希望

我唔係教徒，但响一間天主教嘅中學，因為係天主教學校，所以有宗教堂。記得有一日，神父話天主有信、望、愛三德，當中嘅望係希望，人無咗希望就乜都無。

因為呢排多學生輕生，不少人寫文叫人唔好死，見到有一句係咁嘅「做人是一定要捱一些屎，但屎，一定會過。」令我諗起一個長壽嘅真實故事。

話說有個地方，啲人好長命，有記者採訪其中一個老人家，問佢咁長命開唔開心。個答案係唔開心，仲叫個記者可唔可以幫手了解佢嘅生命。點解呢? 因為鄉下地方太窮，可以食嘅就只有粟米，而老人家，食咗百幾年，換著係你，咁長命，你會開心嗎?

食粟米都想死，何況係捱屎? 要捱幾耐呢? 假如有一日你覺得自己一世都要捱屎，你係咪又會繼續捱落去?

學生見到今日嘅社會，覺得一世都要捱屎，睇唔到前景，失去咗希望，就正如神父所講「人無咗希望就乜都無」。

社交媒體發達，大家鐘意就發文、轉發、Like and Share. Facebook 出咗反應彈之後，嗰位得六百八十九票嘅特首可以爆嬲嘅，究竟香港人捱咗幾多屎? 又要捱多幾耐?

做啲可以改變社會嘅事，做啲令社會有希望嘅事，人類社會係為下一代而建設，唔做幫兇去建立一個摧毁下一代嘅社會，一個要成日捱屎嘅社會。