待客之道

做完 Gym, 見到有兩個遊客 (一男一女) 踎咗响度，拎住本書手指指，本書係日文嚟，似乎好無助。本來行過就算，但係踎响度喎，應該係好攰吓，返轉頭問一問都好。

用英文問佢哋使唔使幫忙，個男仔話唔使，但個女仔話要。原來佢哋想入間中菜館食嘢 (似乎係旅遊書介紹)，但見到入面烏燈黑火咁，就問間中菜館有無開門。我都唔太知，但以常識嚟講，未夠五點，應該係落場時間，叫佢哋六七點再嚟過。

跟住個男仔同女仔講佢幾句，個女仔就問邊度可以兌港紙。OK, 原來個男仔話唔使幫忙，係因為驚溝通唔嚟，咁就唔係問題啦，因為我都驚，但女仔嘅英文係可以令人明白嘅。不過找換店嘅路程响地理位置嚟講，要講出嚟有少少難度，不如送佛送到西，就要佢哋跟我嚟。

雖然唔遠，但都要過幾個街口同馬路，其間同個女仔閒談咗幾句。似乎個女仔都對唔同地方嘅語言有興趣，問香港人係咪講香港話呀，又嘗試用普通話講「我是日本人」咁。

到咗找換店，指俾佢哋睇呢個匯價，臨走嘅時候，個女仔叫我留一留步，搵咗個100円嘅銀仔俾我做紀念。講咗聲多謝，加多句 Sayonara, 心情舒暢地返屋企。

或者，假設唔係剛做完 Gym 成身汗，我諗我會做一做導遊，帶佢哋遊吓上環。