行行吓，見到有蘋果𣄃艦店，排晒隊咁，OK... "the new iPhone. And the new iPhone" 開售... 唔太關我事，走! 行咗入去 Strand Arcade, 建築似西港城，但入面唔係賣布，多數係賣本地 Designer 設計嘅衫，有一間 Gallery, 有幾間賣餅，同兩間餐廳。
其實行吓行吓，發現一條街口可以容納好多唔同年代嘅建築，商業區喎，香港有無? 另一樣香港無嘅，就係會見到唔同雕塑出現，再轉個街口，一個劇院就出現响眼前。藝術，根本就係融入生活當中。
入去 Westfield 入面間 Zara, 啲衫都幾靚喎，好似香港唔見有添，想買條牛仔褲，但唔啱身，無計。再去 Myer, 又有一堆靚衫，點解呢邊好似咁多選擇咁? 不過諗起其實個行李箱無乜位，都係算把... 有少少攰，但十二點，食個 Lunch 又好似太早，走去 Food Court 買咗個齋手卷補一補充。
又行返入去 Westfield 嘅另一間舖，好似專賣牛仔褲嘅，有唔同顏色，唔同質地，唔同剪裁，唔同牌子咁。試咗好多條，一係褲頭太鬆，一係褲腳太窄，試都試到出晒汗咁滯。最後揀咗條有黑色彈性嘅牛仔褲，雖然太長，但就可以拎去附近嘅改衣店改。改緊衫嘅時候，食埋個晏先。原來麥記有至激優惠，點完餐60秒後重未有得食有芝士漢堡 Coupon 送，講緊嘅係繁忙時間嘅 Food Court, 一啲都唔少人。又係 McGrill 加沙律，不過無汔水喎，得清水同橙汁揀，橙汁當然係不二之選。食食吓，有電話打嚟，條褲改好咗。食完就上去攞，跟手換埋出街。
跟住準備上 Sydney Tower, 但出面見到有街頭樂隊唱歌賣碟，如果係香港，佢哋嘅遭遇會係點呢? 唔理，上塔先。換飛嗰陣，原本係有張 Voucher 去換3個唔同地方嘅飛，但個票務員就俾咗3張 Sydney Tower 嘅飛我... 重成張 Voucher 數起咗... 好彩我無諗住去另外兩個地方啫... Anyway, 上塔前，要先睇 4D 戲，再由保安人員係咁二搜吓個袋，跟手影相，先至入到電梯。條電梯，重好慢添... 上到塔頂，都係影相嘅啫，可以玩 Fake Miniature. 部相機重可以外加 Time Lapse, 好似幾得咁。
不過，其實我想影日落嘅 Time Lapse, 橫豎重有兩張飛，都係返酒店房拎架生。返酒店其實，途經起級市場，順路買埋第二日嘅食物。一來一回，再睇4D戲、搜袋，再上返塔頂，已經係一個鐘後嘅事，但時間啱啱好。5點半開始影，影到7點咗右收工，不過隔住塊玻璃，效果唔太得... 走嘅時候，一位街頭歌手响剛剛街頭樂隊表演嘅地方唱緊歌。唔知係咪同一時間只可以有一位表演者呢?
最後一日嘅晚餐想食豐富少少，之前一晚見到其中一間餐廳有 Cheese Cake, 所以就返到呢間响碼頭附近嘅餐廳。又係點吉列雞扒，另加 Cheee Cake. 食飽，好大嘅罪惡感，先出去行吓，返房抖一陣，再做 Gym.
做完 Gym, 開始執嘢，Upload 相上 Flickr, 攪到兩點瞓覺。
No comments:
Post a Comment