Search This Blog

Saturday, May 30, 2015

隨意之旅 - 溫莎堡

本來趁 Weekend, 想去一去 Oxford 或者 Cambridge 其中一個大學城。但突然諗起可以近近地去睇吓溫莎堡,星期五晚就決定變卦,走去行一轉。

星期六唔知乜事好早就起咗身,响屋企𠴬咗陣之後,就比原定計劃早一個鐘出門口。响車站買飛嘅嗰陣,發現張車飛有少少唔同,但係背後嘅磁帶位置係一樣,入到閘就 OK 了。


路線比想預期簡單,只係去 Ealing Broadway 轉去 Oxford 嘅火車,去到 Slough 就有專線火車直接到溫莎堡,都只係一個鐘頭內嘅事。

一落車基本上就係一個 Shopping Area, 商店臨立,有一個慶賀英女皇登基 60 週年嘅雕塑。


時間尚中,去咗附近嘅公園行咗轉,毗鄰泰晤氏河,環境清幽,風景幽美,陣陣微風,係出走嘅好地方。


行到有少少攰,去咗牡丹樓買杯冰凍檸水,順便抖一抖


牡丹樓出面就係溫莎堡,不過時間尚早,未到御林軍交更嘅時間,於是就走咗去附近嘅商店街走一轉。


時間差不多了,城堡外圍有一排凳,唔使企住等。


奏樂聲響起,嚟接更嘅御林軍步操過嚟,走入城堡。大概十五分鐘後,城堡入面嘅御林軍又步操返軍營。


交更嘛,少不免都要塞車


食過午餐,就排隊入溫莎堡,不過一排就差不多成個鐘,原來有另一條隊係俾訂咗入場卷嘅人。入咗城堡之後,拎咗 Audio Guide 之後,先係參加個導賞團,再慢慢參觀影相。

城堡响羅馬時代係木造,直至 12 世紀,先開始用石嚟重建,見到呢座圓圓哋嘅塔,就係第一個開始重建嘅地方。


溫莎堡曾經係一座碉堡,所以有唔少防禦式嘅設計。


御所,英女皇渡假就係住响度。走入御所之前,可以睇一睇瑪麗皇后嘅玩具廳,不過如果對玩具模型無興趣嘅話,係可以唔使入去,因為都要排成半個鐘。而御所入面,擺出嚟嘅金飾銀器同刀劍盔甲都好靚,可惜唔俾影相。


參觀完御所之後,可以睇响外面,有炮台之外,山景不俗,好彩嘅話,重可以見到御林軍出現。



跟住就落山去下區睇 St George's Chapel, 係禮拜堂,亦擺放咗唔同皇室成員嘅靈柩。


Chapel 對出,係其中一個御林軍當值嘅地方


下區全景


响下區影咗一輸 Slit Scan 之後,都已經四點幾,原來諗住玩半日嘅地方,咁就玩咗成日。

Monday, May 25, 2015

Geek Pride 2015

一直都好想攪一個同教學有關嘅 Youtube Channel, 教吓啲平時簡單嘅科技嘢咁。剛剛好 Upgrade 咗部手機上 Lollipop 之後,原來可以唔使 root 機都可以錄底個 Screen, 好玩非常。似乎係時候做嘢,計劃好格式同題目,就落手錄製了。

格式同以前嘅《英語一分鐘》差唔多,一個禮拜一個大題目,每日分幾鐘嘅片段,當然有可能個大題目其實無乜嘢講,咁嗰個禮拜就得一兩日嘅片。題目方面,已經諗咗十幾個,所以應該三個月內都唔會執住,手機同電腦嘅題目都有。至於後繼係點,唔知,不過做咗先算。

本來想剩係開個 Youtube Channel,跟住發現個 Channel 係跟 Google+ Profile. 之後又唔想啲片罷佔晒個私人 News Feed, 到最後都係要開多個 Page.

呢個就作為今年 Geek Pride Day 嘅作品。

Sunday, May 24, 2015

法理情

既然有人問點解,我就嘗試答吓。

其實唔開記者會,就唔會講到「我陪你一起,我們一起死」「在外面被人欺負,我們都不夠膽跟人講多兩句。」唔講呢兩句,就唔會造成「技安居留拳」呢個咁大反差。呢個反差,將前所賣弄嘅悲情完全推翻。Not to mention the Eat, Sleep, Recycle slogan on the T-shirt. 情係假嘅,道理上亦會懷疑呢「兩婆孫」所講嘅事,剩底嘅法,就唔需要多講了。

咁網絡上需要洗版嗎? 唔... 响呢個資訊急速流竄嘅世代,有兩種事必然會洗版: 諷刺政權嘅資訊同埋討人厭嘅行為。開記者會嘅目的係要攪大件事,只係以工聯會同嫻姐嘅人脈同關系嚟講,安全惜事做得不足,到個方向唔係當初所想,就好好承擔後果吧! 重未知道網絡威力,生存响呢個世代會出事的。

咁做乜要攪間小學? Come on, 件事嘅脈絡太明顯,開完記者會跟手就去入境處拎行街紙,之後就講到話要返學,下一個鏡頭就話有學校收佢,一條龍服務嘅觀感太強,簡單嚟講,就好似一班人夾埋去扼你,你唔去反晒所有夾埋嘅人枱?

答完點解,然後呢? 然後又有哭泣女孩出現,跟手俾人聽到「大聲啲。」「OK」唉... 有咩比賣弄悲情更有效? 就係賣弄兩次悲情... 一間小學星期六下晝紅雨要返學校,可以保得住200個學生免受示威滋擾,但又唔清晒啲標言先放學生出嚟,重要教出一句「犯咗法又點喎!」十足黃子華金句嘅加強版。我覺得呢間只係會用學生嚟做籌碼嘅小學,教就一定唔識教,重要無端端害埋個細路女。

一件討人厭嘅事加入幾多悲情落去都係討人厭,就如丁蟹又夠大義凛然咯,但你會去同情佢咩?

真相未明,只係一件高調嘅事情可以無限延伸,向弱者抽刃? 唔... 世界上最無賴嘅係扮可憐,但實際上會郁手打人嘅「弱者」。

P.S.: 假設只係週末出街行吓咁,啲粗口係點學返嚟? 三歲就識講? The whole drama doesn't make sense.
P.P.S: 論和理非非,街童又打人又講粗口,要譴責嗎?
P.P.P.S: 按照特區政府專門同市民作對嘅慣例,批出身份證係遲早嘅事。

Tuesday, May 19, 2015

每日一字 32

早兩日有朋友介紹咗一隻字嚟形容香港嘅狀況: kakistocracy

kakistos 嚟字希臘字 kakos 嘅最高型態。kakos 解壞或者差,咁 kakistos 就即係最差
-cracy 又係希臘字解管治或者政府之類嘅事

成隻字就即係最差嘅人去執政。

再搵多少少資料,kakos 有機會同印歐語系入面嘅 caco- 有關,解排泄 (大嗰隻)。呢個狀態下嘅香港,日日都聽到啲官講廢話,真係見怪不怪了。

Thursday, May 14, 2015

隨意之旅 - 巨石陣與羅馬浴場

想去巨石陣好耐,無耐地呢排 Weekend 嘅天氣唔係太好,星期五放工一睇,有陽光喎! 於是就好快手咁 Book 好酒店同車飛,跟手執好行李早啲瞓。

朝早比預期早醒,於是就慢條斯理咁食早餐,去 Net Cafe 度 Print 埋啲嘢,就搭車出發。

原來火車可以去到唔少英國嘅景點,如果個個星期都嚟個 Day Trip 嘅話...


去到巨石陣嘅附近嘅鎮仔 Salisbury, 就求其搵咗間餐廳,係一間中式餐廳嚟,食自助餐嘅。選擇無乜,但時間關係,食飽就算。


跟住就去咗 High Street 附近嘅 Post Office, 買咗幾張 Post Card, 其實無話想寫俾邊個,求其諗起又咁啱有地址嘅就寫低佢,寫完先諗起自己無... 但時間已經唔容許再寫落去。


去 Bus Tour 途中經過嘅河,似乎要玩嘅話,呢個 Town 仔都係可以玩到一日。


Bus Tour 响火車站附近出發,返返去火車站後,架巴士差不多要開車,好彩都趕得切,不過當我俾張 Voucher 個司機嘅時候,佢話應該用彩色 Print 喎,不過到最後佢都收張 Voucher, 下次... 無下次 Lu, 因為其實架車根本唔 Full, 可以唔使上網買。

架巴士會响 Town 仔兜一兜,講少少個城鎮嘅故仔,之後先上高速公路。

正值花季,好多油菜花田啲花都開晒。


去到巨石陣附近,巴士停低咗,對出就係花海,加上陽光,超靚!


佢石陣附近有個 Visitor Center, 介紹返巨石陣同周遭嘅歷史,睇嚟可以玩半日,不過我就只可逗留一個鐘。


本來想行過去巨石陣度,但聽完個 Audio Guide 話要行成廿分鐘,即刻掉頭返去搭 Shuttle, 因為咁樣,樣衰地俾工作人員話,話我唔知邊道閃出嚟喎...

五分鐘過後,就到咗巨石陣嘅前面。有羊、有藍大、有白雲、有花田,景色一流呀!


好彩有帶到個大大支嘅全景鏡


行咗一個圈,夠鐘閃人,落車嘅時候,發現個 Headset 唔見咗,但時間關係,都係要搭車去下一景點: Old Sarum


Old Sarum 有分兩層,外圍係一片草坪,外加幾個遺跡


內圍要買飛入場,不過個 Bus Tour 已經包咗入場費。入面除咗一堆遺跡,其實都無乜嘢好睇


不過,風景就真係幾好睇


重可以玩層層疊


遺跡全景


順帶一提,有 Old Sarum, 咁新嘅 Sarum 去咗邊呢? 原來 Salisbury 本來個名就係 Sarum, 係近年先改咗名。

可以睇嘅嘢都睇晒,要返去 Salisbury. 又返去到市中心,買咗支水之外,見到附近有間 Poundland, 於是平平地入去買咗個聽筒,唔可以用 Handfree 講嘢,但起碼可以聽到網台。

時間差不多,去到火車站,買咗啲小食,上到火車,就去 eBay 買返個同一型號嘅 Headset.

一個鐘頭之後,就去到 Bath. 第一時間去酒店 Check-in, 都幾骨子吓 (其實房價都幾貴,不過臨時訂,無選擇,當住好啲) 金蟬脫殼,將細背囊抽出,又再出去了。


去咗附近嘅 Burger King 好快咁解決個晚餐,就去睇 Magic Show. 剛剛好趕得切未開 Show, 不過都差不多滿坐,於是就坐咗個穿崩位。雖然角度响技術上穿崩,但係如果以魔術演釋嘅角度睇,都幾精彩,無浪費我趕頭趕命趕過嚟睇嘅時間。

表演場地其實係一間 Bar 嘅樓上,樓下係有魔術師做交流,不過有少少攰,想返酒店休息。


跟住就發現,因為今次帶咗 GPS Logger, 點知漏咗响大背囊度,哈哈,似乎今次會 Log 少咗嘢。

返到酒店之後,做緊 Britian Got Talent, 睇咗幾個鐘,就咁消磨咗一個晚上。

可能早瞓嘅關係,第二朝未到八點就起咗身,無乜嘢做,梳洗之後就去咗食早餐。

除咗响自助餐區拎嘢食

本來想叫個 Sunny Side up 嘅煎蛋, 點知待應姐姐唔明乜哩係 Sunny Side up, 就講話即係有兩隻蛋黃响中間嗰啲呢,結果就係兩隻蛋黃...


食到尾聲,原來自助餐區都有煎蛋,新先出爐嘅關係,所以蛋黃仲係水汪汪,一流呀!

食完早餐返房執好行李,Check out 之後就將大背囊放入 Concierge, 一陣經過再返嚟帶走。

第一站當然係羅馬浴場,其實已經係一個博物館


重有人份鬼份馬氹細路添!

呢個羅馬浴場,最特別就係有天然温泉水嘅浴池,啲温泉水滿瀉,就會經引水道引入大池


呢啲係荒廢咗嘅浴室


水就落唔到,但係有興趣可以試吓啲溫泉水,不過唔好飲嘅。
温泉浴池


離開咗羅馬浴場,差不多午飯時間,又係去咗 Burger King, 不過今之唔係叫 Whopper Junior, 叫咗個 King Fish, 不過唔係太好食,似乎我都唔係一個啱試新嘢嘅人,試親都出事。

跟住去 Royal Crescent, 途中買咗啲收鼻水嘅藥 (一個月內第三次傷風...), 之後經過 Queen Square


再經過維多利亞公園外嘅紀念牌坊




跟住就到咗,其實都無心嘢太特別,只不過係出於一個叫 John Wood 嘅建築師手筆。


跟住就經過 The Circus 呢個迴旋處,又係 John Wood 設計,係景點之一,雖然唔知點解係景點...


返返去市中心,原本係被座建築物吸引到

但跟住呢住伯伯嘅歌聲真係幾特別,可惜無散紙


返咗酒店拎埋個大背囊,準備返歸前最後一遊。本來想入 Bath Abbey 參觀,但係差不多過開放時間,都係响出面坐低抖抖。於是就俾我見到呢個定格造型,講真,對於呢啲定格人物,我唔覺得係乜嘢表演,不過呢個就真係好型!


臨走嘅時候,發現重有 Pulteney Bridge 呢個景點未去,於是就走過去一趟。不過其實都係普通一座橋,係歷史耐少少咁解。


By the way, 呢度啲垃圾桶上面有太陽能電池,咁個垃圾桶就可以壓實啲垃圾,可以容納多七倍垃圾的說。


去到火車站,條路軌都幾特別,上面有植物,唔知係雜草定係有讓開。


去到倫敦市中心,出事,原來返屋企嗰段地鐵做緊維修,要等接駁巴士,第一次塔,等咗好耐車,但總算返到屋企。

Popular Posts