相聚唐人街

有一日無聊响 Facebook 度搵有無香港人响倫敦嘅 Group, 咁啱又真係有，咁橋又有個聚會，於是就 Join 咗。

今日一早起身洗好衫，就出門口。因為星期日嘅關係，有啲地鐵嘅路線會維修，有日似乎要行去一個遠少少嘅站去唐人街。唔知點解 Google 又好，CityMapper 又好，都會點我去 Leicester Square, 但明明早一個站嘅 Piccadilly Circus 個距離差唔多，為咗慳少少時間，就早一個站落車。

去到餐館，原來已經有唔少人到咗，各人都有唔同背景，有畢業就留响度十幾年嘅、有嚟 Working Holiday 嘅、有公司派過嚟做嘢嘅、亦有過嚟讀書嘅。Anyway, 打個招呼，大家就已經傾到計，好耐未試過講嘢唔使由英文轉中文嘅過程。

响呢度，有部份餐館都係附設卡拉 OK 系統，不過大家都係決定醫好個肚，先至再唱。今日無特別準備歌單，只係刻意點咗手呢排興嘅《傻女》，同埋《Shall We Talk》，其他都係搵搵吓咁，驚喜少少嘅有《有心人》嘅演唱會版，香港唔太覺有，本來想點埋《浮誇》，但係諗起都幾難唱，都係放棄。

差不多尾聲嘅時候，小朋友們都點咗啲歌，至於演繹方法嘛，《傻女》已經係差太遠，屬於比較有震撼性少少嘅聲音，啱做鬧鐘...


曲終人亦散，埋單計數，只係14磅，真係抵過香港。之後，大家影咗幾張相之後，就各自回家了。

上到地鐵，決定唔靠 App, 試吓自己嘅方法轉車，又俾我試得到。亦好彩咁啱轉車嗰陣唔使等車，架車就已經到，响相對短嘅時間內就返到屋企，仲係用到近屋企嘅車站添!

今日嘅開心，係歸於識到新朋友、唱到歌、戰勝 Google 加埋好運。