戰場

其實呢場運動我係無任何話語權，我可以做嘅，只係幫下手 Share 吓 Like 吓同 Comment 吓，Comment 時重要小心翼翼，唔啱聽嘅事都唔想帶任何批評嘅語氣，最多單打吓咁。

但今日，不得不火力全開了，因為已經唔係觀點與角度問題，而係是非黑白嘅問題。今朝同事問起，本來都話好和平好地地，轉個頭臨食晏，接收咗一堆資訊之後，心知不妙，向上司請假再買機票飛返嚟嘅衝動不斷湧出嚟，但自覺做唔到咁瀟灑。睇住一堆愛字頭同黑社會嘅襲擊，跟住班所謂嘅領䄂就叫人返金鐘。究竟返金鐘做乜? 一個群眾運動，一出催淚彈就叫人走，佔尖沙咀同金紫荊就叫人唔好去，有乜嘢事就叫人返金鐘。我都忍佢哋好耐，但可以做嘅事已經唔多，只可以將推演嘅結論 Post 出嚟: 返金鐘就只係方便政府管理

今次個劇本好明顯，旺角同銅鑼灣攪事，跟住就班佔中學聯叫人去金鐘，無耐之後政府就發聲明:「警告包圍政總及特首辦人士　將依法辦事。」假設跟住個劇本走，到最後就係當晚以清場收場。好彩民眾比大家想像聰明，無返到金鐘，重去返旺角撐場。

遠方嘅我的確了解唔到現時的恐怖，但係我感應到民眾嘅脈膊。

呢一場係可能無成果嘅硬杖，而大家已經見到好多卑劣嘅手段，之後又唔知會唔會有更污糟嘅事發生，你準備好上戰場了嗎? 真係要上嘅話，就要沈著應戰，小心為上，同埋要慎防左膠同大會攪散。