時間差不多，執好嘢，行去火車站，要去3號月台
今次應該唔使 Google, 用直覺，加埋有火車公司嘅標誌，我相信向右行就係目的地
去到月台，唔覺有火車，可能未到，邊圍影吓先。呢個分類回收箱，好似好靚咁
坐第6號車卡，行定去先
咦?! 乜原來架車一早响度
上車嗰陣有少少阻滯，攪到塞住咗成個通道，好彩唔係最後一分鐘啫!
原本係坐走廊位，但係到開車嗰陣隔籬位無人，所以佔領咗窗口位影相
不過都幾難影，一來倒頭位，唔知前面有乜嘢景，二來要克服小樹叢、矮牆、同埋山丘
好不容易影到，但又 Out 晒 Focus
300km/h 嘅高鐡，係難影相啲
啲電線桿亦係幾大嘅障礙
影咗唔少廢相，差不多到站，用 Slit-scan 影，啲路軌都幾覆雜
到咗巴黎北站，要見嘅人就响月台等緊
話說呢位朋友係當年作為一個實習生一齊做過一個大 Project, 轉眼間，又已經係六年幾前嘅事。
去到一間餐廳，本來想嗌法式薄餅試吓，點知個待應話無喎。無所謂，但又要揀過。於是，見到有奄列就當然係嗌奄列拼薯條。呢一轉去咗幾個地方都有食薯條，似乎係法國最好食，難怪英文叫 French Fries 了。
食完傾咗一陣，轉移陣地食甜品，被強烈推廌要試焦糖燉蛋，咁當要一試。好正! 夠甜，層焦糖又夠厚，蛋亦夠滑，非常之滿足。
傾得太耐，時間差不多，要趕火車了，連相都無時間影就要道別，不過今次落一落嚟非常之值得。因為英國唔响神根公約入面，所以要過關，法國出境無乜問題，但入境嗰陣最前面嗰位好似有啲問題，攪咗好耐條隊都唔郁，所以決定排過另一條隊。過完關又要安檢，又排咗一輪。最後好彩都趕得切，開車前十分鐘上到車。
因為都叫做高級位，所以坐位都幾闊落，亦都揀咗單丁向前窗口位，唔使同人爭，又可以影相。
但係出面落雨，啲水响玻璃度，對影相都係一個幾嚴重嘅問題
好彩架車都夠快，啲水好快就乾，又影吓路軌先
無錯，係又時候食嘢，睇嚟今晚嗰餐唔使食。有魚或者芝士揀，其實兩樣都唔識欣賞，但兩害取其輕，揀咗魚。一食落口，啲飯係凍嘅，死喇! 咁啲魚會唔會好腥呢... 食一啖魚，好食，腥味太淡，被佢嘅調味打敗咗，好開心咁完成個餐。
架火車比高鐡慢少少，亦都掌握到影相嘅方法，但可惜都係太快，見到靚嘅景，開得部手機嚟，好多時都已經 Miss 咗最好嗰一剎那
食完嘢影吓相，又歎返杯茶再影過先!
影緊 Slit-scan, 咁啱又捕捉到入英法隧道前嘅一刻
入咗隧道，換張 SIM Card, 廿分鐘後就已經到咗英國。
原來去到倫敦前，會停一個站，好耐無玩過影人嘅 Slit-scan, 影返幾張先
離開個站無耐，就到倫敦
落車補影返啲相先
火車終點站係倫敦嘅 St. Pancras, 哈里波特都曾經响度取過景
返到房，Unpack 嘢之後，享受住一個靚嘅黃昏
No comments:
Post a Comment