歐遊四國之旅 - 音樂之都維也納

好早起身嘅一日 (比起前兩日嚟講)，搭電車去巴士站，等... 一個鐘，企响度吹風，架巴士重要遲咗到，好凍呀!

嚟嗰架係雙層巴士，唔多人，有 Wifi, 都幾舒服


係窗口污糟咗啲，想影風景但效果不佳


午餐係噚日响 Food Court 買嘅三文治，都幾好味。

就咁搭咗4個鐘車，天已經黑齊，搭地鐵去酒店。出咗地鐵站口，原來酒店座落購物街，條購物街都幾大吓，無車行嘅，有啲似行人專用區。第一件事係搵手機舖頭買電話咭。問咗個後生仔，不過佢都唔太知，於是攪咗差不多10分鐘，見到有間3. 但個人嚟講對3嘅服務無好感，再𥄫一𥄫，有間A1, 本來以為只係普通賣電話嘅舖頭，但原來係電話公司嚟。10 Euro 3GB, 一個唔使諗嘅價錢。

Setup 好電話咭，就搵酒店，原來遠在天邊近在眼前，就只係一個街口，就到咗。而且，外觀不俗，心諗，我幾時訂咗間咁 Grand 嘅酒店...


Check-in 嘅時候，被告知係包埋早餐，依家諗返起，唔怪得呢間酒店係成個旅程最貴嘅住宿。Anyway, 入到房，都幾大吓，略嫌有少少古舊嘅氣味。


放底晒行李之後，走去搵食，行行吓經過一間超級市場，本來想去買啲嘢。但係原來星期六早收，夜晚六點就唔俾入，而呢一刻係五點五十九分... 入面個保安哥哥擋住唔俾入...


附近都無乜特別好食，於是去咗食 Fish & Chips (英國都未食過...)


突然又吊起條 Cheese Cake 癮，於是去咗 Starbucks 整返件


過咗六點，啲舖閂晒，街上無乜人，都係返酒店上網算。

歐遊四國之旅 - 第一場雪

噚日夜晚落咗場大雪，一大朝早望出窗口就係雪景。靚仔魔術師話喎:「聖誕要有雪才有節日氣氛嘛!」哈哈，雖然唔係未見過雪，但雪的確係幾令人祈待，直至行出酒店門口。

以前見嘅雪，一係小雪，落地即溶，一係响鄉郊，無咁多車，响地上面久久不溶。但城市嘅雪，行人路還好，响馬路上面嗰啲，係好污糟，簡直係一片泥濘。對雪嘅印象，完全地崩潰。好彩只係旅行啫，响度生活嘅話，我接受唔到。

不過，行出街見到有人畫咗個笑面，正能量就完全返晒嚟


今日要去雕像博物館，要搭地鐵 (其實只係搭一個站，或者行兩個街口，但天氣凍，唔想行)，於是就順便去睇吓手機店有無開，Lucky! 有開，買到 Stylus, 唔使除手套用手機了! 心情靚靚，睇乜嘢都覺得特別同埋靚。


每日一字時間: Glyptothek 係一座雕像博物館，原為希臘文，Glypt- 解雕刻，thek 解倉庫。

Glyptothek 座落响 Königsplatz 入面，成個廣場都係希臘式建築 (主要都係三座啫)


博物館外有不少遊人，有啲玩雪玩得不亦樂乎


有唔少靚嘅石雕


當然亦都有珍貴嘅歷史文物


見出面有陽光幾靚，於是就出咗去花園影相，不過件褸於咗响 Checkroom, 真係好鬼凍，影咗一陣就入返室。


展館唔太大，一個鐘頭左右就行完，跟住就要去 Pinakothek der Moderne (現代畫廊) 補完一張相


返中央車站食晏，都係食雞脾，不過今次配薯角。


本來諗住已經結束一日嘅行程，但係對於雪地嚟講呢，總係覺得有啲地方可以影。心中係一個空曠有雪唔多人嘅地方，於是就諗起 English Garden. 效果好以不如想象般好。


嚟到 English Garden, 當然就要去 Chinese Tower


差不多，天都開始黑，搭巴士返酒店，點知巴士飛站... 好彩總站就响中央車站，都係離酒店不遠，跟住... 落起雪嚟，都幾大雪吓添


時間尚中，小睡片刻後，又係晚飯時間。想搵間餐廳試吓啲地道菜，入咗間貼咗英文菜單嘅，但係無人招待... 今時今日咁嘅服務態度，閃! 隔籬有另一間，重好多人，似乎呢間質素有保證啲添喎，一入到去，問佢有無英文菜單，佢話有，太好了，唔使搵大神幫手都有嘢食! 正餐前，食咗啲麵包，味道唔錯。


點咗個炆豬腳配生菜加薯仔，個薯仔好好味，相比之下，豬腳好以無乜味，同埋又太大份，食唔晒呀... 嘥晒添... 誠心地同待應講唔好意思，埋單走人。


走出餐廳，嘩! 好大雪，唔通連個天都怪我唔食晒啲嘢?


Anyway, 最後一日响慕尼黑，又要執行李了。

歐遊四國之旅 - 聖誕在慕尼黑

朝早瞓到好晏先起身，個人好清醒，出門嗰陣，己經近12點。噚晚發現，原來 City Hall 附近重有個景點，於是就去咗補完。

City Hall 嘛，其實噚日行得太近，影相嘅角度唔係太好，今日行返遠少少嚟影。


今日嚟就係為咗呢個水池，唔係太特別啫，點解可以成為一個景點?


跟住就搭地鐵去 Oktoberfest 會場，但聖誕當然唔會有啤酒節，不過個會場真係好大，我諗係去到天安門廣場嘅級數。


經過半個會場，終於到達目的地: Bavaria Statue, 一個超級大嘅銅像


銅像背後係名人堂，不過聖誕日，好似無開


影完相，就去下一個站，行埋另一半嘅會場，終於走咗出嚟，去地鐵站嗰陣，拎咗部手機查吓下一站點去，於是就不知不覺間，又唔見咗支 Stylus, 搵嚟搵去都搵唔返，天氣咁凍，似乎要將部手機雪藏一陣。

下一站係 Schloss Nymphenburg (寧芬堡), 途中經過中央車站，即係栖店附近，本來都無意識到呢件事，直至想買嘢食，先發覺啲舖頭熟口熟面。於是就買咗個三文治做午餐，同埋一包糖一路行一路食。中央車站係我地頭，睇吓個手機店有無開，買返支 Stylus 先! 答案就當然無啦... Today is Christmas Day...

搵電車去 Schloss Nymphenburg (寧芬堡), 本來貪佢個花園夠大，不過，行入去個前院已經一大段路先去到個湖


入到去見到漫漫長路，又天陰陰，加上寒風刺骨，始終身子弱，決定徹退。


回程坐電車，但座錯咗反方向嘅車，又要等多十分鐘先有車，今日嘅行程似乎有不少意外。

返到酒店房，個人大攰，瞓咗一陣，個人精神晒，天已黑，又係搵食時間。去咗車站 Explore 除咗 Burger King 重有乜嘢選擇，原來行遠少少有個 Food Court. 實在太好喇! 不過好多都係賣凍嘅嘢食，熱食嘅話，一係價錢不底嘅廳，一係 Pizza, 德國腸配酸菜，一係熱氣嘢。腸嘅份量唔太吸引，最後買咗隻雞脾加薯圈返酒店慢慢食。

歐遊四國之旅 - 平安日與夜

因為之前一晚酒店話啲舖頭會好早閂門，於是就去超級市場買嘢食，免得遊覧完入夜之後乜都買唔到。估唔到，慕尼黑嘅超級市場會有日清杯麵 (欠相 -_-)，於是買咗兩個以備不時之需 (其實已經帶咗兩個)。

買齊嘢，就出發去市中心，先去買張有較72小時嘅車飛，跟住迷失咗响個同地鐵站相連嘅地下商場，攪咗一輪，攪到要去嘅 Karls Gate. 其實只係一道城門，無乜特別，於是就去Sendlinger Tor. 去到 Sendlinger Tor, 又係另一道城門。於是，又好到此一遊咁影咗幾張相就走人。


搭地鐵去 Marienplatz, 不過就去咗一個頗為遠嘅出口，但錯有錯著地係一塊廣闊嘅早地，幾啱用嚟影 Street View


行過少少，去到 Marienplaz, 呢度包咗幾個景點，新/舊大會堂、聖母像、而且係一個 Christmas Market, 所以都幾熱鬧吓。


去到嘅時間係12點，新大會堂嘅鐘樓有歌仔聽，公仔亦都隨之而起舞


跟住响新大會堂嘅一個露台，突然奏起《平安夜》，跟住响台下嘅人就唱起歌嚟，感覺好舒服


聽完歌，經過一間小店，好多牛角包，重有好多款揀，於是就買咗個嚟食。


搭電車去另一個廣場，除咗個雕像之外，無乜特別好睇，影完相就下一站


搭完電車都要行一陣先到嘅和平天使，底層以雅典衛城建築設計。


名字雖然係叫和平天使，但係其實係勝利女神奈姬，以 Paeonius 嘅作品為藍本。


下一個地點係 Walking Man, 要先坐巴士去 Odeonsplatz 轉地鐵, 但見好似幾啱影相，就駐足一會兒，不過，天就嚟黑，不直久留。响呢度差少少唔見咗支 Stylus, 好彩搵得返。


搭地鐵一出地鐵站，根據 Murphy's Law, 要去嘅地方，永遠响另一個出口。於是又再入地鐵嘅隧道過馬路，行咗無耐，就見到隻友誼之手


Walking Man 唔係話非常特別，以到此一遊嘅心態嚟影相就可以了


向今日嘅最後一站出發，途中經過仿凱旋門建築物同埋慕尼黑大學


再穿過內街，終於到咗，但係天氣太暗，唔太影到相添


行咗好多地方，搭巴士返酒店，抖一陣就出街搵食。因為平安夜嘅關係，大部份吃肆都閂晒，可以揀嘅就只有中國菜、東南亞菜、同快餐店。好彩附近嘅火車站入面有 Burger King, 今晚有著落了。

因為病緊，好早就瞓咗，响睡夢中過平安夜。