關島之旅 - 後記

• 徒弟仔嘅瘋狂自拍行為，令人為之側目
• 加埋我影佢啲相，變咗成輯旅行相都係佢嘅相 (汗!)
• 唔知幾時開始對嗰啲民族舞唔太感興趣
• 徒弟仔同我對相片構圖嘅見解略有不同
• 哼! 竟然嫌我影啲相唔得...
• 對徒弟仔發咗唔知幾多次脾氣，尤其揸車同趕時間嗰陣
• 揸車上咗三次膊 
• 我諗我感應到師弟所講嘅揸車嗰種 Feel
• 無端端用咗歡樂滿東華嘅 Melody, 用英文填詞，哼咗出嚟
• 關島條路都 OK 易揸
• 今次旅行嘅目的達到，感謝徒弟仔肯陪我嚟，亦重新認識咗一次徒弟仔
• 如果有多一日，呢個旅行會再輕鬆好多
• 可以嘅話會再嚟多次
• 下次都係住返 Tumon Bay 一帶嘅酒店
• 搵唔到機會食多次美國本土嘅 Burger King 同 Denny's
• 可惜為咗潛水裝備，無帶到個全境鏡
• GoPro 影嘅潛水 Video, 好過部老爺 Video Cam

氣

好多時做嘢要成功，係要靠道氣。即係當你信心滿滿咁去行嘅時候，好多事都會順利好多。如果凡事太過小心，船頭驚鬼船尾驚賊，變得做事唔夠得心應手，變成失敗。

今日正當係 Production Rollout，就响我視某些事情為理所當然嘅時候，一切都好順利，但一有些少懸念，就兵敗如山倒。似乎同 Murphy's Law 不無關係。

Ted x Kowloon

香港有 TEDx, 都想睇好耐，難得小雲都有興趣，就一齊去睇吓咁。當中畢明爆咗幾句金句:

• 啲 PowerPoint 嘅內容，又無 Power, 又無 Point
• Comfort Zone, 即係你覺得 Comfort 就要鬆

第一個 Session 就 Overrun, 個 Lunch 要遲咗10分鐘。時間匆匆，同小雲去咗土司工房睇咗個簡餐，就返入會場。

呢位黃生當年係鐘意佢對電腦嘅認識，後尾做 CEO, 家陣幫清貧學生提供上網嘅機會。

完咗第二個 Session, 本來想同黃生影張相，但有兩個女仔同佢傾緊計，唔好意思阻住佢。第三個 Session 開始時，有人坐咗我哋個位... 話無劃位的說... 嘩! 乜咁嘅人都有... 唯有坐遠少少。不過個頭要擰歪少少個幾鐘，條頸唔係太舒服添!

好彩黃生佢坐到最後，臨尾都可以同佢影到相!

Nelson Mandela

九十年代係一個大時代，差唔多我嘅偶像全部共冶一爐，Bill Gates, Bill Clinton, Chris Patten 等等，當中 Nelson Mandela 不論响英文課或者聖經課都有講。幾年前有機會去南非，當然要親身去睇吓佢住過嘅屋，種族隔籬博物館咁。

今日一朝早起身，就聽到不幸嘅消息，有少少唔開心。不過下晝見午間新聞嘅時候，有人話佢活得精彩，就十分同意，願早日安息!

關島之旅 - 自駕遊

前一晚叫做夜瞓，所以差唔多9點9先起身，原來徒弟仔已經响洗手間 Gel 緊個頭。本來諗住係租車過去 King's 食早餐，但租得車嚟，似乎已經過咗早餐時間。唯一嘅選擇，係搭巴士過去。

Pack 好行李，準備返嚟 Check-out, 差唔多10點半, 落樓等巴士，10點50分，徒弟仔飛奔去餐廳度，似乎佢真係好想食早餐。徒弟仔嗌咗個 Local Skillet, 本來我要嗌多份，到最後都係改咗個 Morning Fiesta Special, 話想試多啲嘢喎... Anyway, 徒弟仔叫咗杯朱古力奶，深深咁體會到咩叫「如果太多牛奶味，朱古力味冇掟企，等到朱古力味返番嚟，牛奶味又唔爭氣~」

食飽埋單，已經11點半，埋完單，睇住架巴士走，又要等多8分鐘添，但應該趕得切12點前返酒店 check-out, 於是就 Whatsapp 咗 Billy 叫佢搵定租車公司嘅人嚟接我哋。跟住見到架 One Piece 嘅巴士响街度，用手機影，因為有少少，影得好細，唔係喎，我帶咗部相機，開機 Zoom 埋去一影，出事... 噚晚玩 Light Painting 唔記得轉返 Auto Mode... 快門一㩒，就係16秒，One Piece 巴士就咁離開咗。

諗住好快可以返到酒店，點知，架巴士 Skip 咗 Sheraton! 好彩徒弟仔發現，同司機講，但已經太遲，要去到 Hilton 搭回頭車，等車嘅同時，One Piece 巴士再一次出現。

返到酒店，已經係12:10, 租車公司已經响 Lobby 度等緊我哋，匆忙地返房拎行李再 Check-out, 再去租車。租車公司嘅人介紹咗部紅色嘅 Corolla, 對於一個對車一無所知嘅人，求其一部車都 OK, 38蚊3個鐘，48蚊6個鐘，58蚊1日包埋保險。已經差唔多1點，3個鐘唔太夠時間，於是就租咗6個鐘。插好點煙器 USB, 黐好電話架，起錨!

租車之前，已經同徒弟仔講我手車唔得，不過佢話唔怕死，就叫佢幫我睇位同睇地圖咁，我就只係負責操控架車。離開租車公司之後，先去入油，租車公司嘅人話10蚊油就夠玩喎。途中係咁咇咇聲响，以為無油，無乜理佢。去到油站，因為關島係自助入油，唯有問人點入，俾錢開蓋插油槍，比想像中簡單。入好油，仲係咇咇聲，唔理佢，直去自由神像嗰度。因為唔熟路，Miss 咗個街口，要兜個大圈，轉咗入條小街，停咗响個停車場度，徒弟仔話聞到燒焦嘅味道，後胎出煙，唔知乜事。問人打電話返租車公司，Oops, 原來無鬆 Handbrake... 無計，習慣係 Toggle 個 Handbrake, 點知呢架車停車嗰陣係已經放低咗個 Handbrake, 本來都覺得奇怪但又不以為然，於是就變咗拉起個 Handbrake 出發。

再度出發，諗辦法兜返入自由神像，兜咗一個圈，兩個圈，終於成功入到停車場，不過離自由神像太遠，要再揸入啲。徒弟仔提出咗個極大難度嘅挑戰:倒後泊車, 話易啲走喎... 徒弟仔似乎太睇得起我，所以，我叫佢全程指揮算數，幸好都泊得唔差! 影自由神像之後，走出海堤，幫徒弟仔影咗幅好陽光嘅相，想叫徒弟仔幫我照辦煮碗咁影，唔知係模特兒嘅問題，定攝影師嘅問題，影極都影唔返個效果出嚟，放棄...

影完相後，泊架車出少少 (撞凹咗車尾)，有個 Chamorro Village, 原來夜晚有一星期一次嘅夜市，可惜到時我哋已經响飛機上面了，不過都行咗個圈。

跟住徒弟仔離遠見到有佢想影嘅 San Antonio Bridge，影影吓相落雨，好彩唔太大，返到架車度都唔係太濕。

跟住去 Senator Angel Leon Guerrero Santos Memorial Park 影石柱，徒弟仔今次考我 Parallel Parking, 一樣佢睇位我控制，唔完美但唔失禮。

石柱本來無乜好影，但部 Z1 可以玩相，好過就咁影相。

影完石柱，上山去 Fort Santa Agueda, 聽聞有個伯伯擺檔賣椰子刺身，第一日都見到佢，但嗰陣跟住 Billy 走無幫襯到，今次連影都唔見，有少少失望 (確實上嚟時人影都唔多隻)。機本上要影嘅相上次影完，食唔到椰子刺身，唯有回程還車。

回程嘅同時，諗起徒弟仔話要搵 ABC Stores, 聽 Billy 講係將 7-11 趕絕的說，所以想睇吓咁。不過都唔知响邊度搵，唯有沿途搵，又叫徒弟仔睇吓 Google Map 搵。Google Map 搵到，但帶唔到路，無計... Miss 咗一個又一個嘅路口，經過租車公司無入去，一直揸到去 Micronesia Mall, 徒弟仔佢係想嚟嘅，行吓都好，出奇地呢度都有間 ABC, 泊好車後，再度遇上 One Piece 巴士, 手起刀落影相。

入到商場後，因為時間無多，即刻問 ABC 响邊。

影好相，我反而佢得佢得屈臣氏多過係7-11.

我買咗枝冰紅茶，其實無乜咁特別，徒弟仔買咗椰汁同埋芥辣味嘅朱古力... 閃!

徒弟仔似乎重想行，但時間問題，我又要趕鴨仔咁趕了。返上車，唔知邊個路口轉入去租車公司，直駛到 K-Mart 先發現過咗龍，唯有硬著頭皮做人生第一次嘅 U-turn, 順利回程，再叫徒弟仔 Whatsapp 俾 Billy 話我哋還緊車，叫 Billy 响酒店接我哋。

到咗租車公司後，等人送返酒店。期間，徒弟仔拆開個椰汁包裝，車! 入面原來都係鋁罐嚟...

租車公司老闆個女好活潑，响我哋面做啲體操嘅動作，年輕真好，好憂無慮! 個女仔要返體操班，順便上埋我哋架車，一路玩到佢落車。返到酒店後，按計劃兵分兩路，我拎寄倉行李，徒弟仔寄名信片，攪掂晒就上 Billy 架車去機場，比我預定時間遲咗一個鐘。

正值放工時間，條路有少少塞，不過响起飛前一個鐘到機場，都叫趕得到。Check-in 好，行到候機室，又同徒弟仔傾咗一陣計，就夠鐘上機。上到機，遲遲都未派餐，有少少肚餓，好彩第一日嚟嘅時間買咗袋麵包，呢幾日唔使用到，今次終於可以開封了，幾好味的說。等餐嘅同時，徒弟仔又望出窗口睇星星，今次重見到疑似銀河嘅物體，可惜 Confirm 唔到係唔係。過咗無耐，開始有少少熱食嘅香味。

本來諗住食完嘢就瞓，點知佢又播 Despicable Me 2, 要睇。睇完無耐，又播 Percy Jackson: Sea of Monsters, 睇嚟唔使瞓了，雖然可以用捱嚟形容，但值得睇。

落機拎行李，臨離開嗰陣，徒弟仔見到聖誕裝飾，又影一幅相。到咗巴士站，佢响左走，我响右走，大家要返屋企，旅行完滿結束。

關島之旅 - ABC

又係9點左右起身，不過今次徒弟仔起身先，今日去 Alupang Beach Club. 本來上網約咗，要 10:10 响 Lobby 等 ABC 嘅車，但 Billy 接手後，就可以 10:45 先落樓。時間充足，今日唔上去 Sheraton Club 食早餐，而係落地下酒店嘅餐廳。

嘩! 乜豐富咁多嘅!? 除咗 Cereal, 包、沙律呢啲 Default 嘢，重有專人煎蛋添! 我點咗個奄烈，話咗唔要芝士，但唔知點解到最後都係落咗芝士。食飽飽，又返上房執嘢去玩了。

去到 ABC, 等海豚團嘅時候揸好太陽油，再落沙灘𥄫吓咁。眼前所見，好多日本仔同日本妹响度玩，唔怪得除咗英文之外，好多接待人員都操得一口流利日文。時間差不多，點名搭巴士上船。

上船之前，要影一幅留念照，上到船，原差多都係日本人，有老有嫩，跟住就有一兩對台灣人同另外三四對香港人。開船無耐，就講解安全須知，因為好多日本人嘅關係，所以講咗日文先，再講英文。

唔知點解班 Crew 成日逗啊徒弟仔，跟住其中一個人同我講，話佢好似一個日本嘅諧星的說。

之後就玩香蕉船了，我呢啲唔玩水上活動嘅，吹吓海風就好滿足，但貪玩嘅徒弟仔就當然係當仁不讓地跳上船玩。隻香蕉船係用隻遊艇去拖，所以唔太快，拖一陣就返上嚟。

之後，開始就海豚，好位一早俾人擺咗，不過都叫做睇到，但相同片就真係嘛嘛哋。

最後玩浮潛，徒弟仔落水，我又吹海風了。

出海當然唔少得影遙望照。

回程嘅時候，不時見到飛魚，飛得都好遠吓，不過可惜我唔夠快，又影唔到。

返到 ABC 大本營，等 Parasailing, 補一補太陽油，見到佢個 Lunch Buffet 未完，徒弟仔話想試吓個咖喱喎，我都係咁以試吓個炒米粉陪吓佢，嘩! 個炒米粉都幾䶢，好彩唔大碟啫! 食完又要出發去搭巴士上船。

今次上嘅係快艇，又係先玩香蕉船，比遊艇快好多，又會掟彎，掟到跣咗手三次。之後就係 Parasailing, 即係坐响一張有降落傘嘅櫈度，再拉你上天咁。本來諗住用 GoPro 影响天空嘅情況，點知，唔知點解無㩒到掣錄，失敗，以乎部 GoPro 唔係咁鐘意我。

回程時間係4:20, 最後一班車係5:00, 車程係20分鐘，所以有幾分鐘衝出海灘玩。諗住行出去個海度，點知行行吓，有人趕返上岸，唯有影幾張相就走人了，可能我練大腿肌，水嘅阻力對我影響不大，所以腳程快少少，徒弟仔就似乎有少少吃力，我返到海灘時佢重好以响半路咁。

換好衫後，其實重有時間嘅，如果可以再行出少少就好喇!

返到酒店，今日無訂到 Buffet 或者 BBQ 餐，為咗俾徒弟仔佢話吓事，決定俾佢負起呢個最後晚餐嘅責任。於是，就咁等咗佢一個鐘，得出嘅結論係去 GPO 附近搵阿 King 幫手，話係 Local 嘅 Ruby Tuesday 的說。

落酒店樓下搭巴士，徒弟仔本來想影少少相，但個鏡頭好似污糟咗，就叫佢入餐廳攪攪佢，食完飯先再影。入到餐廳，與其話係 Local 嘅 Ruby Tuesday, 不如話係 Local 嘅茶餐廳，食物多說擇好多，有又啲類似常餐 Menu, 問咗個待應有乜嘢 Local Food 推介，就介紹咗 Northern Fiesta Platter 同 Southern Fiesta Platter. 兩款都係有牛啦雞啦雞啦同埋雞嘅 (三款唔同煮法嘅雞...)

 Southern 同 Northern 其實只係差牛肉嘅做法有唔同，Southern 係普通嘢而 Northern 係 Smoked beef, 大家都未見過，於是就試吓。嗌完餐，又睇吓個餐牌，徒弟仔見有早餐，忽發奇想，第二日過嚟食早餐喎...


個餐一出嚟，我就响度諗，乜我有嗌叉燒咩? 但又好似無理由咁，食落去係牛肉嚟，即係個 Smoked beef. 味道就真係唔太識欣賞。個餐兩個人 Share 剛剛好，本來想食埋個 Cheese Cake, 但係佢話無喎，所以打消咗食甜品嘅念頭。

埋完單，走去隔籬嘅 California Mart 行吓，其實只係一間似返香港嘅超級市場，無乜特別，但係有好多 Made in Guam 嘅朱古力賣，啱晒用嚟做手信。買完之後，徒弟仔影返佢要影嘅相，就搭車返酒店了。


返到酒店，見到個夜景幾靚，指俾徒弟仔睇，於是又影咗一輪相。反正都係影相，叫佢上樓上 Sheraton Club 影。

响房度拎咗個八爪魚腳架，影相夜景之餘，亦都影埋星。去咁多次旅行，都好似會影到獵戶座，今次都唔例外。

跟住醒起可以玩 Light Painting, 又返房拎 LED 燈上嚟玩，咁又玩咗幾唔多一個鐘。

但 Sheraton Club 似乎太光，於是落返房影。落到房，徒弟仔似乎有少少驚會影到其他嘢，真係笑死我! 不過，佢都係咁以畫咗條海豚。

玩完 Light Painting，沖涼，寫名信片，我都叫做快手攪掂，但徒弟仔又話要寫名信片又話要 Plan 第二日嘅行程，見佢攪到3點都未瞓，我諗我都係瞓先好啲...