歐遊四國之旅 - 初抵慕尼黑

一早起咗身，食早餐，收 Notebook. 按預先安排好嘅時間買單程飛，返房拎行李，去麥記食個快嘅午餐，搭電車去長途巴士站。

點知上巴士之後... 說好的 Wifi 呢? 明明响巴士站度都見到有啲 Wifi Signal, 乜原來唔係呢架車㗎... 司機又揸緊車，咁即係無... 於是就咁斷咗線幾個鐘。還好，反正早起咗，瞓! 瞓吓又醒吓咁，到慕呢黑之前嘅一個鐘，就無再瞓。

車到咗，第一件事搵地方買電話咭，走咗去問 O2, 無 1GB. 決定返酒店睇吓乜嘢境先。睇 Google Map 好似好近咁，但原來由巴士站行到酒店都要成十分鐘，下次睇吓有無電車搭先得。

去到酒店，個接待員就話聖誕酒店會無人，商店都係會十二點左右閂的說。講到咁恐佈，就當然係要買定嘢先。

上到房，間房都幾大間，本身就知有個小廚房，但以為係好 Hea 咁細細個嘅房仔，點知係有晒兩個爐頭加一個大鋅盤，外加雪櫃同微波爐，而且餐具一應俱全，美中不足嘅係，無煲無Pan, 究竟要點煮嘢食呢? 真係考起。


Anyway, 於低晒啲嘢，就去附近行吓，一出酒店，就見到有地方賣電話咭，入去攪咗一輪，話25 Euro 有 1GB, 點知無 Signal, 根本就 Activate 唔到張咭，Refund 是也。再走入少少，有門網吧，一問之下45 Euro 3GB, 傻的嗎? 之前 Check 過响 Zurich 只係用咗二百幾 MB, 即閃。再行多一陣，原來就係慕尼黑嘅中央車站，掂! 附近有賣電話咭嘅地方 25 Euro 500 MB, 已經係是但 Mode. 到呢一刻只係覺得，呢度啲 Data 真係好鬼貴。

邊圍行吓搵食，見到有間食魚嘅地方，於是就買咗個魚柳包試吓，又幾好食喎!


除咗魚柳包，重有海鮮沙律，各式炸魚柳排等等，不過對於唔鐘意食魚嘅我一開始唔敢試，睇嚟有機會可以試吓。重有，佢係有賣壽司，似乎同個海有關嘅嘢佢都會賣。


之後去咗超級市場入少少貨，返房之後，個人可能因病感覺太攰 (明明响車度瞓咗唔少時間), 無乜做其他嘢就瞓咗。

歐遊四國之旅 - Lucerne 一日遊

夜晚瞓得不太好，半夜肚痛，但又唔係腸胃炎嗰隻上吐下瀉，勉強地瞓到。

因為 Zurich 該去嘅都去過，一係玩一次迷失，一係去週邊嘅城鎮睇吓，之前見朋友响 Lucerne 嘅相幾靚，於是就上網買火車飛。原來上網買可以平差唔多25%, 不過呢啲平飛一係 Print 出嚟，一係要裝 App 先用得。因為無 Printer, 所以選擇咗後者。

好早就起咗身，不過因為係定時嘅飛，唔可以隨時出發，唯有做住其他嘢等。差不多夠鐘，火車出發無耐，就有個阿叔企响我前面，我以為佢想坐我放背囊個位，就拎開咗個背囊，但佢遲遲唔坐底喎... 跟住，佢終於出聲，話要查飛 -_-" 早講吖嘛... 响 App 度 Show 咗張飛佢睇，佢用手機 Scan 完，對埋 Passport, 攪掂。到咗下一個站，一班查飛嘅人就落晒車。


經過一個好大霧氣嘅地方，就到達目的地


車站附近係一間好新淨嘅美術館，美術館外面有一個 Christmas Market


可以溜冰、同熊仔影相


可以射龍門，重有專人拍攝射門嘅英姿，直播至會場入面嘅大電視


最後，最受歡迎嘅，就係大家排晒隊嘅捐錢項目，聽聞係第三年攪，去幫助啲有雖要嘅家庭。


因為 Lucerne 有河流分隔，所以有唔少橋俾人過


其中有兩條係木造，一條叫做 Chapel Bridge


識睇一定週圍睇，望吓上面，就會見到橋入面嘅圖畫


跟住又好例牌地去睇兩座教堂，不過無乜特別


好快就行到去水壩，用作發電


再行過少少，就係另一度木橋 Spreuer Bridge, 同第一條橋差唔多無乜特別。個肚有少少餓，求其入咗間餐廳填肚。

嗌咗個威士忌茄汁蘑菇通粉，其實只係想食蘑菇通心粉，無留意到係用威士忌煮汁，加上通心粉偏硬，所以對我嚟講，完全唔掂，最好食都係佢餐前個包。


食飽之後，就去舊城區入面，睇吓個 Town Hall, 其實無乜特別亦祈望不大，只係反正有時間，搵到地方行吓咁解


再行返去湖邊影相，响 Zurich 唔太覺嘅 Logo 竟然响度撞到


去到湖邊，因為聖誕嘅關係，好多松樹擺咗响度賣，都要行一輪先有地方啱影相


今年因為天氣特別和暖，所以山嘅含雪量不多，聽聞有九乘嘅滑雪場無開，幅相嘅左手邊就可以見到個山係幾咁秃。


影完相，就去搵 Lucerne 嘅另一個景點，被 Google Map 老點咗一輪，最後跟住人群嘅方响，終於搵到隻垂死的獅子。呢隻獅子係用嚟紀念當年法國大革命被殺害嘅路易十六㙐士僱傭兵。


到最後嘅一個景點，The Nine Towers, 其實正確名稱係叫 Museggmauer, 係一座城牆，只不過佢有九坐瞭望塔。搵咗一輪，先發現原來搵錯地方，於是就要行上山，兜咗幾個圈


唔覺唔覺，終於到咗


過咗幅牆，景色亦唔錯


可惜個鐘樓冬天唔開，唔係嘅話個風景會更靚


再行返去湖邊，再經過埋個 Christmas Market, 有一塊空地可以影湖邊嘅建築物


清到見底嘅湖水


重有兩個鐘先夠鐘返 Zurich, 响 Christmas Market 買咗少少嘢食等，到黃昏時分，一個幾近夢幻嘅景色出現响眼前


重有一個鐘，天已經黑得七七八八，於是就週圍行吓，影吓夜景


再走入舊城區，因為有少少作病，所以去咗藥房買藥，好彩只係流鼻水，所以藥劑師只係俾咗隻收鼻水嘅藥我。


重有半個鐘多少少，太凍了，去咗舊城區一間百貨公司度睇吓，大減價的說，有啲衫好似幾抵又啱心水，但係只係帶咗個細行李，所以同佢哋無緣了。


時間差不多，去到車站逛吓，見到啲好 Creamy 嘅 Bagel. 一於買上火車慢慢歎


經過一個鐘左右嘅車程，唔記得轉車添，不過好彩係去到中央車站，可以搭電車返酒店。返酒店途中，決定再去 Pasta 店度點另一款意粉，想食個茄汁直通粉，但實在唔識菜名，於是就响 Google 度睇顏色做人。


點知... 點咗隻辣嘅... 食咗半碟，頂唔順，打包咗返房，搵水沖走啲醬汁，總算無嘥到。

最後一晚嚟 Zurich, 要執定嘢，第二朝走人。

歐遊四國之遊 - 蘇黎世舊城區

又瞓到十點幾先起身，感覺到個人有少少病，不過反正都嚟到，出咗去先算。

食完早餐，就去買車飛，出去市中心，點知去到先發現唔記得帶相機，搭車返房囉之餘，又發現搭錯車，似乎有少少病矇咗，咁就白白浪費咗半個鐘。

再重新出發，呢度無嘢多，最多就係教堂，舊城區就咁一望，就有三座教堂，聖彼得堂、聖母堂、大教堂。


之後，去舊城區行吓，都無乜特別嘢睇，係撞啱有班聖誕老人打扮嘅人响度買唱咁


跟住行行吓走咗入去一間玩具店，就出返去購物大街度，反正肚餓，於是就去咗 Food Court 度搵食。見到有洋腸，好似好吸引咁，於是洋腸配洋葱洋再加薯條，就成為咗午餐。


食完嘢，再出發，想去一個叫 Lindenhofplatz 嘅地方，TripAdvisor 有講話個景幾好，但就成個朝早都搵唔到，於是就全憑直覺，誤打誤撞地，見到呢個牌


到咗，其實只係一個廣場，入面俾唔同嘅人活動，踩鋼線、草地滾球、捉棋、打躚踿等等


個景嘛，一般啦



不過，最具意義嘅，係個銅像，係紀念女仕們堂年抵擋德王揮軍入侵的說


最後搵到個地方影 Street View


離開咗之後，發現呢度附近都有唔少畫廊


過咗對面河嘅夜蒲區，雖然未入夜，但都已經有唔少人，重有個 Christmas Market. 入面都係賣啲好行嘅聖誕飾品咁。


轉個頭見到有人買嘢飲，好好奇咁問咗聲，原來係熱紅酒嚟，唔太啱我，於是就推𥴱咗另一隻蘋果汁加薑，幾好味。


行行吓又行返入舊城區，又聽到演奏聲，有人响露台吹聖誕歌


四點未到，本來以為就咁完咗一日嘅行程，行過去中央車站，一入去睇，原來又一毎 Christmas Market, 不過呢個大型好多，當然大還大，入面賣嘅嘢一樣咁行。


大有個好處就係有啲唔關聖誕事嘅嘢都可以入去攞檔，噚日其實唔見咗支 Stylus, 因為唔想天寒地凍除手套用手機，要再買返支，於是就响呢個 Christmas Market 度搵到間買手機用品嘅檔口，一問之下，有賣，亦只係五蚊雞，入手了。

差不多五點，反正得閒，決定早少少食個 Dinner. 本來想去之前間 Pasta 店，不過去到原來星期日唔開，咁就決定去之前間聲稱食瑞士嘢嘅餐廳。叫咗個無骨豬扒配意粉,另送餐湯。似乎唔太得，湯同豬扒都偏鹹，塊豬扒重要有血水，唔得，要叫佢煮過。


食咗餐鹹嘅晚餐，好想食 Cheese Cake, 我記得超級市場有得賣，但係已經收咗，於是就走去附近間麥記嗌咗件嚟食，雖然無乜芝士味，但都可以叫做沖淡啲口中嘅鹹味。


好早咁返咗房，時間非常充裕，追返之前 HKTV 嘅劇，唔得，個人真係好病，於是唔夠十點就瞓咗覺。