相都係佢嘅相 (汗!)
• 唔知幾時開始對嗰啲民族舞唔太感興趣
• 徒弟仔同我對相片構圖嘅見解略有不同
• 哼! 竟然嫌我影啲相唔得...
• 對徒弟仔發咗唔知幾多次脾氣，尤其揸車同趕時間嗰陣
• 揸車上咗三次膊 
• 我諗我感應到師弟所講嘅揸車嗰種 Feel
• 無端端用咗歡樂滿東華嘅 Melody, 用英文填詞，哼咗出嚟
• 關島條路都 OK 易揸
• 今次旅行嘅目的達到，感謝徒弟仔肯陪我嚟，亦重新認識咗一次徒弟仔
• 如果有多一日，呢個旅行會再輕鬆好多
• 可以嘅話會再嚟多次
• 下次都係住返 Tumon Bay 一帶嘅酒店
• 搵唔到機會食多次美國本土嘅 Burger King 同 Denny's
• 可惜為咗潛水裝備，無帶到個全境鏡
• GoPro 影嘅潛水 Video, 好過部老爺 Video Cam

氣

好多時做嘢要成功，係要靠道氣。即係當你信心滿滿咁去行嘅時候，好多事都會順利好多。如果凡事太過小心，船頭驚鬼船尾驚賊，變得做事唔夠得心應手，變成失敗。

今日正當係 Production Rollout，就响我視某些事情為理所當然嘅時候，一切都好順利，但一有些少懸念，就兵敗如山倒。似乎同 Murphy's Law 不無關係。

Ted x Kowloon

香港有 TEDx, 都想睇好耐，難得小雲都有興趣，就一齊去睇吓咁。當中畢明爆咗幾句金句:

• 啲 PowerPoint 嘅內容，又無 Power, 又無 Point
• Comfort Zone, 即係你覺得 Comfort 就要鬆

第一個 Session 就 Overrun, 個 Lunch 要遲咗10分鐘。時間匆匆，同小雲去咗土司工房睇咗個簡餐，就返入會場。

呢位黃生當年係鐘意佢對電腦嘅認識，後尾做 CEO, 家陣幫清貧學生提供上網嘅機會。

完咗第二個 Session, 本來想同黃生影張相，但有兩個女仔同佢傾緊計，唔好意思阻住佢。第三個 Session 開始時，有人坐咗我哋個位... 話無劃位的說... 嘩! 乜咁嘅人都有... 唯有坐遠少少。不過個頭要擰歪少少個幾鐘，條頸唔係太舒服添!

好彩黃生佢坐到最後，臨尾都可以同佢影到相!

Nelson Mandela

九十年代係一個大時代，差唔多我嘅偶像全部共冶一爐，Bill Gates, Bill Clinton, Chris Patten 等等，當中 Nelson Mandela 不論响英文課或者聖經課都有講。幾年前有機會去南非，當然要親身去睇吓佢住過嘅屋，種族隔籬博物館咁。

今日一朝早起身，就聽到不幸嘅消息，有少少唔開心。不過下晝見午間新聞嘅時候，有人話佢活得精彩，就十分同意，願早日安息!