人生之旅 - Day 45

噚晚走去搵屋租，攪到差不多兩點先瞓，今朝九點半就起咗身，好彩無乜特別嘢做，其實天陰陰咁都唔係特別想做嘢。食咗個早餐之後，打俾個 Agent, 睇吓份工嘅情況如何，其實佢都無乜特別 Update, 只係話各方面 Even 係 HR 嘅 Feedback 都好好，話會再幫我跟進。過多半個鐘左右，真係有料到，原來要等批 Budget, 最快星期二先有 Verbal Offer, 咁就唯有暫時靜候佳音。

朝早無乜特別嘢做，於是就去睇日劇，睇嘅係《總會有辦法的2》，一套好婆媽嘅戲，但勝在有正能量。

下晝約咗另一個 Agent 出嚟飲咖啡，準備星期一要見另一份工。唔係話對之前份工無信心，只係想多一個保險，多一個選擇咁。約咗响 London Bridge 站等，臨出發嗰陣，CityMapper 話地下鐵有意外，睇嚟都要遲到。果然遲咗十分鐘左右，去咗附近嘅 Costa. 傾咗半個鐘左右。跟住無嘢做，見到附近有個市集，似係旅遊景點。

個市集叫 Borough Market,


一入到去就見到好多嘢食，重要係甜品，實在太大嘅引誘，但呢一刻，都係影咗當食咗算


除咗甜品，重有熟食


如果有興趣嘅，可以食大鑊飯


作為一個市集，肉食同海鮮當然唔少得


蔬果亦不可缺少


係啲番茄嘅形狀怪咗少少


追求生活品味嘅，亦都有唔同嘅選擇


當然唔少得各式嘅洋腸


行完之後，可能係杯咖啡出事，個肚好唔舒服，去到中途轉車嘅火車站解一解決，個人鬆晒，但係腳仔軟。今日要去超級市場買咗，本來想買條 Snickers 保充體力，點知無貨喎，買咗條 Mars 頂住先，咬咗第一啖，唔太識欣賞，但無謂嘥咗佢，於是就生吞咗。

返到房，都差不多五點半，又係時候準備晚餐，再休息返一陣。閒來無事望出窗口，見到個奇境。本來鳥雲密佈嘅天空，變得天朗氣清。


有預感今晚個落霞會好靚


又係時候影 Time Lapse

人生之旅 - Day 43

又係見工係日子，今次個 Agent 話似 Speed Dating, 因為係要响兩個鐘頭內見晒同 Team 嘅人，兩個 Director, 外加 HR. 於是就一朝早起身梳洗食早餐，但個頭有少少難攪，Wax 咗先叫剛剛好 OK, 但已經係時候出門。

落住毛毛雨，好彩唔太大風，但呢邊嘅天氣，無太陽就真係有少少寒意。走出地上站，要行一段，比預期早到咗少少，等咗陣，上次嘅 Interviewer 出現，帶咗我入房，等見將會同 Team 嘅人。

入咗嚟兩個印度人，幸好口音不重，溝通到。都係講吓自己經驗同一啲 Technical 嘅問題同少少 Process 上嘅問題，難度一般。
之後到 Director #1, 都係無乜特別，Default 嘅經驗 Script, 再 Elaborate 多少少就 OK.
跟住到 Director #2, 一個曾經係 Developer 但係轉咗做 Infrastructure 嘅人，Infra 問題勉強完成到，外加少少 Java Development 嘅問題。
最後就係 HR, 機本上係 Chit chat 嚟，除咗講之前嘅經驗，亦都講吓之後嘅 Career 想做乜咁。之後因為過咗12點，話 Overrun 咗而終止對談。

總括嚟講，我係覺得成功嘅，個 Interviewer 都話初步嘅 Feedback 都係屬於正面，再傾咗兩句，就送咗我走。

跟住，去返上次間 Bar 食 Lunch. 又係奄列不過今日唔太肚餓，所以叫咗沙律而無叫薯仔。等上菜嘅期間，打咗俾個 Agent 講返少少 Interview 嘅感覺。因為 Book 咗兩點去整一整個頭，食得有少少急，唔駛十分鐘就食完。

之前無留意間 Salon 响邊，原來就响唐人街入面，早到咗少少，可以週圍逛吓咁。逛到差不多夠鐘，就上去 Salon 度，反正响唐人街，於是就直接用廣東話講嘢，又撞得正都係識講廣東話嘅人，個心都安樂啲，起碼唔使諗啲整頭髮嘅 terms 點講。

今次係第一次做負離子嗰陣俾個 Junior 同 Stylist 同一時間一齊夾頭髮，可能因為咁，連埋剪頭都只係攪咗兩個鐘，希望唔會因為快手做完而 Keep 唔到。最後，個頭效果尚算滿意，尚算，係因為始終唔鐘意個幾日頭太扁嘅感覺。

回程，用 CityMapper 睇，見到巴士同地鐡時間都只係差十幾分鐘，想 Keep 住個 Mobile Signal 上網之餘亦因為地鐵繁忙時間比巴士貴差不多成倍，所以投入咗巴士嘅懷抱。沿途係 Oxford Street, 好多商鋪，過咗 Marble Arch, 就開始無咁熱鬧。本來想响巴士影 Slit-scan, 但原來呢邊嘅巴士比香港嘅巴士震好多吓，效果不佳之餘，停車嘅時間亦都唔長，所以乜都無影到。最後搭巴呢個決定係啱嘅，因為 Agent 打嚟話今朝個 Interview 幾好，但就問咗個幾狐疑嘅問題，就係呢個 Role 唔係管人，而係 Lead 人，問我有無問題。反正我對管人無乜特別興趣，難得佢講得咁清楚，當然係無問題。依家就剩係差 HR 未有 Feedback.

走出巴士，心情放輕，去附近嘅超級市場買少少零食就返房，原來已經五點半，過咗漫長嘅一日，好肚餓，係時候煮嘢食，再過一個平淡嘅夜晚。

人生之旅 - Day 40

星期四拒絕咗份 Consultancy 嘅工，Crawley 份工可能因為個 Agent 迫得緊得滯，間公司亦都搵咗第二個。太好了，唔使再面對選擇嘅難提，專心一意响倫敦再搵，反正星期三亦都有個唔錯嘅機會。

難得落咗幾日雨，換嚟一個好好天嘅星期日，睇睇吓旅遊書，見到城市論壇嘅始祖，位於海德公園入面嘅 Speakers' Corner, 於是就決定去睇吓，順便行吓個公園。

可能呢排無乜特別議題，全部都係 God, Jesus, Bible 咁，無乜興趣，最可觀嘅，可能只係演說者同觀眾嗌交。


都係行吓公園算，海得公園有個超級無敵大草地，好多人响度晒太陽。嫌晒嘅話，草地嘅週圍都係有樹蔭嘅跑步徑，加上涼浸浸嘅風，都幾好行吓。


行到去湖邊，好多鴨呀鵝呀咁，鐘意嘅話，係可以落去游水嘅，當然要响指定地方游，同埋俾錢。


响湖嘅角落頭，就係王妃戴安娜紀念噴水池，玩水嘅嘢，好多細路都玩到興高彩烈
 

Views: London, UK by Shane Ng

回程時見到有人騎馬


又見到唔錯嘅街境同意外地見到响地上嘅塗鴉


呢度無干諾道，但係有干諾街

返到房，早咗少少，食咗少少嘢，同靚仔徒弟做咗個 Pair Programming 嘅 Session. 攪完都八點幾，係時候食晚餐。

呢晚嘅落霞無乜雲，單調咗啲

人生之旅 - Day 36

呢幾日唔係見工就係做 Gym, 同埋去招呼份 Consultancy 工嘅 Agent, 成日响度催，個 Package 係好吸引，既然另一份自己鐘意嘅工有好大機會，我決定冒呢個險。

今朝 Crawley 分工個 Agent 話遲啲會見 HR, 即係九成會中，所以嗰一刻嘅心情係好輕鬆，佢話睇吓可唔可以 Skip 見 HR 呢個 Process, 其實 Skip 唔 Skip 都好，Consultancy 嗰邊亦都可以放棄，但個 Agent 又唔想我冒呢個險，所以唯有拖得就拖。之後就換好衫再去見工，呢份工其實本來都唔想見，但係因為借咗人家個名做 Reference, 好好醜醜都要見，重要係出盡力去見嗰隻。Agent 响封 Email 度寫明個 Dress Code 要著西裝同打呔，於是噚日去做 Gym 嗰陣順便買埋。


因為係一點見工，一個幾麻煩嘅時間，決定搭地上鐵去睇吓個環境先。個 Impression 其實唔係太好，因為間公司附近無乜嘢好食，再返去車站，有間 Bar, 入去睇吓先。有 Breakfast 但唔知係咪 All Day, 問咗有無先，又有得食喎，於是叫咗個奄列。


食飽之後，玩咗陣手機，就去 Office. Interview 過程異常順利，大家都好 Surprise 無做到 Phone Interview, 似乎呢個 Agent 有啲計。跟住都係 Go through 分 CV, 同埋問啲 Technical 嘅問題咁。份工個 Title 叫 Team Lead, 但聽落個 Interview 講，個 Team 似係 Architecture Team 多啲。Anyway, 完成後，總算無失禮人，行返去車站，忽然發現件衫好濕，原來不知不覺中，自己係好緊張。

Crawley 份工嘅 Agent 打過嚟話今日都唔知可唔可以見到 HR. 傾傾吓嘅時候 Team Lead 份工嘅 Agent 又打嚟，匆匆地收線接咗入嚟，似乎見得幾成功，可以進入 Second Round, 去見吓啲 Team Member, 最主要睇吓夾唔夾得埋咁，個 Agent 話個模式似 Speed Dating 喎...

Anyway, 呢兩份工都咁鐘意，究竟係嚟响 London 好定去 Crawley 好，似乎都係一個幾難嘅決擇。London 所有嘢都好方便但係就貴，人工都會高少少，而 Crawley 係 Town 仔，生活機能可以接受，不過就近 Gatwick Airport, 好多廉價航空公司都响嗰度飛去歐洲各地，即係理論上係可以每個 Weekend 去唔同地方玩吓咁，基本上各有各好。

心頭大石放下之際，清咗呢幾個禮拜未睇嘅動畫，本來想响手機打機，但係一望出窗外，就見到好靚嘅落霞，手機影嘅效果唔太得


決定用相機開手動模式影，可惜無帶到中型腳架嚟，唔係嘅話可以影 Time Lapse


至於 Time Lapse 呢個任務，就俾咗部手機去做


九點幾，見到有香港嘅人响 Facebook 嘅 Status 係 Online?! 原來剛返到屋企，真係辛苦晒，只好同佢講聲早啲抖。