荷比之旅 - 前傳

噚晩準備呢毎旅程，攪到兩點幾，但係似乎個人太興奮，六點幾就起咗身，搵飛機火車住宿行程等等。因為時間太倉促，去巴黎嗰程太貴，所以決定去阿姆斯特丹、鹿特丹、布魯塞爾、巴黎沿路殺返落去。睇 Eurostar, 時間唔得之餘又太貴，搵搵吓，原來又可以搭船去阿姆斯特丹，不過已經無晒位，所以最後㨂咗上 Luton 搭飛機。

同主人家傾計，問咗佢去邊度唱 Euro, 答案竟然係 M&S, 匯率比銀行好亦唔收手續費，今日又學到新嘢。跟住繼續去攪住宿同火車，於是就咁攪咗成朝。

食完晏，實在太攰，上床諗住瞓一陣，但係似乎心情未平伏，廿分鐘後又因為電話嘅 Notification 醒咗。反正要買少少嘢，就出一出去。呢少少嘢其實就只係買 Adapter 同電池。因為過嚟就只係帶咗歐式轉英式嘅 Adapter, 但 Miss 咗英式轉歐式嗰隻，盛惠一磅。電池係俾部 AutoMate 用嘅四粒 AA 電，其實都唔知帶唔帶好，不過買咗先算。

今晚煮夜晚嗰餐嘅時候，咁啱主人家又整緊，大家一路煮又一路傾，講起啲士多啤梨好好食，就示範咗用飲管食士多啤梨嘅方法。跟住佢又播歌，係好有節奏感嘅歌，完全好 Tap 得，於是又 Show 咗幾吓 Tap Dance 嘅步法，呢餐大家未食都已經好愉快。因為主人家整魚，就用魚做咗個小話題，我就講咗「年年有餘」嘅新年習俗過佢聽。

食完飯，睇新聞，睇日落。薄薄嘅雲，今晚都應該唔會出現滿天通紅嘅情況，所以無影 Time Lapse.


但係就發現原來天空都幾繁忙


因為聽日係健身日，所以今晚都係早啲沖涼，免得無力舉鐵，似乎要星期四先可以繼續準備行程同執行李。